《龍珠超劇場版：布洛尼》4DX 簡評

阿定

[youtube]7BsnSuBLblM[/youtube]

老老實實，等戲院上真係唔係一件易事，香港遲日本太多，真係好失望，不過等得咁辛苦，一定要玩盡佢，比貴點都要去睇4DX版，上次大黃峰睇完4DX版後我幾鐘意呢個玩法，但今次睇完龍珠，先知咩叫真4DX, 真係超級推薦呀！

故事唔劇透啦，今次有點回歸番細細個睇龍珠戲場版咁，以外傳型式帶一個新對手出來同悟空佢地對戰 (雖然布洛尼唔係新角色)，初期的劇情係被稱為龍珠前傳《銀河巡警到地球》入面《被解放的命運之子》的完整動畫化版本。

故事好有鳥山明的風格，有好多認真做低能事的輕鬆位，整體我評價係比之前打菲利的劇場版來的討好，故事承接力之大會後的劇情，屬於龍珠超後的正傳故事。

除了開頭主力講歷史的文戲外，龍珠無理由無打鬥場面，不停的打鬥，唔同顏色的頭髮，老實說，會有點重複又重複的感覺，呢個已經係近年龍珠的通病，但今次全靠4DX加持，完全唔覺得會悶，之前睇大黃峰，我感覺4DX只係D-Box的加強版，但今次龍珠，我直情覺得成套戲係為4DX而度身訂做都講得通，如果好似我個好好彩有睇過早年係大阪USJ搞的龍珠The Real 4D的話，我可以話完全再高一個層次，除了無3D畫面外，震動感，風，味，水，所有效果都出齊係呢100分鐘的戲入面，票價雖然勁貴，但完全係超值，比多成舊水對龍珠迷來講，真係抽兩次一番獎都唔見左啦。

畫面方面，無上一套咁靚，粗糙感返左來，比我感覺似細個睇OVA的感覺，即係比電視版用心好多，唔會出現勁多崩壞的畫面，但又唔係現代科技的CG動畫，雖然都有唔少位靠CG做背景，但整體可接受，特別係畫風跟番九十年代，呢種童年回憶返晒來我特別Buy，所以我反而欣賞呢個畫法，平時打機見到的超靚CG畫面，反而唔係我呢類老鬼會鐘意的畫面呢。

#入場記得著多件衫
#無機會比你飲野
#dragonball #龍珠 #movie #4DX

HemdersonHong

好似唔錯哦

gashapon

avsuperman 發表於 2019-3-24 12:37
我都係睇左報道先去睇MX4D，睇早場$125超扺，有一個重點係無提到，我睇过超过十套MX4D及4DX、DB0X戲，龍 ...

我都覺得戲院睇比在家中震撼好多. 就如高達NT咁, 之前在youtube上睇了23分鐘的"免費版", 之後都有入場睇, d聲音效果真係好好多. 呢幾十蚊真係抵俾 XD

不過少少不滿是我覺得今次故事有點唔夠喉, 打幾下就完場, 其實都無實實在在咁對打. (但明顯大波連實力係深好多)

avsuperman

nowtv_offer 發表於 2019-3-9 22:09
劇情好吸引

我都係睇左報道先去睇MX4D，睇早場$125超扺，有一個重點係無提到，我睇过超过十套MX4D及4DX、DB0X戲，龍珠肯定係最正的代表作，真的未试過一套戲可以連續震動30分鐘，且擺動幅度直情好似玩洗衣機果種震動效果，跨張程度係预期之外，坐不稳随時抛落地，唔係前後郁两下咁简单，淨玩後面半粒鐘都抵，就算家中玩DB0X的朋友都玩唔到戲院果種效果，錯過入場绝對係你的一大損失

阿定

tinlunlau 發表於 2019-3-8 07:22
我身在加拿大比香港早一個月上映。imax版只上映一日，所以得個普通2D版睇。希望龍珠下次出劇場版Funimation ...

鐵盒真心正

tinlunlau

我身在加拿大比香港早一個月上映。imax版只上映一日，所以得個普通2D版睇。希望龍珠下次出劇場版Funimation積極啲唔好淨係齋2D版啦！講到Funimation，龍珠超劇場版上映冇幾耐，聲演布洛利嘅Vic Mignogna因一連串嘅性醜聞捲入#metoo風波。最終被Funimation炒魷。依家準備告Funimation上法庭。

仲有美版Bluray鐵定四月十六號推出。Best Buy獨家售賣鐵盒裝。日本方面六月五號推出。

gashapon

我自己可能覺得"超"都係比較搞笑, 實力上又會好多矛盾 (以前一變金毛明明會勁好多, 依家變了藍神好似仲衰過金毛咁...), 故事其實都幾簡單, 同埋菲利變o左搞笑角色....(個願望仲要.....唔怪得之後龍珠會變邪惡龍...) 感覺依家將大波set到係個"好人", 依家打完其實又無咩點打過咁. 大波又未爆發所以潛能, 有時心想如果力之大會有佢份可能易打好多 XD

horace_tsang

同阿仔睇完4DMX，佢就好爽，我就暈坨坨，中間有一些場景，會有氣味噴出，本來代表食物，但我反而覺得很臭。打鬥場面真係冇得輸，Kame Hame Ha一出，必定來個地動山搖，爽係好爽，但真係有少少暈。我起初以為好多小童，點知清一色大人咁濟。我個仔仲話下次要睇~複仇者聯盟四4DMX，希望一樣咁勁啦。

Hon

今朝睇完早場, 無野好講啦, 掂過碌庶.

4dx我都唔係第1次睇, 無記錯嗰時睇fast and furise, 其實都唔差既, 不過呢樣玩法都係配動畫至可以有一流效果, 有幾次都俾佢chok到彈起, 個pat pat同對腳無力都真係唔好去試, 包你跌落地都似.

ANYWAY, 多謝定爺介紹, 考慮緊試唔試埋MX4D, 但快極都要下星期六或日至得...HEHE

阿定

jc2ssych 發表於 2019-2-26 11:16
Yes ar. Ready player one 當時係睇3D。

我一般 IMAX 3D 睇戲都無事。

3D 再加震，可能時間一長就頂唔到，USJ個D時間短，同本身設計就係會移動，所以無咩事都唔奇，今次龍珠無3D我估應該問題不大

jc2ssych

阿定 發表於 2019-2-26 10:03
3D版？呢隻龍珠無3D，應該唔會暈，係震到我成場戲水都飲唔到，差D成杯倒落自己度！ ...

Yes ar. Ready player one 當時係睇3D。

我一般 IMAX 3D 睇戲都無事。

但當 3D視覺 加埋 搖晃就會唔舒服。

上一次係去環球影城玩 Transformers，暈到想嘔。

但嘔完即刻排隊玩多次。

第一身坐住大黃蜂逃避麥加登追殺，實在太爽了！