VR+ | VR STADIUM 全港首間旗艦4D體感VR體驗館 試玩後感

阿定

VR 遊戲越來越大熱，日本有VR Zone可能好多人都知，但有無想過香港都可以有VR機鋪? 台灣同上海已經有唔少分店的VR+|VR STADIUM 係銅鑼灣鬧市斥資千萬打造全港首間旗艦VR體驗館，兩層樓高佔地面積逾4,000呎，共設有6款不同題材的獨家製作VR遊戲，其中《生化煉獄: 屍痕遍野》和《怪怪屋》是第一次在香港亮相。 注:已經搬到銅鑼灣金百利商場啦



遊戲以第一身視野進行，帶上VR眼鏡後，就會同隊友一齊走進虛擬實境合作玩遊戲，遊戲有震動地板，獨家研發調校的虛擬槍枝，實體道具使用紅外線定位，玩家可以身歷其境般享受4D體感娛樂。







遊戲有6款，分別有3款驚嚇向與3款親子向

	《生化煉獄: 屍痕遍野》 以5人團隊遊玩，有三種槍比玩家揀，分別係散彈槍，機關槍同手槍，喪屍由前左右三個方向包圍，玩家要不停開槍，筆者玩完覺得係全部遊戲中臨場感最高的，喜歡射擊遊戲的不容錯過。
	《生化煉獄2章》 遊戲係一架真貨車上進行，一樣有散彈槍，機關槍同手槍比大家揀，加埋風速體感裝置同車體晃動體感裝置，臨場感更加真實，畫面比《生化煉獄: 屍痕遍野》更真實，遊戲環境十分黑暗，要靠槍上的燈光才睇到喪屍，加上喪屍由前後左右全方位包圍，玩家們要合作補位才能夠完成遊戲，非常講求團隊合作，筆者玩完就只有一個累字，特別係揀散彈槍的，體力不足的要有心理準備會幾辛苦。
	《魂飛魄散》 遊戲最多同步八人連線，大家圍繞在一張大圓桌坐底，除了要帶VR眼鏡外，還要帶上耳機，遊戲開始後要靠玩家互相提示，利用「眼神」擊退女鬼，筆者玩時被女鬼攻擊後，真的會升上天 (上帝視野)，係上空見到自己的肉身無反應，其他玩家繼續被女鬼攻擊，感覺非常特別，如果怕太真實的鬼屋的人，可能要有少少心理準備先好去玩。
	《盒子英雄》 勁可愛的射擊體驗遊戲，玩家走進卡通世界，對付可愛的惡攪殭屍，利用特製兒童專用震動槍枝射出另類子彈，好好保護博士，爭取時間讓博士啟動雷射大砲，筆者覺得玩完好歡樂，好似自己走左入去Minecraft 的世界咁，小朋友同大細路都應該會好開心，係連媽媽都可以一齊戰鬥的射擊體驗遊戲。
	《野人戰爭》 一樣係走可愛風的射擊體驗遊戲，不同的係用上十字弓對付野人，玩家走入卡通世界後，面對前左右三方的野人夾擊，野人走近時地板會配合震動，迫力十足，筆者玩時，有少少覺得似《生化煉獄: 屍痕遍野》的小朋友版，沒有任何的驚嚇，只有可愛同有趣的感受，特別推薦小朋友，女生，特別是情侶去玩。
	《怪怪屋》 同《魂飛魄散》接近一樣，不過走可愛風，坐定定係度玩，最多八人連線，用眼神趕走小精靈，遊戲真的非常兒童向，強烈建議大人直接去玩《魂飛魄散》，不過當然小朋友同埋比較怕鬼的朋友，呢個都非常值得一試！

最後大家可以睇下《生化煉獄: 屍痕遍野》實際試玩片



遊玩攻略
每個遊戲大約15分鐘，雖然係VR遊戲，不過就唔會有頭暈的感覺，所以可以一次過玩兩三個遊戲，三合一組合價錢係298，平均100蚊咁上下，可以考慮一次過買三個遊戲，如果夾到五個人玩(星期一至五)，我建議購買五人同行二人免費套餐，以每個遊戲138蚊計，平均都只係83蚊一個遊戲，比三合一套餐更著數，另外要留意番兩款《生化煉獄》遊戲用的散彈槍同機關槍都係用上WarGame專用的槍枝改裝，有番咁上下重量，決定玩遊戲前可以問工作人員借來上上手，睇下自己應唔應付到，如果實在怕太重，建議揀番兒童向的《野人戰爭》或《盒子英雄》玩吧！

阿定

VAR LIVE 電競館 已經搬到同樣係銅鑼灣的金百利商場二樓啦，遊戲比之前更多，追加了三個新遊戲，所以我地都特別為大家追加介紹番呢三個新遊戲係點玩法，同好唔好玩比大家知道。

其他遊戲的試玩報告可以睇番上面的報導: https://post76.hk/thread-276376-1-1.html



睇番最新的遊戲介紹，分別有生化煉獄第三部曲「生化煉獄：屍痕遍野」同兩個電競類的「極限對決」和「極速快車」



「生化煉獄：屍痕遍野」，同之前兩集玩法差不多，一樣配備有散彈槍、衝鋒槍同手槍，加埋震動地台，係村入面狂掃不斷出現的喪屍，今集因為地型關係，立體感比之前更上一層樓。



「極限對決」Over Kill，最多八人同時對戰，分成紅藍兩隊，以互相射殺對方，以搶攻對方大門為最終目標，最快成功攻破對方大門為勝方，又或限時內大門比較損壞嚴重為負方，個人推薦實力相差太遠的話，可以停止攻門，專心射殺對方，咁就可以玩長少少時間啦，遊戲設有瞬間轉移機制，玩家無需跑來跑去，只需專心射殺對手及喪屍就可以。



「極速快車」係玩家之間進行賽車競速的遊戲，可以抓準時機使用道具攻擊對方，賽道上亦有不同障礙物，玩法有點似孖寶賽車，設有方向盤同油門，可惜架車唔會跟著遊戲中被道具打中而發出震動，但喜歡橫衝直撞的朋友一定會鐘意

遊玩攻略
試玩當日的最新收費係每人HKD238任玩一個鐘，以每個遊戲大約15分鐘計，加上介紹同帶VR眼鏡，大約可玩3-4個遊戲，過程唔會有太頭暈的感覺，所以可以一次過玩唔駛中途休息，記得意番三款《生化煉獄》遊戲用的散彈槍同機關槍都係用上WarGame專用的槍枝改裝，有番咁上下重量，玩遊戲前可以問工作人員借來上上手，睇下自己應唔應付到，如果實在怕太重，建議揀番兒童向的《野人戰爭》或《盒子英雄》。

地址: 香港銅鑼灣記利佐治街1號金百利商場2樓
營業時間: 星期一至日 12pm-12pm
立即預約: https://varlivehk.as.me/