峰迴路轉，老婆：要MA8000 開箱#2 分享#3 黑屎#227 1603 Silver #284

lego_cyris

近年家中煩惱事太多，最近安頓好，多左時間同老婆夜晚聽下歌仔。家中設備好耐無升級，LX83 + XPA5 + 105D 睇戲聽歌，最後只係加左部 N-70 玩下 DSD File。望住對 CM8，再望下部 XPA5，好似難為了對喇叭 … 開始心癮起，想入部兩聲道合併機，膽粗粗學人試下影音分家。


好耐無上嚟 Post76，一上嚟真係大大鑊，見到各位師兄又金仔又老麥，好似天時、地利、人和全部中晒，要幾毒有幾毒。第一個老問題，咩機夾自己套喇叭，我一直希望有機會上 800 系列，而自己最有印象又只有金仔同老麥。上網做功課，根本就係玩自己，唔會有答案，例如：老麥唔夾 B&W、金仔 E600 人聲正過 E470、A Class 比 AB 好、大堆頭老麥唔腳軟、聽女聲用金仔 … 太多太多不同意見 … 睇左幾晚上百上千條留言、討論，最最最 (重點要講三次) 中肯既總結係：自己去試晒兩部啦死蠢。


好，鼓起勇氣同老婆、同老婆、同老婆 (重點要講三次) 上左友誠，無錯係同老婆一齊上友誠，仲要第一次一齊上，其實同自殺無分別，都係搏一搏 … (依家諗返起係值得既)。        “唔該，想睇下 E470 同 MA6700 既”。點知帶我地入房，首先俾我地試 E600 (心諗玩野咩，一嚟就 E600) 聽左一首人聲、一首小品樂器，終於知道咩係金仔聲：聽女聲一流、清晰通透、輕快細緻 ... (下刪一千字) 同各位師兄對金仔既見解一樣。


到老麥試同一首人聲，同老婆第一個既感覺係好似係飲左杯紅酒、校暗左燈光聽歌既感覺，好暖好厚。終於明白有師兄形容金仔似 20 多歲輕鬆活潑女聲、老麥似 6、70 歲有經歷既女聲。再聽同首一小品樂器，無金仔咁 Sharp 但有彈力，有力量，同埋老麥比較下有少少朦，同網上聽到既意見好相似。睇下隻錶，人家夠鐘收工，我們兩條友又剛剛大開"耳"界，鄉下仔出城，都係返屋企再諗諗先，唔係買餐餸咁簡單 … 同 Sales 大哥交換個電話、淡淡然講再約，佢心諗白撞，阻住收工。


回家途中不斷討論，老婆無咩主意，只係提過老麥似我地屋企聽開既感覺，我自問都有同感，加上機面既一相迷人藍眼睛，最後鎖定目標向老麥出發。返到屋企緊係上網做功課，問左 Post76 幾位剛入手師兄，佢地個價比我報個價靚仔好多，心有不咁，即刻上網搵下二手搵下一手靚價 … 竟然有好野 MA7000 上代旗艦機，二手價錢非常吸引。但再了解下，原來推出到停產再出左新機代替，已經係一、兩年前既事，因怕二手折舊及已有新機代替問題，都係搏唔過，咁大個人第一次買咁貴既機，唔好冒太大風險。


第二日同 Sales 大哥不斷來回 WhatsApp 唇槍舌劍返價還價，最後爭取到靚價，決定再升高一級由 MA6700 上 MA7900，點知一問之下竟然仲有 MA7000 新機存貨，價錢同今代二哥 MA7900 相差好少，人一世物一世，大膽一問可否試下二哥 vs 上屆旗艦大佬，對方一口答應，即時同老婆再戰二奶毒氣房。去到首先試 MA7000，再試 MA7900，同一首人聲、同一首小品樂器。


總結，一個字講晒 ”完勝”，無論空氣感、力量、彈性、闊度、高音伸延都高幾班，連第一次試老麥有少少朦感覺都無，真係試嚟都嘥氣，旗艦始終係旗艦，只係滿足自己未聽過。根本係推自己去死 …，最後決定：MA7000，差少少上一代就上一代啦。


“咁 … 新一代既 7000 出左未？幾錢？” 突然老婆出聲 !!! 劇情峰迴路轉，老婆出手不斷了解新 / 舊機資料，果短短既幾分鐘內，完完全全主宰住我同 Sales 大哥既命運 … 最後老婆再講 “咁緊係有新買新啦，唔好買左之後囉囉攣，換嚟換去咁煩啦。”


最後，老婆發功又返價又還價。終於開單、俾錢、等送貨。真係估佢唔到 … 下次再買新玩具，帶銀包之餘，仲要帶埋老婆

終於上架

終於上架啦 ~


開箱：#2

用後分享：#3

黑屎 SR Black Fuse 入手：#227

Inakustik 1603 Silver 入手：#284

lego_cyris

足足等左六日，最後安全到步



包裝盒非常大及重，Shipping Weight 有 60 kg



真身係盒中盒出現



跟機物件 ，點解係舊搖控，我見其他師兄已轉新款



MA8000 已加入 Digital Audio Input



原廠 Jumper ... 用住先，食緊樹皮 ...



可以選擇 2, 4 or 8 Ohms



機頂都好迷人



一切準備就緒



成功點燈



支針跟隨住音樂跳動，食樹皮係值得既 !!



依家老婆最鍾意坐係張 Eames Lounge Chair 嘆 "老麥"


剛剛先開始煲機，遲 D 分享下感受，多謝咁多位師兄之前既加分

lego_cyris

收左貨兩星期，個天都知我窮，要努力搵錢，日日做到無停手，終於有時間坐定定打下字。報告就稱不上，少少用後分享。


在新機未送到前，同老婆選定幾首歌不停聽。錢用左，分別一定有，但我地都想知道相差有幾多。


部機好重，加上搬開野，順手走過晒 D 線，清理下貓毛 … 一整就幾粒鐘，可以著到機已經一點幾，隨便播隻歌，見到兩支針係藍色背燈下左右擺動，已經心滿意足，返房休息。第二朝早餐都未煮，兩公婆即刻坐定定試機。聽返果幾首耳熟能詳既歌，一開聲你眼望我眼，大家點點頭微笑，食幾耐樹皮都係值得，部機未煲我地都已經收晒貨。開頭佢一直擔心家中喇叭、音源都只係一般貨色，會唔會無乜分別 … 依家佢應該放下心頭大石。


有比較既情況下，真係要同對喇叭講：對唔住，原來難為左你咁耐 ... 我知一直對你唔好，但無諗過原來係咁差，真係非常慚愧。

• 樂器彈奏好清脆、細緻，其中一首歌有古箏伴奏，聽得出琴弦既韌度同彈性；
  

• 高音伸廷感覺非常良好，聲音好似停留係空氣之後再慢慢 Fade Out；
  

• 音場闊度同深度有明顯改變，聽到每件樂器排列係唔同位置上，當合上眼時可以幻想到聲音既分佈；
  

• 因音場有改變，立體感相對增強，完完全全體會到歌者企係你面前演出既畫面，好有感染力；
  

• 聲低屬於厚聲，雖然好多老用家講近代無舊機咁厚，加左幾分清爽度同分析力，但相對上以前既”朦”聲減少了。對於我個人非常合口味，平日鍾意聽 Jazz、輕鬆小品音樂、人聲、老歌，感覺好舒服，唔會太剌耳同太鋒利，剛剛好，恰到好處
  

功能上，MA8000 加多了 PassThru ( AV bypass )、DAC、同軸、光纖。暫時只用到 PassThru。唔知係我未了解清楚或是部機比較蠢，當我要 PassThru 時，Av Amp 幫我著機，但中途無得俾我轉其他 Input，直到我關上 Av Amp 為止 … 即係睇完 Bluray 要聽歌，要關機再開機先有返個控制權，依個問題要再了解下。


自從新機到步，每次聽歌都有驚喜，因為比以前聽多左野，分別到錄音質數。好“落力”聽每一粒音，用一個新既觀感去欣賞每一首歌、每一段音樂。聽覺同味覺一樣，嘗試過好野好難返轉頭，依家老婆要求都高左，唔靚聲既碟唔聽，下次等我帶佢去試下 D 喇叭先 …

lego_cyris

victor76 發表於 2016-11-6 07:52
恭喜晒，真係羨慕到冇朋友!

師兄，如果E600同MA8000(或MA7000)除咗味道唔同之外，空氣感/高低延伸/力量/ ...

因無試過 E600 vs MA7000 同場比較，無 AB 對照過，下結論有點不公。只可以講兩部機，取向、風格、類型都不
同，好難直接比較。

我個人鍾意老麥聲，MA7000 都 Sharp，好清晰通透，可能級數問題。師兄真係要親身試過先有答案。



題外話，如果師兄對 E600 有興趣，又唔介意日水二手，可以出去留意下。有部全齊連 APL-1，我見過真身同知道價錢，差 D 失手放棄老麥

lego_cyris

kl122002 發表於 2016-11-6 08:19
好彩, 你和你太座仲未試過歐洲機, 如果唔係就

應該依幾年都無咩機會，除非中左六個字

lego_cyris

keke323 發表於 2016-11-6 09:48
ching 真幸福
快 d 出相

多謝師兄事前落毒，送我一程

貨要下星期先有時間收，到時有排攪

lego_cyris

orhui 發表於 2016-11-6 10:14
超羨慕呀
&開箱文&可否pm價錢參考

PM 左你

lego_cyris

wing1238 發表於 2016-11-6 10:28
不如一部到頂，玩前後

難道太高，今次已經超額完成，今次留一線，下次好相見　

lego_cyris

henry2000 發表於 2016-11-6 11:08
師兄, 可否PM價錢?

PM 左你

lego_cyris

wai.com 發表於 2016-11-6 11:01
買 電源線同F屎  記得同老婆去喇

哈哈，我諗老婆會好難理解："部機係咪燒左？好好地點解要換 F 屎"