《Watch Dogs》傳媒預覽會 實況報導

@肥狗仔@

《Watch Dogs》自E3 2012公佈之後一直都係機迷的關注對像，當中除了因為次世代級別畫面之外，其利用手機作駭客入侵的玩法亦成為一時佳話。隨住愈黎愈多嘅遊戲資訊流出，玩家都非常好奇: "究竟天下間仲有咩野可以難得到部手機?" @肥狗仔@上星期就出席咗由SCEH舉辦的"《Watch Dogs》傳媒預覽會" 並親身試玩過哩款年度矚目大作，感受成為未來駭客的滋味。

駭客哩個term過去經常與犯罪拉上關係，不過黎到本作玩家將要操控一位正義駭客，為家人之死向邪惡勢力挑戰。《Watch Dogs》發生在未來的芝加哥，城內一切設施運作甚至人口管理都由一套名為"ctOS"的中央系統掌管。ctOS不但通過監視器監控城內的每個角落，在大部份人使用智能手機的情況下，該系統更可直接讀取市民資訊，使到個人私人在這個由ctOS支配的城市中蕩然無存。Aiden Pearce是個出色的駭客，也是玩家操作的角色。在一次任務中被敵對勢力報復並痛失了侄女。這次慘痛經歷多年來纏繞住Aiden，而其過去所犯下的罪行亦逐漸被人揭發，家人生命再次受到威脅。走投無路的Aiden決定來個絕地反擊，誓要為親人為自由向ctOS的幕後黑手進行一場轟轟烈烈的復仇。

故事聽起上黎夠哂引人入勝，但始終做駭客哩家野對一名良好市民黎講，一時三刻好難上手。所以預覽會當日，大會特別邀請到網絡紅人Eminleo即場為@肥狗仔@等一班駭客初哥黎個入門示範，Eminleo演示了遊戲的頭30分鐘。一開始主角會找殺害其侄女的參與者秋後算帳，過程可見時下流行的QTE及掩護射擊系統皆收錄於遊戲當中。至於遊戲的最大賣點駭客系統在起始點已經能夠使用，玩家只須按住"口"鍵拿出手機就能向目標進行入侵。關卡開始時玩家會被困於一個類似紅館的地方，可入侵的物件亦只限監視器。而遊戲中一些解迷(純開門)元素會要求玩家利用監視器視覺入侵其他同類的電子設施，繼而尋找前進的道路。以該關卡為例，有一個被眾多保安駐守的地方需要玩家通過，但正常情況下貿貿然走出去好大機會提早完game。哩個時候玩家只要拎起手機，hack入發電機就可以引發大停電，並趁保安能見度下降時乘機著草。

離開紅館之後，迎面而來係警報鐘聲傳至千里，大班警察駕駛戰車直衝過來。玩家嘅唯一希望就係與差佬展開飛車追逐戰。在演示中，Eminleo偷咗一部停泊跑車，此時任務目標與GTA無疑: "擺脫警察"。不同在於喺《Watch Dogs》裡面，所有警車都係"Need for Speed"，論你台車有幾快，佢地都有能力好似《Tample Run》嗰隻大猩猩咁追到你天涯海角。唔洗太擔心嘅，若果玩家哩個時候入侵交通燈或者設於馬路上嘅欄杆，就可以改變其方向指示造成交通混亂，阻止警車繼續前進。

飛車結束後，主角回老巢訓個靚覺，到早上終於可以體驗一下五花百門嘅駭客功能。講到尾《Watch Dogs》都係一部sandbox作品，大地圖﹑路人同埋碰碰車都係必須的，而本作聰明地以一部手機來避免玩家在GTA式的架構下迷失"方向" 因為就算係一般最常見的賺錢方法亦需要玩家變成"低頭族"。遊戲中的芝加哥貌似實行了"一人一機"政策，玩家在駭客系統下可以盜取絕大部份路人的個人資料，包括提款卡號碼，成事後可以到ATM處提款，仲方便過去借貸。

"Easy Money!"

除咗主線遊戲，支線任務及技能升級稱得上係家常便飯。在演示關卡中，其中一個支線任務就係到城內各處尋找將要犯罪的罪犯。到達現場後，玩家會發現"準犯罪者"會和受害人糾纏，而前者身上會顯示其犯罪指數，當指數到達100%時，罪犯就會犯案，此時玩家若果及時制止就得會到市民答謝，威望上升。相反，周街殺人會惹人反感，威望大跌。威望多少影響深遠，假設你係"萬人迷"，在街上開槍/犯事市民會隻眼開隻眼閉，而"犯眾憎"嘅玩家即使咩都唔做亦會有人舉報。對於鍾意做壞事嘅玩家可能會覺得相關設定極不平衡，其實開發團隊都冇意限制玩家的自由度，所以當有市民打電話報警時，玩家可以將之殺死或者用和平啲嘅方法上前將其手機搶過來，咁就無後顧之憂喇。玩家每做完一個任務後會得到若干技能點數，用以升級不同技能，包括擴大駭客手機的入侵範圍﹑ATM提款額增加等。

唔想下下偷車變"洲長"?你部手機幫到你~

上手後感:

整段演示十分過癮，不過齋睇片同親自試玩又係兩回事，會場就設有幾部PS4試玩台讓記者們深究一翻。玩上手@肥狗仔@第一感覺就係遊戲畫面冇想像中好。準確啲黎講應該話本身已經唔錯，但無奈始終本作第一段實機演示都係兩年前嘅事，現在達到次世代級別的遊戲已經為數不少，再睇翻《Watch Dogs》正式版畫面即使做到當初的高度，亦唔可能獨領風騷。不過與Ubisoft另一個王牌《Assassin’s Creed》相比，本作在開放式世界的層面上肯定落咗更多功夫。最明顯係途人唔再係"工具"而係反應豐富多樣嘅市民，無論在風和日麗定還是腥風血雨嘅情況下，哩堆NPC的動作絕對唔止幾道板斧，佢地會認真生活及社交，遇上突發情況走佬之餘亦會報警。當然珠玉在前，如果你問《Watch Dogs》與GTAV有冇得比，@肥狗仔@就覺得兩者側重點係背道而馳的。就玩家對待NPC的做法而言，前者會好明確通過威望系統告知玩家因果報應，後者只要大家夠勇那怕軍隊出動10分鐘後又一條好漢。

駭客系統無疑係本作的核心部份，喺整個試玩流程中玩家經常手機不離手，以運用駭客功能入侵唔同物件。但運用唔等於可以亂用，玩家要顧及萬惡的手機電池，每入侵一樣物件，電池就會因應入侵規模而扣減，去到冇電嘅時間會自動差電。電池由0%差到100%唔會花上好長時間，不過危急關頭時仍可致命。尤其是入侵交通燈哩類設施的耗電量非常高，初期玩家揸車甩警察喺哩種環境下絕非easy job，要全身而退，玩家除咗要hack交通燈之外，仲要留心邊條路多車等燈，否則好可能事倍功半。其實有關設計@肥狗仔@覺得並唔算討好，因為即使玩家唔留意路面伏況隨意"轉燈"，只要持之以恆亦總有機會阻塞警察去路。況且電池都係任用的，玩家"鳩禁"基本上得唔到任何懲罰，除非玩家駕駛技術不是一般的屎，因為遊戲中由普通汽車到超跑都媲美中國製造的東西，撞多兩撞就出煙。

飛車部份存在不平衡嘅地方，而一般的入侵解迷動作就顯然冇咁多漏洞。關卡一開始利用被hack的監視器視點再去hack另一個監視器的玩法還算得上有趣。查實有關的玩法過往都有出現過，如今用上"駭客"噱頭去包裝，做法穩陣而不失新鮮感。

當日嘅演示版內容只係冰山一角，歡樂嘅時光故然過得特別快。作為Ubisoft又一原創大作IP，《Watch Dogs》整體俾我感覺確係款品質優良嘅sandbox精品，只係部份遊戲設計仍然需要開發團隊繼續去深思改良。值得一提係縱使本作戲的中文版要等一個月先可以玩，但遊戲眾多元素包括駭客系統，任務分支都設計得簡單易明，即使英文再水皮嘅朋友也能應付自如。如果你對《Watch Dogs》有興趣，@肥狗仔@在此可以贈你一句: "早買早享受，遲買都唔一定平幾舊"。

*《Watch Dogs》英文版PC/PS4/PS3/X360版本現已推出，而中文版將於6月26日上市。

marcolau

我朋友玩左十幾個都剩係玩副線....所以應該有排玩。

lkljason

現場有無PS3同PS4畫面比較？
睇過其他地方既game評普遍都係麻麻地，無論畫面、遊戲性同load碟時間，講真中文版買就買硬架啦，係考慮買PS4定PS3版，考慮原因係如買前者就要跟機出，但暫時除左呢隻game外，PS4真係未有其它作品吸引我。如買親機只玩呢隻game，仲要一般既話，與其齋擺我寧願玩住PS3版選d有大作至買PS4啦！

@肥狗仔@

lkljason 發表於 2014-5-28 18:21
現場有無PS3同PS4畫面比較？
睇過其他地方既game評普遍都係麻麻地，無論畫面、遊戲性同load碟時間，講真中 ...

無啊，全程ps4,其實睇返外國對比圖，兩者分別有，但唔大，就係解像度同AO個問題。哩隻試玩完覺得唔太特別，暫時唔會為哩隻出機。
(Post76 Android 手機版送出)

lkljason

@肥狗仔@ 發表於 2014-5-28 18:57
無啊，全程ps4,其實睇返外國對比圖，兩者分別有，但唔大，就係解像度同AO個問題。哩隻試玩完覺得唔太特別 ...

收到！咁睇黎買PS3版算了！

marcolau

lkljason 發表於 2014-5-28 22:05
收到！咁睇黎買PS3版算了！

其實如果你對ONLINE不重視，亦唔急住玩，我會建議你等出機先買，因為 PS4 至年底都只係得幾隻GAME可玩。
而P3同P4兩者比較下，價錢相若，相信冇人會買PS3版。

lkljason

PS3畫面好似衰過GTA 5喎

marcolau

lkljason 發表於 2014-5-29 11:37
PS3畫面好似衰過GTA 5喎

咁又唔好吓吓GTA....
而加係咁架喇，尐過渡GAME係針對新機，而舊機唔會專注開發，純是降級版，求其有得你玩就罷。
而GAME本身又要就舊機，所以又唔會靚得去邊，因此哩尐過渡GAME係兩頭唔到岸。

kkwkk

但講真PS3版個晝面我覺得可以用核突去形容

海盜

畫面PS3 似PS2, PS4 似PS3,吹脹
(Post76 Android 手機版送出)