[走佬記] Denon 6800H 潛逃過境！

kelvinsin

各位燒友，等咗兩個幾月，終於拎到我心心念念嘅 AV 擴音機 —Denon AVC-X6800H！

一直以嚟我都係用開 Pioneer，由 LX76 用到 LX89，用咗成八年，部機除左功能outdated之外，真係冇乜可以挑剔，尤其系声音的解析度同人声。不過，佢唔支援 Dolby Vision passthrough，搞到近年買咗啲新播放器、新電視都發揮唔到，唯有忍痛換機啦。
當初見香港有舖頭做 promotion，大約HKD$15,000，我就即刻 search 下新加坡價錢，嘩——成 HKD25,000（約 SGD 四千幾蚊），咁嘅價錢喺香港差唔多可以買部A10H啦，於是就膽粗粗地下咗訂。仲專登買機票飛過嚟拎機！
諗深一層，不如順便帶埋屋企人一齊過嚟玩幾日，當係慳返落嚟嘅差價當盤川咁用，開心又實際。

第一日落機即刻去咗深水埗搞掂尾數。舖頭服務都唔錯，講明會安排司機兩日後送貨到酒店，幾專業。
兩日後司機準時將部機送到酒店 lobby。我返到去即刻搵 concierge 幫我送上房。成箱嘢好大件，我心諗：「唔知會唔會超磅？」
拎去磅一磅：22.9kg！啱啱掂，唔使加錢 check-in，真係驚險過剃頭，差啲以為要額外畀託運費添。


雖然冇喺酒店試機，但都忍唔住開箱 check一check：
Denon AVC-X6800H 主機（淨機就近 16kg，成箱幾乎都係佢）
背光遙控器
校聲咪
天線、電源線、說明書一大堆

機身採用黑色拉絲金屬面板，質感一流，Denon 做工真系唔错。
仲有嗰堆先進功能，支援15.4 聲道、內建Dirac Live可升級ART同Bass Control，呢部機未來幾年都絕對夠打。

旅遊小插曲
星期日專登去咗旺角行下，點知大部分影音舖頭都冇開門，原來好多鋪都唔做星期日。想探舖、格價、傾升級配搭嘅朋友，記得唔好安排喺星期日去旺角，真係會失望。
友誠商業中心幾間鋪仲有開，但基本上冇乜人流，靜悄悄。唔怪得近年成日聽人講：AV HiFi 呢個圈愈嚟愈靜，就算係旺角最旺嘅地段，同我十年前嚟香港個時比，真係差好遠。
加油呀香港，我唔想過多幾年連埋啲靚鋪都執晒，到時嚟香港都冇得親身試機、格價、交流，真係會好唔捨得。

今朝啱啱返到新加坡，放低行李都未抖夠，已經忍唔住即刻 set 機！




簡單 calibrate 咗一輪，試播幾段熟悉嘅片段，一出聲就知——真係幾條街嘅分別！
低頻下潛更深，人聲定位清晰，環繞聲效果包圍感強得多，聲音控制力都提升唔少。

十年河東，十年河西，由 LX89 跳到 AVC-X6800H，真係跨咗整整十年。科技進步喺影音器材上面嘅體現，真係聽得出，感受得到！

寫住咁多先，遲啲有時間再慢慢整理埋使用感想同實際聽感，到時再同大家詳細分享！