愛爾蘭IMAX首映特別場《職業特工隊：最終清算》觀後感

陳永仁

我早兩星期前（5月15日）就已經同老婆喺愛爾蘭睇咗《職業特工隊：最終清算》（Mission: Impossible- The Final Reckoning）嘅IMAX首映特別場。近排生活實在太忙碌，搞到我今日先得閒寫篇觀後感。

第一集《職業特工隊》（Mission: Impossible）喺1996年面世嘅時候，Tom Cruise先33歲，我仲只係一個手抱嬰兒。嚟到第8集— 《最終清算》，據聞係本系列嘅最後一集，Tom Cruise已經62歲，我都結咗婚好幾年、下年都正式步入中年。唉，真係歲月摧人啊！

我第一次接觸呢個系列，應該係我讀中學四年級嘅時候。當時第4集，亦即係《鬼影終章》（Ghost Protocol）喺2011年年尾啱啱上畫，我就約埋同學一齊入戲院睇。由於我對第4集頗為欣賞，之後都一口氣買碟睇番晒頭三集。事隔四年，即係2015年，第5集— 《叛逆帝國》（Rogue Nation）正式上畫，我當時已經讀完中學、投身社會工作。回頭一看，第5集已經係我最近期喺香港嘅戲院觀賞嘅一集。之後第6集— 《叛逆之謎》（Fallout）推出嘅時候，我已經喺英國謀生。當第7集— 《死亡清算上集》（Dead Reckoning Part One）、第8集— 《最終清算》相繼喺2023年、2025年上映，我已經結咗婚、移居愛爾蘭。

蘿蔔青菜，各有所愛。若果要我按照個人口味去排晒咁多集嘅，我會咁排：6>3>5>1>4>2>7>8。

第6集係我最喜歡嘅一集，亦都係唯一一集我喺戲院觀賞超過一次。個人認為，第6集無論喺演員嘅演出、故事、拍攝手法、剪接、動作場面、配樂，都係全系列嘅顛峰。可能我太鍾意第6集，以致喺兩年前入場睇第7集嘅時候因為抱住太大期望而感到大失所望。第7集製作過程極為艱鉅，因為風土病，導致拍攝不斷受阻，由2021年嘅檔期押後到2023年暑假先有得喺戲院重見天日。即使品質同期望有好大落差，我都冇太多投訴。一波未平、一波又起，第8集拍攝嘅時候，電影工會又咁啱搞大擺工。本來Tom Cruise 登六之前，成個系列就可以完滿結束。世事有時就係冇咁完美。

原本今集叫做《死亡清算下集》（Dead Reckoning Part Two）。由於第7集票房太過強差人意，係第4集以來第一次全球票房低過6億8千萬美金，亦都係系列首次蝕大錢。電影公司信咗邪，死死聲確係唔老黎，索性棄用原本定下嘅片名，改為《The Final Reckoning》，仲將第7集嘅片名刪去「Part One」。個人認為，第7集嘅票房出師不利並唔可以完全賴晒Christopher Nolan嘅《奧本海默》（Oppenheimer）同 Greta Gerwig嘅《芭比》（Barbie），因為真係拍得差。Christopher Nolan係當今荷里活最揾得錢嘅導演，佢嘅威名已經足以同仼何A級電影系列製作匹敵。《芭比》雖然唔好睇同非常左傾，但至少男、女主角都係正常性取向嘅靚仔白人、靚女白人，總算冇「掛羊頭，賣狗肉」，同觀眾嘅期望冇太大落差。第7集死因係前作水準太高，導致粉絲們期望過高而有點心灰意冷。

Christopher McQuarrie絕對係Tom Cruise呢十幾年來最親密嘅戰友。未接手做本系列導演之前，已經為第4集嘅劇本出謀獻策。第4集喺口碑同票房都有亮麗嘅成績表後，Tom Cruise再試水温，俾機會佢拍由自己主演、成本平一倍以上嘅《烈探狙擊》（Jack Reacher）。結果，《烈探狙擊》叫好叫座，不負所望。從此，Tom Cruise對Christopher McQuarrie 信任有加，索性委以重任，正式俾佢接手做《職業特工隊》第5、6、7、8集嘅導演。除此之外，仲俾佢做埋自己苦等咗36年嘅《狀志凌雲：獨行俠》（Top Gun: Maverick）嘅監製同編劇。


原本以為《死亡清算上集》已經見底。點知，《最終清算》仲要變本加厲、將上集嘅缺點發揮得淋漓盡致，仲要製造更多連上集都未產生嘅問題。雖然《死亡清算上集》犯了不少毛病：序幕拍得太差、俄軍竟然講英文、太多無謂嘅對白、Rebecca Ferguson戲份太少、Hayley Atwell個角色太過無厘頭，至少都有唔少亮點：至少有Rebecca Ferguson同Vanessa Kirby兩位靚女、Tom Cruise同隊友們都仲有些少互動、幾場動作戲都拍得幾肉緊、配樂仍然係來自Hans Zimmer班底嘅Lorne Balfe。

相比之下，《最終清算》真係有點慘絕人寰。冇咗Rebecca Ferguson已經夠慘，連Vanessa Kirby都冇埋影，就真係欲哭無淚！唔係話Hayley Atwell唔好，但佢個角色嘅動機由始至終由上集到今集都冇乜說服力，更加冇Rebecca Ferguson、Vanessa Kirby、甚至喺第3、4、6集飾演Tom Cruise老婆嘅Michelle Monaghan所帶來嘅情緒牽動同化學作用。臨上映前幾星期，再換走上兩集嘅配樂Lorne Balfe，搞到今集嘅配樂失色不少。係咪嫌上集啲對白唔夠多？上集係多口水，但都未至於太控，今集竟然顛到為咗夾硬俾每一個新加入嘅演員有演出機會，就算當中有幾多角色係有幾咁無關痛癢都好，個鏡頭都會好似「點指兵兵」咁不斷影向佢哋講啲根本明明可以用幾隻字就可以交待到嘅對白，真係轉到我頭都暈！頂！我入場係睇Tom Cruise㗎！冇靚女睇已經夠慘，你仲要塞咁多冇存在價值嘅角色，想點吖？刻意擺咁多黑人臨記、女機師角色、仲要夾硬將喺第6集已經出現過嘅Angela Bassett做首個美國黑人女總統，咁硬銷「多元」法，真係好出戲喎！

或許，一開始喺上集用人工智能做第一反派，已經一個極大嘅錯誤。《職業特工隊》呢個系列好睇嘅地方，除咗Tom Cruise嘅演出同亡命特技、仲有靚女，最重要嘅就係以人為本。用人工智能作反派，已經嚴重偏離令本系列成功嘅要素。飾演第3集嘅反派嘅已故金像影帝Philip Seymour Hoffman被譽為全系列最令人心寒嘅反派，除咗佢精湛嘅演技同優良嘅角色塑造，最重要嘅係，佢係一個活生生嘅人。第4集嘅反派—已故瑞典影帝Michael Nyqvist飾演嘅可能係全系列最卡通化嘅反派，但就係因為佢係一個人，所以先仲有鎮攝力。《職業特工隊》唔同《未來戰士》（Terminator）等科幻片，就算故事情節再誇張，風格一向都偏向寫實。即使《未來戰士》系列嘅反派係人工智能，都會實體化整啲人形嘅T-800、T-1000去追殺主角們，觀眾先睇得肉緊。《死亡清算上集》、《最終清算》嘅人工智能大反派實在太虛無啦！

我明，本系列有至少兩集都係講Tom Cruise點樣阻止恐怖分子去用導彈毀滅人類。下下都玩攔截各式各樣嘅導彈，的確係好冇癮、好冇新意。坦白講，有時墨守成規都未必係壞事，至少唔會偏離成功之道。有好多富二代、富三代就係太多諗頭，搞到家族百年基業雞毛鴨血。

我相信如果Christopher McQuarrie 安排呢兩集飾演第二反派Esai Morales用最簡單嘅方法飾演最傳統最刻板印象嘅反法同Tom Cruise由頭到尾鬥過你死我活、將佢地之間三十年來嘅新仇舊恨作為重頭戲，效果一定會好過連續兩集用人工智能拖泥帶水。反正《死亡清算上集》都有幕講Esai Morales殺咗Tom Cruise條女㗎啦，既然有咁嘅鋪排，點解唔好好發揮呢？

我喺度都要為Esai Morales平反一下。冇錯，佢喺結尾真係死得好滑稽。雖然佢係全系列最高齡嘅反派，連Jon Voight拍第一集嗰陣都後生過佢。佢都唔弱吖，至少連續成功殺咗Tom Cruise兩個紅顏知己、一個做咗三十年嘅好兄弟，戰功彪炳吖！

講到拍足八集都唔爛嘅大片系列，恐怕只得《哈利波特》（Harry Potter）。其實《職業特工隊》系列都算係咁㗎啦，對比起已經病入膏肓嘅《星球大戰》（Star Wars）、《狂野時速》（Fast & Furious），已經⼀啲都唔算失禮。話雖今集喺唔少人心目中都係全系列最差嘅一集，但並唔係冇亮點㗎。要讚嘅，當然唔少得Tom Cruise 喺飛機、潛水艇嗰兩幕嘅驚心動魄嘅亡命演出、Rolf Saxon有血有肉嘅回歸、Henry Czernzy嘅奸猾、老柏檔Ving Rhames同Simon Pegg嘅演出。即使《最終清算》嘅問題再多，作為支持咗呢個系列成廿九年嘅粉絲，真係好應該買飛入戲院支持呢集最終章。錯過喺戲院睇今集嘅機會，恐怕日後都再冇機會喺戲院觀賞到真正嘅《職業特工隊》電影。

「前無古人，後無來者」，好似Tom Cruise咁置生死如度外去娛樂觀眾嘅荷里活動作巨星，已經後繼無人。即使本系列若干年後再換人再重拍，都無法取代到Tom Cruise。Ethan Hunt只得一個，就係Tom Cruise。

評分：65/100

Logan