|
|
樓主 |
發表於 2024-10-25 08:29
|
顯示全部樓層
昨晚好開心, 可以睇到一個圓夢的演唱會.  『工藤静香●「明鏡止水〜piece of my heart〜」Concert Tour 2024 in Hong Kong』  靜香31年前來香港開SHOW時小瑟仲好細個, 基本上都唔可能有錢去睇 "演唱會" 呢樣咁誇張既野, 更加可以講 ... "演唱會" 呢三個字, 對於自己來講係一個唔關我事既字眼!!!!!  所以以前都係只可以去信和租LD來睇, 當時仲記得小瑟已經霸左屋企個廳玩AV, 一部SHARP 29" TV, 一部KENWOOD既AV AMP, 一對B&W座地前置喇叭, 一對唔知係邊度買返來, 鐵做既後置喇叭. 當年連中置都冇錢買, 不過當年DOLBY PRO-LOGIC已經可以玩到 SURROUND, 咁就由佢照玩. 
就係因為咁, 好多靜香當年既演唱會都係靠呢個組合比到我的 !!! 仲好記得當年第一隻買的時 intimate 專輯, 當年聽歌一定係成隻碟聽, 由頭聽到尾, 最初以為佢唱慢歌為主, 因為見佢d唱片封面都楚楚可憐咁, 點知一買隻碟返去聽, 成隻碟都係快歌多, 仲要好上口, 節奏好正 , 加埋佢把聲真係冇得頂 !!! 當年佢同「後藤次利」合作無間, 而由「後藤次利」合作的歌都真係好好聽, 聽到依家都仲係好好聽呢. 就係咁...... 靜香就係小瑟第一個喜愛的日本歌手 , 有時都真係自己都估唔到的. 因為當年「中山美穗」都好勁的, 唔知大家有冇同小瑟一樣, 都覺得當年佢地二個就好似香港的「譚詠麟」同「張國榮」咁呢???
講返尋晚個演唱會, 開始時都估到, 外國歌手準時開SHOW, 最多得2小時呢D情況了 . 果然不出所料, 8:00真係準時, 係真係好準時的就開始, 靜香一出來大家都好開心, 小瑟坐個位唔算好前, 地下中間既位置左右, 我坐MM行, 大家可以估到由 AA去到MM係第幾行了!!! 不過都冇問題, 有得睇已經好開心.  現場見到好多歌迷, FANCLUB等等. 小瑟不嬲都係宅仔一名, 一直都冇參加呢D會的, 所以見佢地咁開心其實鄧佢地開心已經好夠. 靜香一出場全場即時企起身, 大家都好開心, 情緒好高漲. 不境都等左佢 31年先再來. 上年佢去台灣開SHOW冇香港份, 心諗唔知會唔會唔再來. 好彩係2023年既影音展見到唱片公司(KCM Productions) 老友Keyman, 佢已經暗示左今年會有機會, 所以都知知地我地香港係有機會的呀! .
之後幾首新歌之後, 一起音樂「メタモルフォーゼ」大家即時起哄, 興奮起來~ 再去到「めちゃくちゃに泣いてしまいたい」果份感染力, 所有既回憶都返哂來, 真係想喊出來呀!!! 好感動, 真係好感動, 有小小回首之前細個後生時追佢既CD, LD, 睇錄影帶既感覺. 果一刻自己同自己講, 呢張門票抵呀, 可以真係有機會現場睇到靜香即場唱出呢首歌, 真係冇得頂, 冇野可以再講了!!!!
去到有個位好好笑, 我地一直都係企係度架麻, 唱左幾首歌之後, 靜香用英文叫大家可以坐返低, 我用我唔太識聽英文既耳仔好似聽到佢話 : 大家年紀都有返咁上下, 唔好企咁耐了!! 果一刻真係好好笑呀, . 現場的確係好多都好似小瑟咁, 又或者比小瑟更大的都一同跳跳唱唱. 其實都真係明顯感覺到我地呢D年紀同依家後生果D去睇D新既歌手演唱會既FANS力量真係好唔同, 我地就算想嗌, 持久力一定冇D後生咁好呢~ 當然場中有D朋友好勁, 又識日文, 又嗌爆全場, 但以小瑟既體力就已經去到咁上下, 所以依家小瑟都係開開心心享受就好了!!
去到大既9:30分左右, 靜香都唱左18首歌, 一半新一半舊咁啦, 可能有好多朋友都想佢再唱多D的, 的確係如果可以再唱多2首去到10:00會更開心的. 不過其實當刻已經好滿足了, 因為一直以來, 小瑟都冇諗過自己仲有機會可以現場聽到靜香唱歌, 仲係唱返當年小朋友時自己好傻地追偶像時喜歡的歌曲. 呢刻真係唔係用錢買得到的. 而且都知道佢依家有二個乖囡囡, 有個錫佢既老公(起碼木村應該唔會打老婆囉!! ), 其實都好鄧佢開心. 我唔夠膽講佢未來仲會唔會來香港開SHOW, 我都相信如果 FANS支持佢係會考慮的. 不過以我所知, 依家佢做佢二個囡囡的經理人既角色都已經好忙. 所以仲有冇呢個心情同時間去開SHOW真係唔敢講. 但點都好, 昨晚雖然小瑟係第一次自己一個人睇演唱會, 但呢個體驗係好難得, 又好開心的!!! 再次多謝香港主辨單位 G Music, 老友Keyman送我超大海報. 多謝靜香在2024年10月24日晚, 比左小瑟回到30年前, 一個的喜歡偶像時的小伙子心情可以再次重溫一次. 好開心了!!!
#場中係唔可以影相
#雖然我見到好多人都有影
#但我地知道日本藝人都唔喜歡的
#所以我地會尊重
#這就是一個fans應該做的東西
昨晚的歌單(copy自facebook group : https://www.facebook.com/share/g/E9a7VK74ptzp9rd1/)
1 I am ready
2 Boo
3 メタモルフォーゼ
4 Again
5 NIGHT WING
6 めちゃくちゃに泣いてしまいたい
7 アイスコーヒー
8 香雪蘭~好きより愛してる~
9 勇者の旗
10 慟哭 感受ver.
11 Blue Rose
12 Go easy!
13 Jaguar Line
14 Blue Velvet
15 第3惑星
16 恋一夜
17 嵐の素顔
18 霙
|
本帖可能會有更多會員優先看的內容
您需要 登入 收看或下載更多內容。還未成為會員？成為會員
x
評分
-
查看全部評分
|
一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台
發表於 2024-9-16 14:27
