PS VR2 初體驗分享

issachar

PS VR2 初體驗分享... 長文慎入!!

首先原諒我真係山洞原人黎, 之前接觸過既 VR 就祗有 PS VR 初代... 同埋早幾個月0係電腦展玩過 VR 射恐龍 😆

對於 VR 我一直係好期待既, 但係因為覺得 low end 應該滿足唔我既高要求, high end 又唔捨得買, 所以咁多年一直都係得個諗字...

早幾年 PS VR 一出就買黎玩, 第一次玩 VR 最深體驗係...... 好L暈 😂
礙於 PS4 機能關係, PS VR 帶比我既體驗唔算好, 果時我記得玩 30 分鐘已經暈到要停... 但係第一次玩 VR 真係覺得正既...

而早幾個月0係電腦展玩射恐龍, 我感覺佢 hardware 都幾雞下... resolution 好低, 個 headset 視角都差... 不過係覺得好玩既....

原本我有諗直播開箱, 但係因為好耐冇做直播關係, 我 d 架生擺埋左一邊需要時間搵同起返個壇... 其次我一向唔出樣, 所以直播 VR 呢件事又好似唔太可行... 三來我心急想玩... 所以就放棄左直播呢個念頭...

好喇, 講返正題... 相信對 PS VR2 有興趣既網友都應該睇哂好多開箱同 review, 所以我唔多講... 以一個用家既角度黎講, PS VR2 既設定非常簡單, 首先如果你係買左 Horizon Call of the Mountain bundle 的話, 首先一定係入左個 code download 隻 game 先! 因為隻 game 50GB 所以下載需時! 然後就係唔駛戴個 headset 住... 將 headset 條 USB C 插落 PS5, 部 PS5 detect 到 VR2 就會彈指示出黎教你點樣 setup.... 然後用跟黎另一條 USB A - C 線用黎 pair 返對 Sense Controller, 硬件就完成左! 回想起 PS VR 果堆野... 唔慢慢睇 manual 真係冇乜可能 set 到... 😂

戴上 headset 之後, 重唔重呢? 506g 戴上個頭係有少少重量, 不過你戴得好的話, 好快就適應. 然報跟住指示做返眼球距離較正, 跟住就係做 eye tracking 設定... 最後就係 room calibration, 如果地方細唔可以走動, 仲可以 set 坐0係度玩! 而 PS VR2 其中一個賣點就係個 headset 有鏡頭, 0係唔需要除低個 headset 既情況都可以睇到四圍環境. 當做 room calibration 既時候, 佢會要你四圍望, 同時你就會透個鏡頭見到個 headset scan 緊你間屋邊個位置, 我覺得呢個 AR 功能非常之咁型! 仲攪到我突然間勁期待 Apple 個 AR headset 添!

Scan 完間屋之後, 佢會再叫你做地板既 calibration... 如果你發現佢 detect 地板唔正確, 佢叫你輕輕用個 Sense Controller 掂下個地板.... 攪掂就會叫你 set play area. VR2 要求最少 1M x 1M 既地方就可以玩到, 我覺得執開 d 野玩都要, 因為個 VR 體驗正好多... 個 room calibration 有趣既地方係佢會分辨到地板上面有乜野係雜物, 咁果 d 地方就唔比你用黎做 play area 喇.... 然後用個 Sense Controller 射下射下就可以加減個 play area 既大小.... 最後如果你好似我咁真係唔夠地方, 其實都可以 force config 個 play area 既, 但係就要自己小心撞到野喇...

終於可以入 game 喇... 到底 PS VR2 所謂 4K OLED 係咪真係咁正?
我好直接答你, 唔係正咁簡單, 係真係好L正!! 但係因為我本身冇玩開 VR, 所以講唔到 PS VR2 同市面上既 VR 分別0係邊... 玩左 Call of the Mountain 大概半個鐘, 最正既地方一定係我祗有好輕微既 motion sickness! 要強調真係非常非常輕微! 同我幾年前玩 PS VR 既體驗完全唔一樣! 個 Dual Controller 可以做用少少 finger detection 既, 不過就唔會比你舉起中指囉 😂老實講真係好過 VR 一代果對珍寶珠好多 😂

最後當然要講下我覺得 VR2 唔好既地方... 首先我覺得都係礙於 PS5 機能關係, 玩 Call of the Mountain 既時候有時個視角係會縮窄既... 我唔知多唔多 game 係咁, 不過我覺得大家應該將個期望唔好 set 到咁高... 因為玩 VR 見到咁多黑邊... 又真係幾奇怪既... 另外條 USB C 線係固定左0係個 headset 度, 我諗可能因為唔想你郁既時候整甩左? Anway 即係唔可以換線... 最後係 Dual Controller 個叉座要另外買... 誠惠 $398... 個座既好處係可以無線叉電, 同埋你對 Sense Controller 從此唔會四圍碌囉 😂 不過我唔明 2023 年點解個座仲要用火牛而唔係用 USB C 呢? 而說明書上面話如果對 Sense Controller 冇哂電, 1.5 小時就會叉滿.

以一個貴過部 PS5 既價錢去買 PS VR2 值唔值得呢? 我個人相信 SONY 呢次會重視軟件方面開發, 暫時好似已經確定左 90 隻以上既 game? 加上我覺得好多現有既 VR game 都會 port 返去 VR2 度, 所以我相信呢 5K 野係值得比既.

由於試既時候太短, 所以暫時打住咁多野先... 如果有野想問就留言啦 👌🏻

原文都 post 左0係 Facebook page 度, 有興趣既大家去睇下

PS VR2 初體驗分享

Giogio

不能睇3D藍光就不考慮了

SteveAnder@FB

Giogio 發表於 2023-2-28 14:31
不能睇3D藍光就不考慮了

如果用黎睇4K Blu Ray 碟電影.. 效果如何 ?.?

成龍大哥

SteveAnder@FB 發表於 2023-2-28 14:39
如果用黎睇4K Blu Ray 碟電影.. 效果如何 ?.?

都係得1080p嘅畫質,唔算差,但同4K電視比較係有些距離....

rach

我都想知vr2可以睇碟睇串流嗎? 可以玩非vr game嗎? 畫面大概等於幾多寸電視? 可以駁电脑用嗎? thx!☺️

issachar

rach 發表於 2023-3-2 02:38
我都想知vr2可以睇碟睇串流嗎? 可以玩非vr game嗎? 畫面大概等於幾多寸電視? 可以駁电脑用嗎? thx!☺️ ...

駁住 PS5 可以打普通 game, 畫面唔係好大囉, 除非冇電視否則我唔會咁樣用

聽講可以駁到 ATI display card 但係因為冇 driver 乜都冇, 好似出得 480P 畫面, 同埋我覺得 official 唔會支援駁 PC, 要靠 3rd party 做

成龍大哥

Call of the Mountain 的確好正,本人好易暈都驚玩唔掂,但見有DEMO都試玩下,但竟然又冇咩頭暈而且畫面同玩法都好正,最後都俾錢買左玩,真係好正,VR果種所謂沉浸感完全同電視玩唔同,特別如果你有畏高症就更過癮!

issachar

成龍大哥 發表於 2023-3-16 01:50
Call of the Mountain 的確好正,本人好易暈都驚玩唔掂,但見有DEMO都試玩下,但竟然又冇咩頭暈而且畫面同玩 ...

Call of the Mountain 擺明係要黎做示範, 所以 optimization 做到非常好