聲控車用 PAPAGO GPS ... 測試報導 (轉載)

wil-wil

轉載自 蘋果日報 2010 年 3 月 2 日網上副刊汽車版


記者：趙慧敏     攝影：梁細權     Model：阿草

喺手機都可以有埋 GPS 嘅年代，你可能以為，要另置嘅車用 GPS 到了要淡出嘅時候，不過生產商當然唔會坐喺度任人砌，提升功能似乎係一大出路，「出口術」可算係最新一招。以前要慢慢寫低要搵嘅位置，家靠把聲就可以幫你搵目的地，究竟全港首部聲控  GPS 有幾聽話？

iPhone 料齊，但準確性仍有提升空間。

手機導航抗衡有計
GPS 易受天氣影響引致訊號中斷，而手機嘅上網加 AGPS 定位就可彌補呢個缺陷，現時不少手機已內置地圖圖檔，資料詳盡。缺點係螢幕偏細，更無聲音導航，行車時使用其實有點不便，而且上網當然要畀錢啦，所以使用時最好留意 AGPS 嘅數據流量，用得多條數亦好襟計。除咗導航，附加娛樂或者實用性資訊都係一大發展方向， iPhone「關你車事」嘅 App，結合 Google Map，利用 AGPS 協助定位，算係近期話題之作。雖然未有導航，但就有可以喺行車時提供泊車、油站同服務三類型資訊，連車壇消息同新車介紹都有埋，資訊齊全，只係部份指示似乎仍有錯漏，特別係新界區街錶位置資料較亂。不過實用性始終值得一讚。


PAPAGO 聲控 GPS 售價：$3,380


兩秒回應
PAPAGO 算係市面上熱門嘅車用 GPS 品牌之一，今次新推出嘅 R6600 型號，就創先河利用聲控技術，用口講就可以幫你搵路。既然係招牌賣點，當然就係首個測試要項。先以筲箕灣為起點，前往海洋公園。當讀出海洋公園後，唔使兩秒，導航就自動彈出多個選擇，包括海洋公園及海洋公園停車場等多個地點，反應同準確性都相當不俗。確定後導航便正式開始，由筲箕灣經東區走廊進入香港仔隧道，沿海洋公園道到達目的地。一路指引尚算清晰，不過期間定位系統曾出現突然失效嘅情況，心諗：「部機咁流？」停埋一邊急急向代理查詢，原來係因為近排香港天氣潮濕到爆，雲層又厚，有機會影響定位效果。如果行車時遇到呢個情況，最好停埋一邊先，好快就可以重新定位。


聲控步驟

1. 揀聲控標誌，講出目的地。


2. 可再細緻選擇具體位置。


3. 路線即時彈出。


新系統可以識別你身在橋底定橋面。



識「點」唔識「路」
跟手轉地點走一轉九龍，考驗一下系統嘅穩定性。目的地揀尖沙嘴中間道，對住部機講咗幾次「中間道」，都無反應？又要急急求救，代理指點迷津：呢個聲控系統係以景點又或者預早設定嘅位置為基礎，單單用街名，聲控就未必可以幫到手，要用番手寫功能又或者講出該路段上嘅建築物名稱就可以。結果，我轉講「中間道停車場」即掂，了解咗之後似乎更幫到手。 GPS 話咁快就幫我設定好行駛路線，要過海，仲彈出幾條不同隧道任我揀，唔似其他 GPS 幫你揀定隧道，至少導航之餘，司機都可以有個選擇。

整個導航過程，系統都以 3D 及 2D 圖像顯示， 3D 圖像明顯較能識別建築物，唔怕搵錯地方，不過要睇整體道路情況，都係用番 2D 清楚啲，最難得係橋上橋下位置，導航都可以清楚分辨。抵讚嘅仲有呢部機獨門嘅 TTS街名語音導航，唔少導航淨係識得叫你「左轉」或「右轉」，有時真係唔知有無轉錯， TTS (text-to-speech) 會喺每次轉彎時，話埋你知將要進入嘅街道名稱，咁你就包無轉錯啦！不過，喺系統指示轉線時，模擬畫面往往顯示路中線位為實線，但實情卻係虛線，個人就覺得唔多妥喇，如果可以改善就更加完美喇。


司機可自選隧道，唔使一味被「點」。


實線都教人轉線，改善吓較好。


測試結果
試點 1：海洋公園 ~ 系統即時識「聽」，迅速提供到指示。



試點 2：中間道 ~ 唔識「聽」，要講明係中間道停車場。

juniorx

係日本GPS幾年前已經可以在大城市中心地帶顯示停車場有無位, 邊度塞車, 龍尾去到邊...香港運輸署識得駁個CCTV上網...