《家和萬事驚》︰計時炸彈大爆炸

粗人敵卡 · 發表於 2019-1-25 22:29

呢套戲本身就好少宣傳，我就無意中於網上討論區見到有人討論呢套戲上映。而套戲有吳鎮宇做主角，而就因為呢位金馬影帝我買戲飛入場睇睇。

呢套戲由張達明舞台劇改編而成，當然張達明身兼編劇同演出。而故事就講述吳鎮宇、袁詠儀一家人供緊樓，一家大小經常為生活大小二事吵架，而每次吵架會因為家裡窗外的維港海景而得到暫時平息。但是古天樂搬來他們對面大廈的天台屋，並喺天台屋興建一個大型廣告牌遮住吳鎮宇一家的海景，吳鎮宇一家人終於忍受不了同古天樂大鬥法。

電影內容相當貼近現時香港社會狀況，例如吳鎮宇飾演的偉文乃一名劏房中介，側面描寫現時樓價高企，市民被逼租住劏房安居。而吳鎮宇戲中聲稱自己一家算是「中產」，只是他們所住的單位還有二十年才供斷。戲中配角例如林雪、黃秋生等相當搶鏡，林雪做嘅豬肉佬鄰居角色惹笑，他煮飯時發出噪音影響吳鎮宇一家，妻子袁詠儀登門理論的對手戲充滿火花。黃秋生飾演的政府官員係吳鎮宇相識，而吳鎮宇為了清拆對面廣告牌請求他幫忙。當然吳鎮宇找上政府各部門，但個個部門你推我讓未能解決廣告牌問題。劇情叫做偶有沙石，譬如吳鎮宇兒子吳肇軒相當巧合地拍攝古天樂收取廣告牌酬勞的相片，疑似影射城市論壇的情節有點兒胡鬧。女兒蔡頌思支線略嫌誇張，同時角色熱衷網戀有點不合常理。只有吳鎮宇、袁詠儀與張達明飾演的爺爺角色叫做有可取之處，袁詠儀為供樓節省開支，對周遭環境不滿瀕臨崩潰邊緣。吳鎮宇為家庭而對所有事逆來順受，到中段於工廠大廈劏房單位爆發一幕演出有神采。張達明有一段戲相當感人，係吳鎮宇帶他去街邊散步，達明提議他兒子吳鎮宇推自己落河已減輕家庭負擔，可笑又可悲。

套戲到了後期猶如計時炸彈終於被引爆了，由於吳鎮宇一家用盡所有合法手段亦未能令古天樂即時清拆廣告牌，他們決定用非常手段。而最後結局雖然瘋狂，但算是合情合理，聽聞大陸上映版本與香港上映的有所不同。

總括而言，家和萬事驚算是不過不失，鐘意睇港產片可以入場觀賞。