[劇透]《未來的未來》︰穿越時空的少男？

粗人敵卡

小弟不才，只睇過細田守導演嘅兩套戲《穿越時空的少女》同《夏日大作戰》。而今次入場睇呢套動畫，又係因為細田守個名。

動畫故事好簡單，純粹係主角小君因為屋企嚟咗個「新成員」妹妹，跟著小君妒忌妹妹未來而發生的故事。開頭小君為咗某件事而發佢妹妹同屋企人脾氣，之後跑到去屋企棵樹後怪事發生，而動畫就開始有趣起來。小君因為棵樹，可以穿越時空瞭解身邊家人的過去同埋自己的未來。啱啱小君見到嘅「陌生人」有少少突兀，但到咗嗰個人身份揭曉嗰時會令到觀眾會心微笑。而之後小君覺得父親因為工作冷落自己，又去到棵樹度，佢喺棵樹度遇到神秘少女…神秘少女係邊個自己入場睇。

棵樹嘅設定係幾有趣吓，可以令小君遇到來自未來過去的家人，又可以穿越時空。而小君穿越時空嗰陣同家人的互動，相當溫情。到咗後段小君到咗未來，喺未來東京車站迷路的段落係成套動畫最精彩的一幕，畫面同情節充滿著奇想，亦係成套動畫最令人驚喜的情節。但有一點可惜就係穿越過去，遇見以前家人的篇幅描寫有點單薄。小時候小君母親的性格行為，福山雅治配音的年輕曾祖父的劇情略嫌有點唔夠喉，小弟覺得可以畫多啲，講得詳細少少。仲有情節與情節間的過渡做得唔係咁好，令到成套動畫有啲散修修嘅感覺。

套動畫會令大人回憶自己小時候與家人相處片段，同時會想起現時照顧小朋友。而入場觀看的小朋友又會諗起依家同父母兄弟姐妹相處發生的趣事，係一套老少咸宜的動畫。

alleelarry

粗人敵卡兄，有無得去屯門英皇，用到買一送一優惠呢？

阿定

好睇呀！戲入面間屋的設計好正，最尾地鐵站有好多細節野，Get到的話就知有好多大道理

粗人敵卡

alleelarry 發表於 2018-8-26 19:47
粗人敵卡兄，有無得去屯門英皇，用到買一送一優惠呢？

我係去凱都睇
答唔到你

粗人敵卡

阿定 發表於 2018-8-26 20:09
好睇呀！戲入面間屋的設計好正，最尾地鐵站有好多細節野，Get到的話就知有好多大道理 ...

地鐵站嗰度可能會嚇親小朋友…

Raphael

睇完，覺得麻麻地，有啲悶
個人覺得最好睇係曾外祖父嗰段

alleelarry

粗人敵卡 發表於 2018-8-27 06:43
我係去凱都睇
答唔到你

純粹提下你附近有優惠

粗人敵卡

alleelarry 發表於 2018-8-28 14:18
純粹提下你附近有優惠

小弟會錯意
sorry...

mike384

睇左, 整套片都OK啦.
不過呢種廣告味重的原畫就一般般, 尤其係近乎唔打影的作風.
家族大樹呢個設定幾有趣, 令我諗起Interstellar入面主角屋企個書櫃.
美術嘛, 呢個其實都睇個人喜好, 對我而言, 比起謝謝你, 在世界的角落, 或你的名字都好, 就有少少遜色.