真金白銀買嚟試系列之- Apodidae OCXO switch

vegetable

由於唔識得代理，亦冇朋友會無啦啦攞嘢畀我試，唯有自己um荷包做個真實用家同大家分享吓。以下係Apodidae喺我套cheap cheap系統嘅絕對主觀聽感。

本來以前都好懷疑switch係咪真係有啲師兄講到咁勁，近期身痕學人用PPA v2 switch, 發覺又真係令套CAS 啲音色順滑好多，聽Tidal特別係流行曲冇再咁粗聲，不過可能係我對JBL 4307嘅問題，啲聲總是有啲尖。近來見到大家咁熱烈推緊隻Apodidae switch, 本來覺得佢成隻蟹咁無乜好感，但係去到九展AV show見到真身原來係好細隻，幾靚仔做工又扎實。於是膽粗粗WhatsApp代理，落訂幾日有貨到科埋尾數，好快順豐就到。

第一時間開箱駁機換走隻PPA， 一開聲，個心即刻離一離：唔L係掛？咁嘅聲都有人推？蒙查查，音場窄，唔通呢啲就係師兄所謂嘅濃味？當下諗，不如嚫佢仲咁heat放咗佢...?

就俾啲耐性，開住隻Altair播Tidal，7 x24狂煲佢。代理WhatsApp問我聽感，我都唔係幾好意思講。

煲咗廿幾個鐘再聽。嘩，咩事，邊個攪過啲嘢？唔同晒嘅？之前好窄嘅音場撐開咗，令本來好蒙嘅聲變得清晰咗，高咗分離度，開始聽到啲蒙聲其實係厚潤嘅聲之前黐埋咗。嗱，咁先算係濃味吖嘛！原來呢隻雨燕係一定一定一定要煲！

我原本隻PPA v2係TCXO唔係OCXO，公平啲講係唔同級數嘅。但只論聲底，如其他師兄所講，佢哋取向唔同。PPA v2感覺係高清啲，線條分明啲，高音係好清脆，低音收得快同緊少少，感覺上會薄過Apodidae，當然PPA OCXO版應該會唔同啲。Apodidae唔係每一粒音幫你分開晒，似係將啲唔同嘅樂器連成一個音場，但係又各自有佢哋嘅線條，較偏重中底頻，而整體嚟講係比較厚同有肉地。聽番同一首歌，Apodidae係俾到多啲細節：聽Bill Evans隻[waltz for Debby]咁多次都係第一次聽到鼓手支掃喺度打圈，白頭佬Stokowski隻Rhapsodies [Ma Vlast: The Moldau (Vltava)] 大堆頭嗰段唔再有零亂感，Eiji Oue版本嘅Dance macabre 中段有幾吓弦樂唔係好齊！我講緊嘅全部係Tidal版本。

代理同好多師兄都話一定要餵隻LPS俾Apodidae，但由於我前排先放咗隻keces 116，暫時唔想再多隻香爐。下一步會再煲吓呢隻雨燕，希望會再好啲，然後會試吓double run 隻PPA V2同Apodidae，睇吓集兩家之大成有冇火花。

總結，加靚嘅switch對CAS我覺得係好有幫助，唔同型號可以有好唔同嘅效果，邊款啱自己就真係夾過先知。希望呢個post幫到你。
{:9_425:}