【金牛肥牛鍋】無綫前御用奸角 教澳門賭場荷官靠演技搵食

Cheong448

http://hk.apple.nextmedia.com/enews/realtime/20170224/56343338

2017年02月24日

「又如何！」

試下閉上眼，就咁聽聲，可能有一刻會以為，講緊嘢嗰個係黃子華。

他是何浩源。望望他的樣子，又有幾分似梁文道。

「一個演員最憎似人0架嘛！」何浩源說。

到底邊個係何浩源？

如果你係7／80後嘅電視精，一定會睇過何浩源做戲。前排網民仲回帶，喺fb「_ _公社」share番佢有份演出嘅大台舊劇《天降財神》嗰幕「金牛肥牛鍋」，激讚嗰段戲離地得好精彩——何浩源喺嗰場戲玩燒銀紙，富貴離地。條片更有超過13萬點擊，亦令大家知道，原來他的名字，叫做何浩源。

對於網民激讚，何浩源接受《蘋果》專訪時，都第一時間多謝大家：「好多謝啲網民，令到我幾十年又走返出嚟。好神奇，突然之間我老婆同我講，近排你條片畀人喺fb周圍掉喎。我都唔記得拍過呢套嘢。」

喺維基搵唔到何浩源的條目，90年演藝學院畢業入無綫，依家先至第一次接受《蘋果》專訪。睇番其當年模樣，唔止把聲，個樣奸奸哋，真係有幾分似黃子華。「其實我瘦嗰陣時，係啦，嗰陣時瘦嗰陣，唔知點解話我似黃子華。跟住某一次我喺某啲場合見到黃子華，我同佢講：『喂，啲人話我似你喎！』跟住佢話：『唉，咁就真係sorry(擰擰頭)，唔好意思呀，唔係似劉德華添！』佢真係好搞笑。」咁自己覺得似唔似？「某啲啲啦，瘦嗰陣時囉，一個演員最憎似人0架嘛！」

90年入無綫，拍過不少劇集，包括《射鵰英雄傳》(張智霖版，飾演哲別)、《殭屍福星》、《笑傲江湖》、《刑事偵緝檔案2》，其中同曾江合作嘅半小時單元劇《父與子》，何浩源仲係半個男主角，但大部份都係做奸角。此外他又拍過電影《搶錢夫妻》、《追兇20年》、《超級整蠱霸王》等等。96年離開大台，投身舞台劇，又拍電視電影，又做過傳銷又傳過地產經紀，專賣九肚山嗰類豪宅。依家重返舞台，仲讀埋戲劇系碩士。

兜兜轉轉，人到中年，又發埋福嘅何浩源近年又同無綫拉上關係，就係喺鄭丹瑞牽線下，任教無綫第27期藝訓班。學生包括陳凱琳同「蔡Baby」蔡思貝。

咦，兩個學生的演技都俾網民彈至體無完膚，作為導師的何浩源講句公道話:「演技係要浸，佢哋個外型好好，嗰陣時上堂我做佢老師嗰時，我對佢哋印象好深刻，因為佢哋好投入好認真，亦都好放。我開頭以為啲港姐，得個靚字之嘛!」被彈唔掂喎：「起碼有個機會，俾你去做，俾你去試。演技嘅嘢，唔係一日可以搞掂0架嘛。」

演技嘅嘢，確不是一步可以登天，即使你才華橫溢，都要浸。喺演藝學院讀演技嘅何浩源，功力深厚，就連演奸角，都一樣入到屋，做地產嗰陣，「連客都呃埋」，但佢呃唔到自己。

「離開TVB後，撈過好多嘢；走咗去做傳銷，又做過地產。我賣啲豪宅0架嘛喺九肚山，個客認得我喎，當咗我係friend，因為我曾經入過佢屋企吖嘛，雖然係奸角多。一嚟佢就請我去佢屋企、請我飲嘢咁喎，當我friend咁信晒我，所以我唔想呃佢囉。我嗰陣時係試過呃佢0架……係呀，我試過呃過啲客，我唔想再用演技呃人。我發覺咁樣唔好。咁我就唔做喇，我都係做番啲最真嘅嘢囉。因為演技講『真』吖嘛。」

於是他走去幫大企業train員工，包括澳門新濠天地。服務行業+迎送生涯+日日面對千面八將，打賭場工，真係少啲演技都唔掂。何浩源分享謂：「佢哋開張之前，成間公司由經理呀、高層中層低層都有演技訓練，二千幾人，我哋成隊導師團隊一齊過去訓練佢哋。因為佢哋係娛樂場嚟0架嘛，要俾到啲娛樂啲客。」係咪賭場不嬲都會派職員學演技？何浩源笑了:「唔係賭場不嬲有咁嘅做法，係佢哋識貨啫!」最近一個大客係香港某大型寬頻公司，何浩源負責train員工應對、學點sell客。其實類似咁樣嘅課程亦不是新鮮事，「外國就好興，香港都越嚟越多公司，搵我哋培訓員工溝通技巧、表達、預防及解決衝突、團隊精神呀想像力呀諸如此類。」