《天空之蜂：核爆8小時》 少量劇透影評

gashapon

大家好,  自從小孩出世之後都好耐無去睇戲. 其實本身是打算想另一套的, 不過時間就唔啱, 又唔想白行一趟於是睇了呢套. 點知睇完又覺得幾好睇.

小弟一向對日本電影無太大興趣, 好大的原因係因為”聽唔明”, 要睇字幕先至明白電影講咩.  但見故事都係講”有限時間內的危機處理”, 於是就照睇了.
先不講劇情, 我自己覺得除了2個主角同某幾個角色之外, 其他演員都有少少浮誇. 好似”大聲就係好戲咁”.  攪到睇睇下都有d”洗唔洗呀…”的感覺. 而且某d角色我覺得真係可有可無, 但又無啦啦用了不少時間去講成件事, 感覺就好似睇金田一時驚你唔明壞角點解要咁做, 一五一十連只得佢知的心路歷程都講晒出來咁, 少少 ”太過畫公仔畫出腸”的感覺.
不過整套電影個流程大致上都幾緊張, 雖然未入場都估到最後係點 (只係一開始未必知”主謀”係邊個) 但一路睇一路見成team人拆招, 解決問題, 令我都睇得好投入.  不過科學水平上, 電影的設定都流流地, 唔知係咪怕太深無人明核電廠的運作係點吧. 而且用直昇機想撞擊核電廠而發生意外, 可能性實在太低. 其實核電廠的設計係就算戰機高速撞上都無事, 更何況只是”free fall”的直昇機, 當然又無可能用天災來迫政府, 飛機又無可能停在上空8小時, 因此設定上只能用直昇機吧.

故事簡介:  故事一開始是講日本最大型軍用救援機”大蜂號”在交接當日被劫走, 而且飛去了新陽核電廠上空, 威脅日本政府必須要將全國的核電廠停產(而且令佢地無法再運作). 由於大蜂號只有運作8小時的油量, 因此各方需要在呢8小時內解決問題.
故事內部唔太多劇透, 等各位入場時自行感受吧~~

睇完其實都有少少反思. 人一方面又依賴能源去令生活更方便, 一方面又對產生能源所帶出的問題漠不關心. 就算出事都好似唔關自己事咁. 睇完結局其實都有少少無奈, 因為如果要為了用少d電而改變生活模式, 相信未必人人都做到. 情況就如自己住的大廈, 假如某日要維修供電系統而晚上停電幾小時, 相信已令大部份人叫苦, 幾小時都咁辛苦, 何況是長期性的. 主謀本身又唔算反核, 最無奈的反而係事情完結後, 大家又當無一回事, 繼續生活直到下一次災難出現又再反省下咁.   


分數方面: 如果唔太理電影中的science, 只睇劇情都有7分. 但如果睇親電影都會指出"邊度唔真實", "現實無可能發生呢d事", 咁就唔建議去睇了~

SonSon

返而對呢部日影有興趣, 不過係驚東野圭吾會間唔中失手, 加上呢類日影災難片種一定係最危急關頭會有婆媽情節

gashapon

SonSon 發表於 2016-1-29 10:37
返而對呢部日影有興趣, 不過係驚東野圭吾會間唔中失手, 加上呢類日影災難片種一定係最危急關頭會有婆媽情節 ...

其實未睇都估到結局, 不過過程都算緊張~
我連導演係邊個都未知, 所以都唔知佢出過咩作品哈哈~ 見有時間就睇, 結果又比想像中好.  

SonSon

gashapon 發表於 2016-1-29 11:37
其實未睇都估到結局, 不過過程都算緊張~
我連導演係邊個都未知, 所以都唔知佢出過咩作品哈哈~ 見有時間就 ...

東野圭吾係小說作家, 寫推理懸疑小說多, 科幻呢類題材好似少D, 神探伽利略咪出自佢手筆

verdy

我剛剛睇完小說。
其實呢套戲(小說)想講出一樣野，當有d野大家都覺得唔關自已事時而選擇沉默，其實就正正係幫自已埋下一個計時炸彈。
犯罪者其實都知核電廠並唔係最可怕既"怪獸"，反而係其中一種"負產品"破壞力可能更恐怖。
所以想籍著呢件事故令政府及市民有所警惕。

"俾密蜂針過既人至會知道被針後有幾痛。"

所以"天空之蜂"就係當架直升機係天空既一隻密蜂、亦即係犯人既外號。

有興趣可以找本小說黎睇睇。

gashapon

verdy 發表於 2016-2-2 17:18
我剛剛睇完小說。
其實呢套戲(小說)想講出一樣野，當有d野大家都覺得唔關自已事時而選擇沉默，其實就正正係 ...

我都幾同意佢呢個point, 不過都認為如果下下咁諗就太負面了. 等於任何一件東西都可以用來殺人. 磚塊可以起屋, 又可以掉死人.

我感受最深都係生活上為了方便而需要加強能源的產生. 但原來有可能會令個社會返唔到轉頭, 簡單來說就係未必可以完全控制任何事, 只要一次意外就可能令大範圍的地方無法居住. 都有反思是否為了方便就無需理會所帶出的影響.