沒有『 亞城木夢叶』的《爆漫。》

阿定

原定1月7日上映的改編漫畫真人電影《爆漫。》，作為動漫迷的我，當然要去睇番場優先場啦！

呢幾年的真人改編漫畫電影越來越多，當中有好睇，亦有唔好睇的，主要出事的，都唔再係還原漫畫天馬行空的技術問題，而係改編時，故事是否讓人滿意，要滿足漫迷跟原著，定滿足影迷改好個故事？ 全套20本176話，要變成一套電影，刪減在所難免，今次爆漫電影版仲要一集過，大家應該有心理準備吧！

先唔好劇透，講下自己對套戲整體感受，成套戲好熱血，日本開畫票房Number One 絕對合情合理，兩位主角做得非常好，特別係扮演高木秋人的神木隆之介真係好入型入格，故事主線係講畫漫畫的成長路，愛情線係電影入面變得可有可無，如果好似我咁，睇漫畫大，由其少年jump為主的，戲入面有大量不同漫畫的對白、情境穿插(特別係男兒當入樽)，識得笑，真係可以好好笑，所以睇戲時，你會發覺有d位，唔一定全場一齊笑，你就知邊d係資深漫迷啦，哈哈！

電影入面，有好多神還原的場景，聽講集英社的場景，有部份係實境拍攝的，而山田孝之為左真實扮演服部編輯，真係係現場著左爆畫果編輯件風褸來著，而真英雄傳說的工作室，同漫畫入面比，除左無咁大外，一樣係咁神似，成屋都係漫畫，作為漫迷，真係超感動

戲入面特別值得推介的係用畫筆化作劍來打鬥的場面，呢種比喻手法，真係好正，立體化點樣用畫功，用故事來鬥銷量，大家用心少少睇，其實真係睇到兩位主角的漫畫技巧係戲入面越來越出色，由初初好生硬到越畫越有氣勢，導演無特別係戲入面用語言講出來，但睇戲的我地絕對係可以用眼用心去感受，故事好熱血，絕對值得大家入場觀看

完場記得睇埋字幕，書架上的書邊就係工作人員名單，唔知大家認唔認得用咩漫畫作品改的呢？連書名字型都跟足去做，真係好有心機架！

--------------以下內容會有少量劇透，建議未睇戲的考慮清楚先好睇落去--------------

回應番個標題先，有睇漫畫應該知道『 亞城木夢叶』就係佢兩個的筆名，點解我會話無左『 亞城木夢叶』呢，除左戲入面無用到呢個筆名來投稿同出書之外，跟本整個『 亞城木夢叶』的精神都無係戲入面用到，原著係好重感情戲的，戲入面無晒，連經典場面都無埋，我差d想爆粗，夢想原來可以咁易破滅，女主角果樣唔似美保都算，連性格都唔似，老實講，不如CUT埋呢個角色好了，反正秋人的另一半香耶都無出場，其實可以唔爭在Cut晒d 女角

另外，兩位主角原本係好有夢想咁去畫漫畫的，但戲入面變成因為讀書唔太得，所以先去畫漫畫，呢個改動真係好無必要，可憐的高材生秋人變成廢青，點解要咁呢.....，新妻方面，用染谷將太擔演，其實問題不大，但實在曝光過高，套套漫畫改真人都有佢份，真係有少少 too much，原著係一個不會討人厭，永遠長不大的天才少年，電影改做成一個自閉仔咁，仲要變成大反派，跟本就無必要，電影入面都有經常提著 友情！熱血！勝利！，所以個人覺得無必要特別改成大反派，Keep番簡簡單單，一齊努力爭奪Number One，唔係更好咩

當然，亦都有我認為改得唔錯的地方，例如幾位漫畫家點樣認識，點樣討論心得，點樣合作幫真誠，雖然同原著完全唔同，但就完全唔影響漫畫想表達的友情同熱血，所以整體雖然改動唔太讓我呢個漫迷滿意，但以電影來講，絕對對得住爆漫之名，沒有讓我失望而回！

Hon

聽你咁講完, 又係等出碟至睇算數.

美保... 睇TRAILER已經覺得... 點解要搵佢做, 難度日本無靚女?!?!?!

alleelarry

大概沒有看過漫畫的，睇呢套就無太大問題勒！

阿定

alleelarry 發表於 2015-12-15 08:41
大概沒有看過漫畫的，睇呢套就無太大問題勒！

有睇漫畫都無問題，改動唔算大到反感！不過最緊要都係要有睇漫畫的習慣，不過香港應該無人完全唔睇漫畫的吧！