《人中之龍0》總監名越稔洋訪港 (2樓更新見面會花絮+囡圖)

@肥狗仔@ · 發表於 2015-5-16 22:11

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由 @肥狗仔@ 於 2015-5-20 20:11 編輯

如果要形容中文化遊戲在本地的狀況，我會用百花齊放去形容。打從上一代家用機面世以來，由自家品牌的漢化再到PSP動漫作品的漢化工作，Sony Computer Entertainment Hong Kong(SCEH)仿佛打通了本地玩家與日系遊戲的所有言語障礙，令唔識日文的玩家唔再需要厚厚的中文攻略去揣摩故事發展。喺剛過去嘅星期四，一款極巨人氣的日系ARPG作品的中文化正式推出，《人中之龍0 誓言的場所》繁體中文版的出現標誌住中文化遊戲的一個里程碑，更證明咗華人地區的遊戲市場愈趨重要。事關這款中文化巨製首先加入咗由香港演員李燦森飾演的遊戲人物老鬼，稱得上揚威海外。(@肥狗仔@: 好吧，PS4唔鎖區，全球的玩家都可以買到繁體中文版的)

為隆重其事，SCEH昨日邀請了《人中之龍》系列總監名越稔洋及飾演老鬼的李燦森同台接受傳媒訪問。究竟哩位外表似江湖中人的名越稔洋係咪有不為人知的過去? 而作為少數獲邀製作遊戲的本地演員，李燦森又點睇今次老鬼哩個角色呢，以下的訪談內容或者會令你哭笑不得。

記: 記者
名: 名越稔洋
李: 李燦森

記: 想請問名越先生點解會有將《人中之龍0》製作成繁體中文版的念頭呢?

名: 基於PS4已經在中國推出，考慮到以往日文版在華的銷售成績相當不俗。雖然遲了兩個月，但我們仍然非常積極想要挑戰中文化這個項目。

記: 請問李燦森先生，參與遊戲製作和拍戲有何分別?

李: 當然好唔同啦，電影的話只係純粹將演員的表演拍低，然後喺螢幕上播放，而遊戲製作比我感覺更像是《冰河世紀》的配音員。其實遊戲本身已經有老鬼這個角色存在，而我今次過去日本的工作就係替該角色配音，然後通過3D面部掃瞄，將表情貼上老鬼的建模上。過程上我覺得與配音係有點相似，事關兩者皆有好多動作及對白，比如話部份涉及打鬥的場面，我就要負責相關反應嘅聲音。大體上角色經已設計好，我只係將自己的聲音及面部表情加諸於角色身上。

記: 《人中之龍》系列已經推出了好多集，對於製作一款前傳，難度喺邊呢?

名: 其實有好多人都表示有興趣知道桐生一馬及真島吾朗過去嘅故事，然而喺遊戲製作角度，集數愈多，角色先會愈成形。所以就算係前傳，基於製作人對角色已經有好深了解，講難度就唔算特別高。

記: 遊戲作為前傳，嗰個年代嘅日本黑道與現在嘅日本黑道會有咩分別? 請問製作人平時係如何做資料搜集的?

名: 我自己其實幾喜歡這種黑社會題材，但我並唔認識黑幫的人(笑)，所以只可以靠電影或者小說去做資料搜集。而以前的日本黑幫和哩家嘅最大分別，在於當時的法律比較寬鬆，所以黑幫會更為狂野更肆無忌憚。

記: 《人中之龍》系列舊作在華人市場一直都好俱人氣，請問名越先生有否計劃為舊作推出中文版?

名: 在商業角度，要視乎是次《人中之龍0》中文版的銷售成績及反應再作決定。就好似我地請黎咗李燦森先生成為遊戲的一個元素，我自己都算係李燦森的粉絲呢。因此往後會否有更多中文化計劃，我們會考慮是否能夠將各種新元素加入遊戲作為切入點。

記: 李燦森之前有冇接觸過《人中之龍》系列遊戲?

李: 我之前係完全冇玩過哩隻game，事實上我唔係咩打機之人。平時玩嘅不外乎係GT，Winning哩類遊戲，始終我自己比較怕一尐好激動或暴力嘅遊戲。不過頭先我第一次接觸遊戲後感覺好刺激，又可以去夜總會(全場大笑)，現實上滿足唔到嘅可以喺遊戲裡滿足。

名: 下次去日本嘅時候都可以去試試。(笑)

李: 一齊去啦! (日文)

記: 請問名越先生點解會選擇李燦森做老鬼? 你自己又係咪港產片的忠實擁等? 如果有機會，你會選擇邊尐香港演員飾演遊戲人物?

名: 我自己比較喜歡李燦森先生做嘅戲，但講到香港演員，因為自己並唔熟悉中國及港產電影，反而韓國電影會睇多少少。其實《人中之龍》係一款頗為獨特的遊戲，要搵適合的演員向來有難度，就算係中港較出名嘅演員，我所著重嘅亦只係該演員俾我嘅印象，咁樣先能夠塑造出好角色。

記: 請問李燦森先生對於老鬼這名角色有咩感想? 同製作團隊共事時又有冇比較難忘嘅經歷?

李: 首先老鬼哩個角色係好殘暴不仁，且殺人於無形。最初到日本嗰陣，製作團隊已經同我介紹老鬼係位武藝高強，用手指都篤得死人嘅殺手，亦都係最終BOSS，我就心唸: 「嘩...咩咁睇得起我?」當我睇返日本原裝版的時候，先發現原來哩個角色喺故事上的確幾重要，而且十分有型，出場時總係好cool，語氣上亦帶有死亡氣息。所以我喺配音時候，講野語氣都要度身訂造，為配合日版老鬼嘅神韻。唯獨係我覺得日版老鬼唔夠我靚仔! (笑)

記: 《人中之龍》系列嘅每個男主角所背負的東西都比較沉重，未來嘅系列作會否考慮為佢地加入女朋友? 意思係指真愛而非夜總會的...(全場大笑)

名: 的確有考慮過。雖然現在遊戲都出咗中文版，但遊戲本身係為日本成年男性設計，始終當地男士更傾向hard-core劇情多尐，所以我地一直都在回避"浪漫"哩個元素。但無可否認女性玩家愈黎愈多，考慮到女性喜歡愛情元素，如果有機會的話我都想挑戰一下哩種題材呢。

記: 《人中之龍5》的桐生一馬年紀有返咁上下，喺未來的系列作中，50歲高齡喺他會繼續作為主角同後生仔打交，還是會由其他主角頂替?

名: 桐生一馬喺我腦海中暫時仍然係第一主角，雖然該角色已經50歲喇，只要桐生一馬的身體仲支撐到都會繼續比他打落去。再講男性年紀愈大，愈能夠滲透出獨有的魅力。

記: 若果再次被邀請的話李燦森希望成為《人中之龍》的邊一個角色?

李: 我唸我都冇得轉喇掛(笑)，除非我死咗啫，否則都係做返老鬼。我知情今集結尾其實我係冇死，可能下一集從良做好人都唔定。當然都希望可以繼續喺遊戲中飾演老鬼這個角色。

名: 的確未死

記: 喺1代嘅時候，桐生一馬與錦山彰有一名叫做澤村由美的青梅竹馬，係1代非常重要的角色，點解喺《人中之龍0》這部前傳中不見蹤影?

名: 雖然眾主角喺好年輕嘅時候已經加入黑道，但始終由美當時仍然係高中生，所以冇咩出場的契機。

李: 太細個，學壞就弊喇。

記: 想問李燦森先生，你以前都有做過港產片的蠱惑仔角色，今次老鬼的角色有否勾起你以前做蠱惑仔的回憶?你又覺得香港的蠱惑仔與日本的黑道有咩不同之處?

李: 首先我要澄清一下，我冇做過蠱惑仔(全場大笑)，我只係喺電影裡有飾演過蠱惑仔。分別的話當然有，我覺得日本黑道其實好有組織，而且好尊重自己的幫派，例如穿著整齊西裝。對比之下香港可能比較奔放，話斬就斬，但我認為係兩種不同文化，冇想過要比較。不過我都幾崇拜日本黑道，佢地所散發出黎嘅氣勢及組織的確好有規模同架構。至於香港與之相比就差遠，冇造型亦冇隊型，感覺上就係一盤散沙。

記: 《人中之龍》系列以往都以日本為舞台，有冇唸過將遊戲舞台移師到其他國家?

名: 哩個係幾有趣嘅想法呢，事實上我地可以通過相片去了解不同城市的每一個角落。但要將該城市打造得俱真實感與文化氣息就係另一回事。舉例若果我地要做香港城市，當製作團隊未有足夠信心做得出似樣嘅香港之前，係唔會考慮嘅。他朝如果有機會，我們亦好樂意嘗試。

@肥狗仔@ · 發表於 2015-5-16 22:27

本帖最後由 @肥狗仔@ 於 2015-5-19 23:17 編輯

打機向來比人感覺只係男士的專利，講緊唔單止係因為雄性渴求腎上腺素的刺激，暴力﹑ 血腥﹑ 色情等新興遊戲元素仿佛亦係為紳士而設。證據呢? 上面提到《人中之龍0》遊戲總監名越稔洋同"老鬼"李燦森上周五接受了傳媒訪問，但同日其實佢地仲攜同一班性感尤物與PS plus粉絲共渡春宵。冇錯，貨真價實的日本AV女優的確黎咗香港，佢地嘅出現不單止令到身為當晚主角(?)的名越稔洋顯得黯然失色，在場男士的表現甚至連《男兒本色》的一眾演員都自愧不如。

《人中之龍0》限定版PS4主機

打著"製作人見面會"名號的AV女優見面會當晚七時正舉行，大會安排了100名PS plus玩家及100名普通市民到場與偶像見面，場面之盛大係近年少見。

日本AV女優(左起) — 栗林莉里、湊莉久、朝倉琴美逐一出場與粉絲們互動，其中奪得過日本AV奧斯卡的湊莉久一出場就引來騷動。

名越稔洋與一眾女優合照。作為《人中之龍》的創造者，其真人本身就已經稱得上係(男)人中之龍。一張簡單的合照，已經將包括@肥狗仔@在內的在場男士映襯得像阿源一樣 — 「唉，比人抽中，這些機會仍然不是屬於我的」

Sony A series 《人中之龍》特別版Walkman同場公佈

然而，更刺激嘅環節在後頭，有型有款的"老鬼"李燦森出場，並喺名越先生及執行製作人佐藤大輔的指導下大玩《人中之龍0》遊戲。不過喺十分鐘的遊戲入面，李燦森享受唔到是次到日本的製作成果，"老鬼"由頭到尾都冇出現到。不過，單單係有AV女優喂酒已經夠爆。

Oh~yeah~

哩一啖酒將全場的氣氛推到頂峰，亦都燃起在場男士的不滿及憤怒，焦躁難耐的氣場最終引起了大會注意，繼而宣佈邀請AV女優與玩家玩遊戲。對唔少人黎講，哩個function現在先正式開始。好吧，@肥狗仔@喺度就唔講咁多，上菜!!!!!!!!!!!!!

夾波波遊戲

翻譯哥哥按奈不住了

住家男人上黎玩有一定風險，如果哩張相比老婆見到，咁大概就係一張黑白相。

台下不斷叫囂，台上的哥哥仔繼續唔比自己唸太多

想拎獎品一啲都唔易...嘩你隻手想做咩?

阿媽~我得咗喇! 又食又拎!

當晚整個活動都在大量有味笑話及性暗示下進行。不過對於AV女優這個行業而言，在場男士的反應想必只係對於三名女優的一份最基本的尊重。特別係當女優們要挑選男士上台玩遊戲的時候，台下男士的反應就好似一班餓住肚皮的雛鳥，為爭取母鳥口中的肥蟲而爭先恐後一般。@肥狗仔@睇見哩一幕都不禁自問究竟電子遊戲是為何物。幸好，熱情過後係時候回歸理性，《人中之龍0》的出現為港台玩家帶來了系列首次的繁體中文遊戲，仲為大家帶來了紙醉金迷的日本夜生活(虛擬)。經此一役，相信玩家們都會期望SCEH未來會否為大家為來生死格鬥或者野球拳的製作人見面會。

娜娜醬!個知個知! (@肥狗仔@唔識日文，隱約都聽到哩類說話)

最後福利: