Luxury & Precision LP5 Silver

unnnknown

話説我就宜家係外國讀緊書，過去之前本來用緊Hm901/Ak120 配Fitear tg334, 臨走前有次岀街嗰陣放左部ak120係紙袋到，點知行行下發現紙袋穿左，跌左部機加把傘。嗰刻真係灰一灰，所以把心一模過外國用6plus hea聽算。

誰不知我係ebay到bid左部差唔多全新嘅iPod一代嘅古董機嚟聽，果然係最靚聲嘅iPod(小弟有齊大部分ipod對比岀嚟的)

但由於我手上有成200gb 24bit同Dsd，無理由唔入番部機嚟聽，所以上網睇左好耐，其實大部分嘅player都用過曬，但始終無部有ak咁方便。本來諗住買ak240ss，但又想試新野，見lotoo paw gold係headfi俾人讚到上天花板，所以有諗過買，決定俾錢嗰刻竟然佢又話唔寄嚟我到，無奈我又要再搵過......

最後我睇中左LP5 因為睇佢用料好堅，而且又有朋友落毒，所以我決定左入佢。我係金同銀LP5中間徘徊左好耐。其實價錢唔係差太遠，2000人民幣，但因為上網大部分嘅開箱都係話金版啱耳牛，銀版配耳機嘅關係，而且銀版流行更毒，所以我訂左銀LP5。

我等左3日DHL就寄到，開箱嗰刻一見到部機即刻拎上手，當堂嚇一跳，然後得啖笑。我嗰刻以為佢寄錯機，寄左部道具嗰種demo俾我，因為真係好輕，感覺輕過ak120，但佢木嗰種質感真係好正。
講樣嘅話其實我都唔係好明點解好地地中間要加個圓形mon?! 上網睇話係因為想加一個好似錶面咁嘅設計。我買之前都覺佢其實無咩問題，朋友同女朋友都係咁講，但呢啲野都係見仁見智。

講番聲，我對334係高敏低阻，所以好易有底噪，但我一開機，竟然無底噪，好寧靜，而且最開心係一秒開機。一播謝安琪嘅"我們都被忘了"，真係聽到我耳油都岀曬，嗰空間感有種似曾相識嘅感覺，同901+Minibox好似，謝安琪企緊係一個我啱啱好掂佢唔到嘅位。雨聲好立體，我聽嗰陣都有淋緊雨嘅感覺(係咁浮誇㗎啦)。但因為樂器 人聲 分得太開，太仔細，有時唔係咁好，因為咁就會變左你好似要落足689%心思去聽，極度集中去聽曬所有details，無左享受嘅本質。

聽譚校長嘅愛的根源，我真係覺得我喺隕石旁的天際，嗰種空洞感，聽佢嗰把到達爐火純青的聲線，而唔係係到飆高音、鬥激昂，係用佢最原始嘅聲線，好似一碗煲得啱啱好嘅湯，不溫不火，但啲味道就濃淡有致，表達出首歌最動人嘅一面。

我好鐘意LP5配334嘅人聲，好滑好有味道，女聲少少甜，男聲忠實嘅演譯，我聽每一首歌，都可以感受到首歌嘅意境。我聽古巨基某啲用弦樂做背景嘅歌或者係John Williams 嘅結他嗰陣，我感覺到LP5嘅高頻係有俾打磨過，好圓滑，唔會過尖，聽到起曬雞皮。但對於有啲追求監聽，689%忠實還原嗰陣，LP5銀可能唔太適合你。

LP5銀無左120嗰種軟弱，901嗰種監聽feel，又無240嘅質感，但至少我冬天唔會俾部機凍親，我睇得岀佢手工好好，要知道要將機身木殻打磨成咁嘅形狀，我真心覺得好難。

其實有時唔洗真係咁計較部機播歌中音有幾甜，高音可以飆到幾高，唔通我每部機都要用100分去評每一part? 其實問心，對我嚟講「舒服」就夠㗎啦。LP5銀的確滿足到我呢點。睇緊呢篇文嘅你，可能會覺得我呢篇野要0分重作，只因廢話太多，但我只可以話以上係小弟玩左4年headfi得岀嚟感受。

P.s. 其實佢官網好隱蔽，好難搵，但upgrade程序好簡單。
同埋設計呢部機嘅人係忠於sennheiser嘅耳機去調音，遲啲會推岀多啲版本俾唔同耳機。
以前用另一個accouunt成日經常打文,但決定左重新開過.如果反應唔錯,再考慮下出唔出Mr. Speakers耳機嘅報告

goodabc2010

自己o岩聽就得啦