《解碼遊戲 The Imitation Game》睇後影評

gashapon

未講感想前先說明一下, 我認我係睇完奧斯卡先走去睇呢套電影的~
另外是純感覺的關係, 我本身對男主角Benedict無咩好感(覺得佢個人好呆, 十問九唔應咁), 反而女主角Keira是我當年讀書時睇佢"bend it like beckham"時已經覺得佢唔錯~ 不過睇完都認為好彩有睇, 而男主角真係好入戲, 唔睇就走寶了~

故事是根據真實的歷史改編的, 講男主角 Alan Turing的故事. 佢本身是一個數學/科學天材. 在二次大戰時, 被英軍招攬去研究破解德軍"密碼學"的過程同少部份佢晚年的生活. 故事用插序的方法講出Alan晚年, 在英軍時及童年的生活.

我本身對二次大戰認識不多, 因此以下資料都是從電影中加少少"記憶" 得出的, 如果有錯請見諒~

在二次大戰時, 德軍依靠科技的優勢在戰場上領先不少. 盟軍開始時只係捱打的多. 正所謂"知己知彼 百戰百勝", 如果預早知道敵方下一步的行動, 對自己一定有利. 德軍的軍事電報 (係呀, 當時未有e-mail嫁~) 雖然好易比英軍"偷聽"到, 不過由於內容都是加密過的, 對唔明的人只是一大堆無意義的亂碼. 等於我唔識古希臘文而要我睇古希臘文寫的信, 就算送比我睇都一樣唔知佢講咩. 盟軍在一次行動中取得了德軍的"解碼器"(一部"打字機"), 不過由於唔知道確實的解碼方法, 因此無法decode成有用的資訊.

英國於是招攬了一批"腦力驚人"的人士, 佢地各有所長, 例如心算好快, 思考方面比人強等. 招攬佢地的目的係希望找出一個可以破解德軍情報的方法. 由於當時未有電腦, 運算都係依靠人手去計算, 而德軍的加密方式組合上可以有"成千上萬"個組合(唔太記得實數, 不過好似有10幾個零的位數), 而德軍每24小時就會轉一次, 因此成team人每次只得18小時左右去破解, 如果解唔到就以後都唔需要解了. 主角Alan心知人力有限, 因此一開始已經打算製造一部電腦(計算機) 來快速地運算. 電影內當然一開始無咁順利, 加上Alan同隊員之間的不和, 同佢唔太懂得待人接物, 所以一開始時都無咩進展. 在女主角幫忙同"教育"下, 最後都同隊員合作起來, 成功製造電腦出來. 而最後當然也成功破解了德軍的資訊而在戰爭中取得了最後勝利.

而故事另一個主線是講Alan本身是一名同性戀者, 而在當時的法律下,  同性戀是要坐監的. 最無奈的地方就係英國戰時對alan係寶, 打完勝仗就唔掉低佢最後仲拉埋佢, 顯示了當時社會的不公義的地方. Alan最後因抵受不了壓力而自殺身亡.

電影在說沒有好華麗的電腦特技, 不過有時真係好appreciate佢地可以用好少的budget去拍出一個好好的故事. 我自己覺得故事性比birdman更好, 睇完都有少少眼濕濕.

另外見有d人可能會唔太明部電腦其實有咩用, 我在此簡單說明一下:

首先, 可以將佢理解成"goole translate", 問題是譯成什麼的語言. 上面都有提過, 由於德軍所用的coding方法太多組合, 因此要花時間去破解成有用的資訊, 一日時間根本不夠. 例如我有封電報是全由數字組成的. A=01, B=02, C=03等等. 只要我將d數字2個2個咁換返到英文字, 就可以還原成有用的資訊. 如果是人手逐一去還原, 所花的時間就好長. 而電腦運算就會快好多. 例如電腦一秒可以換算1000次, 咁10000組字都係用10秒就攪掂. 但問題是前提下你要知道A=01, B=02先可以去做破解. 如果唔知道的話, 只可以A=01, A=02, A=03咁逐個去"撞", 直到出現合理的結果自算成功.(即電影中出現的情況)

而起初就算主角成功製造電腦出來, 都由於電腦運算唔夠快而趕不及一日之內破解到答案. 轉捩點是有次飲野時其中一個女兵講德國每次電報完結前都會用"希特拉萬歲"結尾, 於是主角就利用呢組文字去推算返咩code代表咩英文字, 排除了一部份無可能的組合, 再由電腦計出正確的答案. 最後仲幫盟軍打勝仗. 歷史學家估計咁樣令戰爭可以早1~2年完結, 間接令更少的人傷亡. 當然如電影的結局來說, 主角最終都是慘淡收場...而之後科學家都keep住研究佢部電腦(當時叫Turing machine, 即依家的computer), 加速了科技的發展, 影響深遠

alleeada

既然師兄寫左影評，我就係到寫下對呢套片既感覺。

女主角我都係睇《我愛碧咸 Bend It Like Beckham》而認識呢位女角，而 Benedict Cumberbatch 就係 TV 《Sherlock》了。無可否認見到 Sherlock Holmes 個髲型真係.......... ，不過 Star Trek into Darkness 既 Khan 真係入型入格，話晒 Khan 係 Star Trek 入面既最強敵人 (我覺得啦)，佢果種冷靜又聰明既形態出晒黎。

講返套戲，前半段有D悶，不過為左交代歷史無辦法。天才應有的特質，男主角一樣不少，看電影時唔會有太明顯的感覺，但電影開始交代 Alan Turing 的過去時，會越看越有味道 (Benedict 真係做得好好)。中期的情節也是順理成章（不多講情節了），而全片最精彩的部份便是後段講 Alan Turing 被人發現係同性戀，被逼害到自殺。男主角的那種神情令在場人士掉了不少眼淚（包括小妹）

《解碼遊戲》無高潮迭起的情節，無打打殺殺的場景，但有人性及世界大戰時的種種事跡。推介大家入場觀看！！！

gashapon

alleeada 發表於 2015-3-12 10:14
既然師兄寫左影評，我就係到寫下對呢套片既感覺。

女主角我都係睇《我愛碧咸 Bend It Like Beckham》而認 ...

TV 《Sherlock》我到依家都未睇過, 而star trek 我因為無咩點睇過舊作 (最近的舊作已經係"professor X"做船長的了) 所以唔知khan原本有幾勁~ XD
我係純粹見到佢個樣覺得唔多討好, 都唔關佢做戲好唔好事, 其實都算係"偏見"~

我都唔太記得Alan是未被招攬前已經有打算製造一部電腦出來定係入o左去先開始設計. 不過感覺好似好快就跳o左去整電腦, 變成成team人其實都無咩好做咁. 如果講多少少Alan點去說服高層, 講多少少部機個功能係點, 令高層同意佢整部電腦出來會好d~

另外其實現實都幾無奈, 因為好多時科技得以進步, 好大原因都係因為戰爭而起. 永遠都是軍用改為民用, 而唔係一心一開始是用來改善生活.

alleeada

gashapon 發表於 2015-3-12 11:09
TV 《Sherlock》我到依家都未睇過, 而star trek 我因為無咩點睇過舊作 (最近的舊作已經係"professor X"做 ...

部電腦應該係招攬後為左破德軍既「Enigma」密碼機才發明的。

無可否認，大部份科技都係軍改民用。鬼叫國家先有咁多錢投入去做 R&D 咩，無辦法。