Xbox One登陸香港啟動禮 實況報導+《Sunset Overdrive》試玩後感

@肥狗仔@

微軟次世代主機 — XBOX ONE香港行貨明日(9月23日)就會正式推出市面。相信眾多XBOX飯已經準備就緒，為這部"黑色大牛龜"騰出空位。但作為一個擁有眾多XBOX粉絲的地區，微軟當然唔會俾XONE無聲無色地搬上貨架，今日該公司就特別舉辦了大型啟動禮及試玩活動，希望將"9.23"塑造成普天同慶的大日子。@肥狗仔@下午就出席咗該「微軟Xbox One登陸香港升『One』啟動禮」。事前滿以為只係個例行會議，想不到驚喜可謂浪接浪。

是次活動及較後時段的玩家環節"一賞再賞"活動皆在尖咀"Hotel ICON"舉行，本人一步入展廳就被別出心裁的佈置及燈光所帶動，自自然然走到屬於機迷的地方大玩一翻。

來自《HALO》的士官長老早就成為XBOX LOGO，今次XONE在港發售點可以唔預埋佢呢?

雖然盒入面應該係空的，但睇見士官長步行時的英姿，@肥狗仔@感受到重量。

今年XONE遊戲陣容俾起過往任何一代都要強大，包括《Ryse: Son of Rome》﹑《Dead Rising 3》﹑《Titanfall》﹑《Sunset Overdrive》《Forza Horizon 2》﹑《Forza Motorsport 5》及收錄了HALO2重製版的《HALO Master Chief Collection》等獨佔遊戲。

Microsoft香港有限公司總經理鄒作基先生上台致詞，並為在場傳媒介紹XONE的全新功能，例如為玩家尋找適當對手的Smart match; 與手機互動的Smart glass還有適用於香港蝸居的新型Kinect。

啟動儀式開始，眾嘉賓將手放上巨型XONE手掣上高。

啟動禮第一個驚喜是電視廣播有限公司總經理鄭善強上台宣佈TVB將與微軟合作，並會在XONE上推出專屬訂製的"MyTV"apps。以後玩家打機想睇電視就唔洗吓吓關機咁麻煩。

大會即場示範使用XONE版"MyTV"。玩家可以利用手掣或者通過Kinect以手勢與apps進行互動。當中試播了《使徒行者》及《愛.回家》等兩齣電視劇，全程未見有lag機情況。鄭善強又指出XONE玩家將來更可以率先體驗更高Bitrate的強化版MyTV，感受真正的高清體驗。

微軟新加坡XBOX資深遊戲產品經理Barrie Ooi簡介XONE下半年的遊戲陣容。

為隆重其事，微軟邀請到《Sunset Overdrive》製作人James Stevenson及《Dead Rising 3》製作人Mike Jones到場。兩人由外國遠道而來除咗送上遊戲影像更即場演示了遊戲內容。

傳說中第一個到動漫節訂購XONE的XBOX飯可以提早一日取貨，希望佢嘅熱情係真的，因為嗰盒係齋機版@@。

《Sunset Overdrive》試玩後感

發佈會結束之後@肥狗仔@急不及待衝向後面試玩區，要知道今次大會安排咗為數眾多的XONE大作撐場，但講到未曾推出的亦只有《Sunset Overdrive》最為耀眼。講起哩款作品，@肥狗仔@本身並冇給予太大期望，因為一黎XONE已經充斥一堆吸引眼球的大作，二來之前本人對Insomniac Games的《Fuse》沒有什麼好感，如今《Sunset Overdrive》與前者同出一脈，自然被打入waiting list。然而經過今日試玩之後本人對這款"cult味甚濃"的動作遊戲有咗180度改觀。

與其他同類遊戲相比，《Sunset Overdrive》由故事到畫風再到遊戲都盡顯騎呢一面，故事簡單啲黎講就係城內的市民飲咗某罐飲料之後就變成怪物，而主角則須利用超能力將怪物消滅。聽落係咪似《Biohazard》?非也，事實上整個遊戲都被歡樂氣氛所渲染，以試玩內容為例，今次所提供的關卡就發生在遊樂場，配合輕快的BGM及卡通style的美工，再恐怖的怪物亦變得異常滑稽。

基於風格及場景關係，遊戲畫面的資訊較多，一時間或者真係令人措手不及，好彩本作的遊戲性算得上單純，且十分好玩。喺《Sunset Overdrive》入面，玩家唯一要做的就係盡情殺戮，而過程最常用的"把戲"就係在各種架空路軌上迅速移動。概念上與《Bioshock Infinite》有異曲同工之妙，但玩落絕對比前者帶感好多，因為"迅移"在本在的目的不志在交通方便，而係與敵人周旋。尤其是當普通怪物冇辦法跟上玩家速度時，玩家會處於屈機的狀態，不過一旦落地，即使係雜兵，其傷害程度亦能帶俾玩家危機感。@肥狗仔@開頭恃住有配劍唸住可以喪斬怪物，倒頭來死亡次數話我知本作唔係無雙，因此高速移動功能正好為遊戲帶來爽快同時，更可以適度帶起玩家緊張情緒。哩種交織住輕快及刺激的奇妙感覺以往係比較少見的。

高速的觀感亦建基於武器設計上。有玩過《Resistance》及《Ratchet & Clank》都知道Insomniac Games其中一項絕活在於可以創作出造型百變，五花百門的怪雞武器。同樣的風格玩家都能夠在本作中體驗得到。《Sunset Overdrive》採用武器圓盤設計，試玩版開頭玩家已經可以玩轉所有能力各異的滑稽軍火。當中除咗普通步槍與火箭炮，有幾款係比較突出的好似玩具熊手榴彈﹑冰封水槍還有可以吸引怪物的飲料。值得注意係每把槍器的適應力都異常地高，即使玩家唔知頭唔知路不停轉武器，玩起上手都會非常爽快。特別係DEMO後段可以在過山車軌上飛馳，玩家需要在避開障礙及切換路軌之間高速地向前推進，刺激程度非言語能表達。


今次的XONE"啟動儀式"讓眾人了解到即使該主機未能將外國甚至內地的視頻服務引進本地，但與TVB合作的事項上則顯示出港版XONE並唔會荒廢"家庭娛樂"這一大特色。正所謂遲到好過冇到，在落後PS4一年的前題下，XONE堅定選擇以遊戲為本，通過XONE的嶄新功能讓玩家感受真正次世代的遊戲魅力。而作為本活動的主打遊戲，《Sunset Overdrive》給予@肥狗仔@的深刻印象到哩一個moment仍然揮之不去。各位動作game迷如果嫌喪屍太悶不妨可以考慮吓哩款《Sunset Overdrive》。

活動花絮:

marcolau

唔係講笑，mytv最吸引。

原明

呢句真！

wkkevin

佢話強化版mytv遲d有

@肥狗仔@

wkkevin 發表於 2014-9-23 23:09
佢話強化版mytv遲d有

多謝Ching幫我推post，但再有第四發我就刪喇。

小瑟

SORRY, 我以為佢出錯, 我殺左了!!!