黃貫中：搞夢幻狗婚禮

pochacco161 · 發表於 2012-6-11 16:06

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

現年48歲的黃貫中（阿Paul）年底跟相戀十四年的女友朱茵，同步進行結婚生B，被貶為「窮Paul」的他為求女友嫁得「得體」，將送贈巨鑽戒兼搞夢想狗婚禮。提到首次和未出世的BB「見面」，他形容自己「傻咗」！今日開始，阿Paul一連五日細訴他的愛情、親情、兄弟情……

我打算做完紅館演唱會後，年底就同朱茵結婚，希望Ada（經理人）畀個幾兩個月時間我籌備婚禮，畀時間我哋出去玩吓啦，結完婚就開工好冇癮，咁結嚟做乜啫！阿茵都有同我傾過結婚嘅事，到底喺香港擺定喺外國搞就未定，但佢唔想鋪張，因為怕煩，我就覺得終身大事，點都要結得好好睇睇，擺酒請啲親戚朋友食餐飯。

沙灘婚禮

有傳媒朋友同我講過阿茵嘅夢想婚禮係有陽光同海灘，如果佢真係想嘅咪去沙灘搞囉，最頭痛係如喺外國搞，咁點請晒成班親戚朋友去呢？嗰筆旅費都幾犀利，唔通請人去飲，仲叫人自費咁老土咩？初時我有諗過搵阿B（意指剛出世的BB）做花仔花女嘅，不過有人話不如搵我哋啲狗仔做花仔花女啦，個提議好好喎，阿茵好鍾意佢啲狗o架嘛。

講真，兩個人一齊最緊要開心，所有儀式、物質都唔重要，但我認為結婚戒指真係唔可以慳，結婚戒指唔通「丁屎」咁細粒鑽石咩？起碼買隻幾十萬、最cheap嗰隻啦，我都儲咗一筆錢，但數目就唔係好大，希望趁仲有時間，努力啲搵錢儲大筆錢買鑽石啦。老實講，女人真係最鍾意係鑽石，以前我有少少鬆動（錢）都會送戒指畀佢，但又唔會好似生日咁一年一次咁送，嘩！搞到變咗到時到候，佢咪好筍？我梗係唔制啦。

見B傻咗
阿茵雖然屬高齡產婦（40歲），但我完全唔擔心佢嘅健康，醫生睇得好實，一個月做產檢一次，我有同醫生講過，可以幫阿茵做嘅檢查，唔理要幾貴、幾多錢，全部都幫我哋做晒佢。

記得第一次同阿茵做產檢，喺個巨型mon見到BB，我真係傻咗咁望住，BB好細粒，見到佢頭仔、手仔，有種好奇妙嘅感覺，心諗呢個就係我同阿茵嘅crossover嗱？第二次，就見到佢已經有眼仔，再最近一次，就睇到佢喺個胚胎度「sir sir吓」好似「sir」滑梯咁，仲影到佢用手住咗對耳仔。

BB名我仲未諗到o架，等阿茵生咗出嚟先決定啦，但我一定會陪阿茵入產房，我預咗幫BB剪臍帶添，仲預計埋將來我實做奸嘅角色。

其實生男、生女都大劑，生仔就最驚佢大咗由男變咗女，如果生女就真係好大鑊，我都懷疑自己係呷醋外父，有男同學打嚟搵我個女問功課就喝佢「問乜嘢功課呀？問我啦！」、「你啲紋身做乜呀，花喱花綠咁？」反而阿茵似乎好鍾意，佢都有問我好唔好生多個陪BB，我就同佢話生咗呢個先算啦。

筆錄：音樂組

口述：黃貫中

場地：the whiskey priest@蘭桂坊

服裝：RRL@WDSG

髮型：Matthew Kong@headquater

化妝：Jonathan Li @Mod Makeup Academy