有冇人的太座係呢間變態公司的客仔
[香港股票資訊]踢爆現代美容掠客煉金術@ 2008-09-12 23:13:05
2006-02-02NextMagazine送雞迎狗，去年港股雞犬皆升，近兩個月掛牌的新股更未嘗一敗，誘使不少公司，急急搏大霧上市骨水。上週五，現代美容趁農曆年假前公開招股，集資一億九千萬元。
現代美容創辦人曾裕，由化妝品小姐做起，二十年間攀上上市公司主席之位，表面是個白手興家的奮鬥故事。可惜經營手法一向為人詬病，客戶常投訴其推銷手法卑劣、預約困難、療程安全有問題等，本刊更發現其入賬方法奇特、盈利水分極重，上市後隨時爆煲。
上週四的記者會上，快將榮升上市公司主席的曾裕，身穿紫色絲絨套裝、手挽Gucci手袋，打扮高貴；收起了兩年前與梅艷芳經理人王敏慧「互片」的氣燄，顯得步步為營。
記者問：「集資會用喺大陸咩項目度？」曾裕無厘頭地答：「我哋喺香港有十五年歷史，大陸係一個好好嘅市場。」記者一怔，再問：「咁即係咩？」她繼續扮演讀稿機器，照背道：「咁我哋有五個品牌啦，好多元化，有瘦身、美容……」答非所問。
唯獨記者談起現代美容投訴多，才觸動到曾裕的神經，她慌忙反擊說：「我哋有網上booking，又有電話專人booking……每次客戶離開要填問卷，絕大部分都好滿意。有啲客投訴完，經解釋後，甚至會寫讚美（揚）信！」
讚揚信是否子虛烏有，無從稽考。但肯定的是，在過去三年，本刊共接獲七十宗針對現代美容的投訴，消費者委員會則收到二百六十宗。
欺客招數罄竹難書
現代美容全港有十五間分店，堪稱業界龍頭。上市前，公司將業績砌得靚一靚，去年盈利升逾七成，至一億五百多萬元。不過其中五成六盈利，全靠過期的美容套票貢獻，皆因該公司所售的美容套票，三年內不用便自動報銷。
出名預約難過登天的現代美容，變相無本淨賺，客戶如許小姐卻欲哭無淚。
○二年，許小姐一擲萬元，於現代美容買下一百次的全身按摩套票。落疊後，才發現預約困難。「我唔使返工，咩時間都可以去，但星期一至日，可以咩時間都無位。」她每天忙於致電各現代美容分店預約，由馬鞍山約到中環，哪兒有位便去哪兒。
不久，許小姐發現幫襯愈多的人，便愈容易預約。「佢哋真係好厲害，四、五個人圍住你輪流講，我試過一次下晝兩、三點做完facial，搞到夜晚成九點先走得甩。」她說：「我後來直情唔敢帶信用咭去，更試過衝出去鬧個經埋，你究竟要我買幾多嘢先夠？」
幾年下來，許小姐共買了五十萬元療程，職員見她已被搾乾搾淨，便又冷淡待之。「嗰種感覺好難受，點解我俾咁多錢都要求人？」許小姐道。
上市前銀二億四千萬
*此為曾裕母親張妙紈之董事提款，本應於上市前歸還，但現代美容招股書以其母年邁為由，自動解除有關債項。
特殊員工訓練
現代美容教導員工，亦有一套。一名前員工李小姐踢爆：「上司教我哋，啲客嘅套票大概用咗五分一，就要開始谷佢買嘢，問多幾次唔買，就唔好俾佢book咁多，引吓佢。有個別分店嘅經理甚至會整張黑名單。」
員工搏命，皆因新入職的美容師，每月底薪僅得五百元。想收入多點，便要強力推銷，賺取高達百分之六的佣金。一名已離開現代美容的律師說：「呢個可算係現代美容嘅文化，同樣係美容師，有啲人一個月出千幾蚊糧，有啲出五、六萬，差距超大。」
「有時生意唔好，公司就要我哋孭數，跑唔夠數輕則深夜十二點都唔使放工，重則自己買啲product（產品）番去填數。」前員工續說。為摸準客人心理，內部更備有客人跟進表，供美容師寫上對該顧客的評語，例如寫「個客出口講到好憎Modern Beauty」，就要暫時停止疲勞轟炸式推銷；甚至寫「＃％？！」來埋怨客人。
憑這些絕招，現代美容成功招攬近十五萬名客戶。以曾對本刊投訴的客戶計，每人動輒幫襯二、三十萬元，最高更達八十萬元。
勁鑽法律漏洞
當然，不是個個客戶都任人宰割，近三年就有五十個客戶曾入稟法庭向現代美容追討，但結果大多不得要領。曾入稟小額錢債追討五萬元的蔡小姐指出：「講出嚟好笑，一間就快上市嘅公司啲單據，全部係手寫，問極都唔肯印張列齊所有course嘅單俾我。重要特登寫啲暗號，『十次手』、『508』，即係咩？點拎嚟做證據？我樓下茶餐廳都有電腦打單啦。」
就算手持電腦單據的許小姐，同樣無功而還，「買嗰時話係一百蚊一次，四萬蚊有四百次。點知張單寫一千蚊一次，四萬蚊買得四十次，其他三百六十次係送嘅！」
其實，手寫單、送免費療程，不但叫消費者難以追討，更對其會計入賬大有幫助。香港會計師公會財務報告準則委員會副主席丁偉銓指出：「美容套票嘅入賬好似餅咭咁，當客人兌現咗，或者過咗有效期，先可以入賬。」
譬如說，一個客戶幫襯價值一萬元，合共一百次的套票，若平均分配，每完成服務一次，便可入賬一百元。但現代美容將一百次拆分為十次收費、九十次免費，即係每次一千元，那麼客戶只須做夠十次，公司已可全數入賬。成本不變，但會計上的毛利是原先的十倍。
靠財技上市遲早爆煲
「上市前做大個盈利，將啲不良資產押後，錢就收足晒，但成本其後先會滲番出嚟，唔使一、兩年即刻現形。」一名資深會計師說。
事實上於九九年，現代美容已找過南華證券洽談上市，有份參與策劃的現代美容前高層指出：「嗰陣時我哋年結，喺外邊未用的套票已經有兩億幾，呢啲文件印兩日都印唔晒，會計師話要全部列作負債，嚇到南華都打退堂鼓。」
本來不諳財技的曾裕，隨即學精了。據現時招股文件披露，現代美容客戶共有五億六千萬元美容套票未用，但計及手寫單、免費療程等，實際數字隨時多好幾倍。
一張美容床起家
四十四歲的曾裕，原名曾庚蓮，現時身家逾十億元，家住價值二億元的赤柱獨立屋，名下有齊賓利、保持捷及林寶堅尼等六部名車。但童年隨父母從大陸來港的她，家境本來十分清貧。加上任職建築判頭的父親，好到花廳跳舞及賭錢，月頭俾家用、月尾又取回，甚至對其母親動粗，所以自小她便培養出堅強好勝的個性。
為了自力更生，中五還未畢業，曾裕便跑到以前銅鑼灣大丸百貨的美容櫃位做化妝品小姐。一位認識曾裕逾十年的朋友說：「佢同我哋講，當時佢成日同雪肌蘭個老細劉陳小寶，爭做全場咁多個櫃位嘅top sales。」
劉陳小寶說事隔廿年，已記不起細節，但仍有印象：「雖然我哋唔同公司，但印象中，佢做嘢都幾拼搏。」
打工儲夠錢，八五年曾裕便與任職髮型師、當時的丈夫鄺炳申合資創業，第一間鋪設銅鑼灣渣甸街人人商業大廈一樓。「廿年前美容都無咁興，間鋪主要係做剪頭髮嘅，曾小姐喺裡面有間房仔做吓facial，不過後來美容反而重掂過剪頭髮，先打通埋隔籬鋪，轉做美容院。」於人人商業大廈開設旅行社逾廿年的黃先生憶述。
繡眉絕學食腦發圍
鋪頭太細，本來難有發圍，但曾裕在八七年認識了一名貴客，富商陳瑞祺新抱、廣東省政協陳經綸的老婆張瑛，成為其人生轉捩點。陳經綸說：「我老婆上佢鋪做美容，傾開偈，Joyce（曾之洋名）話咁做落去都無咩前途。我老婆就諗住幫吓佢，提議不如一人夾啲錢，轉間大鋪。」首間於怡和街近二千呎的現代美容，因而正式誕生。
合作一年多，陳太因事忙，而將股份全數轉讓給曾裕，現代美容隨即急速擴張。「曾裕的確係有啲橋，好似用信用咭分期嚟買package呢招，差唔多佢係全行首創；又例如一塊collagen（骨膠原面膜），當時好貴，唔係人人用得起。佢將一塊剪開五份嚟賣，一啲幫客敷眼，一啲幫客敷面，賺到盡。」熟悉曾裕的朋友說。
手法新奇刁鑽外，曾裕亦以勤力見稱，經常於辦公室留至半夜兩、三點，第二朝早九點，又到分店替客繡眉，「佢呢瓣手藝特別了得，啲客指定要搵Joyce做，嗰時Joyce講緊有幾億身家，佢都照落手落腳做。」 唔信男人情路坎坷
事業一帆風順，相比之下，曾裕的感情路，卻波折重重。
曾裕在訪問中自言，「完全不信任男人」。她父親拋妻棄子；初戀男友，騙去她所有積蓄，令她每天只能吃菠蘿包充飢；不足廿三歲，更婚姻失敗，與首任姓莫的丈夫離異。
不過，她仍屢敗屢戰。與第二任丈夫鄺炳申，表面上同心打拼，但翻查公司註冊紀錄，他們旗下的公司，全由曾裕持股九成九，丈夫僅得象徵式一股。
這對患難夫妻，更未能共富貴，最終於九八年離婚收場。「嗰時佢（曾裕）都發咗達啦，全部公司、物業，都係寫自己名。佢都好絕情，只係俾番個愉景灣俾Danny（鄺之洋名）。」一前高層說。
其後鄺炳申自立門戶，創辦凱撒會美容中心，曾裕不但入稟控告他離任時提走部分客戶資料，索償二千九百萬；在生意競爭上，亦處處留難，「現代美容喺雜誌落廣告，要求sales一定要落喺凱撒會前面。凱撒會搞高溫瑜伽、水療，曾裕就即刻跟住嚟打，佢個人就係咩都要做到最絕。」曾裕的朋友說。
被連番狙擊的鄺炳申，旗下的凱撒會，只得三間分店；家住愉景灣，出入以經濟實惠的豐田代步，與前妻相形見絀。離婚至今事隔八年，記者上週找他傾談，他依然聞曾裕色變，立即急步上車離開。
對曾是枕邊人的前夫都心腸硬，對外人更甚。○三年，曾裕邀請梅艷芳任代言人，鏡頭前以姊妹相稱，但阿梅去世後，便立即變臉追死人錢，入稟向Mui Music追討二百三十萬元賠償。
美容修身股危危乎
本港多間上市公司均經營美容及纖體業務，不過莎莎、奧思、卓悅，均以零售做主打，比重不大。與現代美容較近磅的，有創業板掛牌的修身堂及變靚D。
由於行業競爭太大，上市近三年的修身堂已經露底：由去年大賺三千萬元，到剛公布的中期業積，卻勁蝕一千七百萬元，毛利較去年同期下跌三成，股價更由高位回落七成。
現代美容上市集資，說要為進軍大陸鋪路，其實內地搵食之難，從修身堂業績見紅，便可知一二。另一致命傷，是纖體美容公司一向要落重廣告吸客，現代美容就更不惜工本，單計去年一月的廣告開支，已逾三千萬。「呢行好飄忽，好靠廣告，就算你今年搶到一萬個客，下年都未必有。」一名零售股分析員說。
員工條款尖酸刻薄
員工近千人的現代美容，差不多每星期都刊登招聘廣告。
新入職的美容師，每月底薪僅五百，附有四千元獎金，但派發與否毫無準則，純睇主管心情。曾到現代美容見工的李小姐說：「返工前仲要先俾二千蚊上堂，考試及格，先正式請。」
更離譜的是，除僱傭合約外，員工還要多簽一份協議書：一年內無論辭職或被炒，都要賠償八千八百元。「隨時未返工，已經俾佢罰到破產。」李小姐說。
記者就此個案向勞工處查詢，其發言人表示，雖然不平等條款列於另一份協議書，並非僱傭合約，但由於入職必須簽署，依然「有得拗」，故可到勞資審裁署求助。
恩愛人前無錢過手
兩次婚姻失敗後，曾裕在新加坡的夜店，認識了兼職電視台奀星、比她年輕十三年的李守義，即其現任丈夫。僅得文憑學歷的李守義，夫憑妻貴，成為現代美容的副主席。他倆經常聯袂出席公開場合，在鏡頭前晒恩愛。
但其實一直都無錢過手，據招股書資料，貴為丈夫兼副主席的他，無股份兼無董事酬金；但曾裕自己，則趁上市前拎走公司二億四千多萬元，袋袋平安。
如此自我保護，與她學歷不高不無關係。「佢覺得全世界都想搵佢着數，蝦佢唔識英文，所以連律師房都要裝偷聽器。」曾裕的朋友說。一位已離職的法律顧問亦坦言：「啲法律文件佢明明唔識睇，但樣樣都要俾意見。」
對男人、朋友、員工，曾裕全都缺乏信任，她名下數十間公司，大部分都由她的兩個兒子莫家豪和鄺旨呈出任董事，傳聞大仔患病，幼子連中五還未畢業，閒來更愛追明星。甚至她目不識丁的母親張妙紈，亦有份「管理」公司。
張妙紈在九九至○四年任職董事期間，曾提取公司逾八千萬元，本應於上市前歸還，但曾裕一句，因其「缺乏財務資源及年紀關係」，便放棄追討。
「識佢的朋友，都覺得佢好lonely（寂寞），凡事去得太盡，結果自食其果，段段感情都唔如意，將自己封喺個箱裡面。」曾裕一好友感嘆地說。
炒樓賺二千五百萬
曾裕現手頭僅餘一間價值二億元的赤柱村道獨立屋作自住，及一個價值一千二百萬元的加拿分道鋪位。
不過，機關算盡的她，已將兩個物業租予快將上市的現代美容，前者用作董事宿舍，後者為鋪位，每年租金穩袋逾四百萬元。 我有朋友在這間內面公司做美容師,
据聞老細超級變態同心理不平衡,
經常要用私人時間返公司或寫字樓上堂,
唔係一般公司所謂員工訓練,
而係講耶穌 / 聽聖經(因為老細信耶穌),
而且每朝開工前強逼指定讀一篇聖經(個個月都有新嘢)
而且每日要賣指定金額的美容產品俾客人,
如果當天冇數,d經理就克意留難,
收工時間要留下半小時才可以走,
如果店鋪冇生意冇客,又要員提早返工(不計工時)上街派傳單拉客
攪到完全冇晒私人時間同休息時間 現代美容1週刊比距5個劣{:6_146:} 2011年POST番2006年新聞,咁大仇口!? 只因間公司太變態{:6_199:}
我有朋友係受害人之一{:6_202:} 我有朋友在這間內面公司做美容師,
据聞老細超級變態同心理不平衡,
經常要用私人時間返公司或寫字樓上堂,...
snoopyboy001 發表於 2011-5-3 20:22 http://www.post76.com/discuss/images/common/back.gif
佢真係教徒??
教徒唔應該有佢咁嘅行徑...
仲有傳福音呢樣野, 係唔應該用強迫去做 本帖最後由 snoopyboy001 於 2011-5-4 19:10 編輯
佢老細係唔係真正教徒冇人知,
但我朋友話有同事係信其他宗教的,
曾經同佢公司經理講可唔可以唔讀聖經(每日早會&唔出席傳道)
D經理話可以,妳唔係呢間到做就OK了
咁話打工的可以點樣{:6_180:} 唔係呀？佢地係邊間教會？咁仲話信教？ 咁就不得而知了{:6_194:}
但就我知,
三月份佢哋有一朝去秀茂平某社區會堂聽傳道
上月也有一朝要去太古地鉄站口附近小學後社區會堂聽傳道
頁:
[1]
2