【小瑟影評】賀歲片《金多寶》：笑中帶淚嘅溫情作
【小瑟影評】賀歲片《金多寶》：笑中帶淚嘅溫情作，淨係睇正哥、鍾雪、蝦頭、燕玲姐已經值回票價！琴日去咗睇《金多寶》VIP 友好場，作為今年嘅賀歲片，整體來講係相當唔錯嘅。呢套戲唔係純粹嘅胡鬧爆笑，而係走「有笑有淚」嘅路線。戲入面有好多位都幾感人，可以令小瑟喊得出幾轉 😭。而笑位方面，佢唔算係嗰種「笑到斷氣」嘅大爆笑，但勝在幽默感處理得幾自然。
今次難得見到正哥（李尚正）擔正做主角，表現都尚算紮實，但就未能發揮佢最勁嘅嘢，可能係個角色嘅問題掛。而鍾雪瑩同金燕玲兩位實力派係最搶戲、最帶動感情位嘅，感情爆發都係由佢哋兩個帶出；蝦頭（楊詩敏）同細佬（李鎧霖）表現亦都恰如其份，做好角色本身。
反而《金多寶》劇情之中帶出好多彩蛋位，啲彩蛋（角色）一出場，完全係驚喜有餘，仲要即時深受感動！不過小瑟廢事劇透就唔多講了 🤐！至於大家關注嘅 Edan（呂爵安），今次角色定位比較似「助攻」，戲份雖然唔算極多，但發揮到應有作用。
導演翁子光過往執導嘅多數係嚴肅題材，好似《踏血尋梅》、《風再起時》或者最近嘅《爸爸》。今次係佢首度挑戰編導賀歲片，明顯感覺到導演想放入好多唔同嘅元素入去。對於睇開翁導作品嘅影友，收到嗰啲 Point 嘅話會會心微笑；但如果收唔到嘅，可能會覺得有啲位「一頭霧水」。
雖然喺賀歲片嘅節奏掌控上，翁導尚有進步空間，但以一套感人、溫馨又開開心心嘅電影來講，呢套戲喺呢個新年係可以開開心心地深受感動之作！🧧✨
翁子光賀歲片《金多寶》現已上映✨
【導演 編劇】翁子光 @yungtszkwong
【監製】孫霏 @effysun
【主演】#金燕玲 #鍾雪瑩 @csy #呂爵安 @edanlui #李尚正 @leeching_jiro #楊詩敏 @yeunghatou
加油!
頁:
[1]