戲院出路? $250 45分鐘睇 VR 演唱會
本帖最後由 erinerin 於 2025-8-25 12:19 編輯戲院出路? $250 45分鐘睇 VR 演唱會
觸手可及嘅花美男 體驗車銀優 VR 演唱會：MEMORIES
我要宣佈，我終於可以見到我韓國男朋友 車銀優...嘅 VR 演唱會啦🎉 喺車銀優入伍之前，再見多佢一次!!!! 作為啱啱飛咗車銀優嘅人生贏家，我哋將會緊貼車銀優體驗由失戀、復合 到再次戀愛嘅過程～ 唔計戴 VR 眼鏡嗰 10 分鐘，成個觀賞全程 45 分鐘，J 足 45 分鐘!!!
喺工作人員指導下戴上VR眼鏡，戲院官網都寫明「建議佩戴隱形眼鏡」，之前小編睇 TXT 果陣係戴 Con 體驗嘅，戴上頭只需要調整鬆緊度就可以輕鬆戴上～ 不過今次小編就冇戴 Con 而係戴平時果啲近視眼鏡，鏡框都算大，所以戴上 VR 眼睛後，眼鏡係有少少頂著個鼻，VR 眼鏡佩戴位置唔正確有機會導致睇得唔清楚～ 大家入場時就記得注意啦~
VR 演唱會不愧係打破第四面牆嘅發明，令觀眾可以俾起現實生活中，極度近距離咁睇清車銀優塊面，車銀優作為 K-Pop 現役「韓國第一面孔」!! 一顰一笑都掀起所有觀眾花痴笑同尖叫聲，現場氣氛非常熱烈!!!
唔知道大家有冇玩過 Gal Game (代入男主角同時攻略幾個女仔遊戲)，入面最引人入勝嘅當然係透過對話環節唔同嘅回答，會改變結局走向。今次 VR 演唱會同樣有類似嘅互動環節，俾大家選擇唔同嘅「答案」而出唔同嘅畫面!!! 想睇曬三款，就唯有三刷先得啦~~ 「睇戲」能夠自主改變故事走向，的確係一個非常新奇嘅玩法，令觀眾置身其中，真係做到「沈浸式體驗」!
今次呢個全程 45 分鐘嘅 VR 演唱會體驗作為 車銀優粉絲，對於偶像嘅表現無論如何都一定滿意!! 至於落翻嚟「戲院 VR 體驗」，視覺畫面顏色對比夠鮮艷，但冇閃爍刺眼感；當所有物件透過 VR 技術放大咗之後，畫面銳利度就提高咗，而且明顯感受到細節經過處理，尤其係面部皮膚等。目前韓星嘅 VR 演唱會都以人物表現、音樂嘅「現場感」為主，故事情節、背景、真實感呢啲反而係其次，同「一般電影」追求「絕對真實感」嘅概念非常唔同。下一套 VR 將會係 ENHYPEN 嘅演唱會，唔知大家又會唔會入場感受下呢？
頁:
[1]