【會後討論】KEF XIO Soundbar 音樂 x 電影體驗會✨
🔊 重新定義 Soundbar - KEF XIO 5.1.2 震撼登場 🎬🎵 電影、音樂一網打盡體驗會現場精華！🚀【CC字幕｜活動精華】https://youtu.be/iKahIJvCx8E
重新定義你嘅Soundbar新玩法
KEF XIO Soundbar 音樂x電影體驗會
今日我哋喺中環 KEF Music Gallary 同各位 myKEF會員，Post76會員 一齊試玩呢條 Soundbar 嘅革命性產品 KEF XIO 5.1.2 Soundbar!! 究竟呢條 Soundbar 係咪真係做到 Hi-Fi級別嘅 音樂+電影體驗。各位真實版友同玩家聽完，又有咩真實嘅感想同評價?! 我哋好想知道大家睇法！！ 快啲留言話俾我哋聽啦!!!
我哋會選出六個「最正嘅」留言，送出由 KEF 同 Post76 精心準備嘅小禮物!!!!
獎品：
1. KEF x LOTUS 1:18 汽車模型 (名額一個)
2. dts:X示範4K UHD影碟 (名額五個)
活動截止：2025 年 7 月 31 日(星期四)
參加資格：出席是次活動嘅 myKEF 會員* 同 Post76 會員
領取方式：Post76 將會透過報名時嘅資料，透過 Whatsapp 或者 電郵聯絡得獎者。
* Post76 將會與 KEF 確認得獎 myKEF 會員的資料，留言即代表同意。
** 其他詳情將會稍後公佈
本帖最後由 erinerin 於 2025-7-19 16:10 編輯
早前聽到 KEF 話出條單體Soundbar XIO 賣到萬七蚊，真係有啲驚訝。考慮到 KEF 近年嘅一體式串流喇叭喺非發燒友市場頗成功，都有諗過係咪賣樣多過賣聲，純粹為咗賣畀注重外觀嘅大眾用家呢？但今日去 KEF Music Gallery 試聽後，就發現係我錯。
講外觀，XIO 的確係做得靚同有高級感，精細嘅布面網配合金屬飾面，望落雖然冇 B&O 嘅咁豪華，但設計上我會覺得係值依個價。講體積，闊度及高度同其他有 subwoofer 嘅soundbar 差唔多，最多都係深少少，而個深度就源於佢採用來自同廠超低音嘅背對背低音單元設計。
講聲的話，大部分 soundbar 嘅死穴係聽歌，普遍而言都係又乾、又薄、又散，就算係某電視廠嘅萬元級旗艦，聽歌我認為都係連三千蚊嘅一體式串流喇叭都不如。但 XIO 嘅表現好有驚喜，使用只用左右聲道嘅 direct mode，雖然音場嘅闊度受 soundbar 長度限制，但居然可以呈現到音場嘅深度。如果係用會自動將聲音分配去其他聲道喇叭嘅 default mode，更加可以做到從喇叭正面扇型向後伸展嘅闊而深音場，依點完全係得益於 DSP 技術進步帶來嘅優勢。
但 DSP 唔係萬能，要做到飽滿、細膩嘅聲音，就係喇叭單元、箱體設計同擴音線路嘅功勞，依點亦係 XIO 最煞食嘅地方。播放音樂時，佢嘅聲音密度好高、好飽滿，而且聲音嘅細節頗豐富，聽落接近 LSX 嘅水準。雖然喺大音壓下嘅聲音冇 LSX 咁乾淨，但考慮到咁細嘅箱體有咁多單元喺大音壓下發聲會承受好大嘅壓力，而且該音量係我用大喇叭聽都會覺得大聲嘅程度，依個表現已經比幾乎所有 soundbar 優秀。低頻嘅下潛力雖然受到單元尺寸物理限制，但能量感相當驚人，喺大音壓下居然做到震梳化嘅效果。整體嚟講我之前淨係喺一款單體 soundbar 聽過依個水準嘅聲音表現，就係 Sennheiser AMBEO Max，但 AMBEO Max 價錢更貴，體積仲要大好多。
至於比較多人著重嘅多聲道表現，XIO 我覺得都係十分有驚喜，喺恰當嘅環境下，甚至同有實體後置嘅 soundbar 有得 fight。我先喺面積比普遍家居客廳大好多嘅大房試音室試聽喺極限情況下嘅效果。依間房不但冇側牆同後牆反射，甚至連天花都因為採用通窿設計而做唔到有效嘅反射。但喺如此不利於 soundbar 嘅環境下，音場仍然可以好似有個圓罩咁包住坐位同 XIO 之間嘅位置，同時聲音嘅密度亦足夠。
之後去咗試音室外接近一般家居環境嘅空間，依個位置有平滑嘅天花，而且聆聽位置接近後牆，只係側牆位置比較遠。喺依個空間之下，環繞聲效果就非常強烈。天花聲道及後方環繞聲嘅包圍感極度明顯同立體，而且聲音亦唔含糊，依個效果比某啲我試過有實體後置嘅 soundbar 仲要好。側環繞聲嘅效果就因為離側牆較遠，相對之下就弱少少，但前側及前面上方環繞聲嘅效果唔錯，明顯聽到音場又大又闊嘅效果。慶幸 KEF 嘅代表話遲啲會有軟件升級，可以連接 LSX 系列做環繞聲喇叭，咁的話就可以解決埋冇側牆/後牆作反射嘅問題。
另一個我對 XIO 好滿意嘅係低頻表現，同之前聽歌嘅表現類似，雖然下潛力受限，但能量感強勁，非常結實同爽快，唔會有好多 soundbar 隻超低音質素良莠不齊令到低頻又浮、又散、又慢嘅問題。加入 KC62 超低音後，低頻量感唔係增加好多，但下潛力同層次感明顯有改善，最重要係低頻嘅速度不減，以非主打發燒友市場嘅產品嚟講，依種主打快、狠、準而唔係一味多 bass、boom boom boom 嘅聲音取向的確十分難得。
講真，我以前都對高價 soundbar 有啲質疑，覺得去到接近二萬蚊，不如買套「蛋仔」5.1 衛星喇叭組合夾 AV Amp 好過。但自從三年前聽過某位用緊 KEF「蛋仔」喇叭 HTS2001 嘅朋友換咗韓國某電視廠嘅萬元級旗艦 soundbar 後睇戲效果更好，就令我驚歎科技進步對音響發展都有好大影響。如今終於等到 KEF 加入 soundbar 戰團，價錢雖然唔平，但交足功課，對想儘量簡化系統，要靚仔，而又想要有一定音質水準嘅玩家嚟講，真心值得試吓先再決定。
本帖最後由 KHim 於 2025-7-20 01:59 編輯
首先多謝Post76 & KEF合辦今次嘅體驗會🫶🏼
我自己本身廳就用緊Samsung嘅soundbar睇戲（玩緊9.1.4），喺房聽歌就用KEF LSX II。最初睇到小瑟介紹尼條XIO soundbar嘅YT片，我都抱住一個疑問 用soundbar聽歌得唔得㗎？KEF做書架喇叭就話靚聲啫，依家玩soundbar，仲要睇戲聽歌都得？咁來都來了，冇理由唔試真啲㗎🙂↕️
畢竟喺坊間市面上好多主打睇戲嘅bar用嚟聽歌嘅音質都麻麻。但係今日上到嚟試聽完之後，我狠狠俾條bar冚咗一巴😂佢用實力同你講，不論睇戲定聽歌，佢兩樣都咁得。
頭先第一樣嘢試嘅就係打機。用PCM未開atmos嘅時候，空間感方向感有嘅，但唔強囉。特別係冇咗天空聲道，硬係爭緊啲嘢冇咗一浸聲咁。但一開返Atmos，成個氛圍感完全唔同晒。空間感嘅氛圍即刻強咗好多，物件方向嘅指向性都好明確。天空聲都有返比你即刻成件事圓滿咗。
之後去試聽歌，冇加十仔嘅情況下，一開聲真係驚艷到我。完全冇諗過單體一條bar，結他嘅低音可以咁厚實，而人聲同其他濕碎嘅丁丁聲，高中頻都係清晰聽到，佢係比到一個同LSX II一樣嘅feel你（可能做到嘅音場冇書架喇叭咁闊，但係以香港普遍屋企個環境嚟講，擺廳度聽游刃有餘）。KEF嘅Uni Q MX單元真係好勁，有料🫵🏼不過6個mode入面我都係鍾意「直出」嗰個mode多啲🤌🏼
而到睇戲部份。唔開隻kc62就咁用條bar試，我真係…嘩… 頭先小瑟都睇到我哋心中嘅疑問「真係冇開隻十仔？真係冇加多兩隻天空喇叭？」而佢又真係冇開隻十仔，天空聲道就係條bar嗰兩隻喎，佢尼下先勁🤌🏼 （如果到時加埋後置仲得了嘅😳）唔開十仔已經震梳化，開埋kc62簡直可恥同主角一齊上戰場咁（冇十仔加持都有咁勁低音，都係多得嗰4隻背對背擺位嘅P185低音單元加上P-Flex嘅功勞🙂↕️）試CA4，CA同Falcon飛來飛去炮彈嘅軌跡，係好明確話俾你知佢由邊度飛去邊度。試Netflix 嗰套打仗片更加，槍林彈雨子彈好到位，炮彈爆嗰下個震撼感都好勁。但開埋kc62，成個氛圍，每一下嘅子彈、炮彈爆嘅每一下都在更加實在，真係下下揼心口。
試Atmos嗰隻碟嘅時候，嗰個空間氛圍咁勁到一個點。你係唔會諗到一條唔算大體積嘅soundbar，可以做到啲方向感只係成可以咁鮮明，就算冇後置都好，佢都可以做到好似有隻後置，你好明顯可以感受到嗰樣嘢係圍住你走。我當下都周圍望咗幾次😂而事實又真係淨係條bar出聲。而天空聲道前面嗰浸都好鮮明，特別係落雨嗰下。不過我覺得始終0.2天空聲就遜色咗少少🤏🏽，我個人就偏向0.4天空聲道🫣如果天空係0.4Channel就完美啦🤤仲有最估唔到嘅就係，咁嘅size嘅soundbar嚟講，做到咁嘅空間感，出到咁重嘅低頻俾你，已經係超班
不過講到底，要做到睇戲有震撼感，聽歌唔走聲嘅情況下，都好靠佢嗰粒MIE晶片可以做到睇戲聽歌雙修👍🏽
好坦白咁講，個價錢係貴得啦。但係依家香港寸金尺土嘅環境，又想睇戲有震撼感，又想有一對聽歌靚聲嘅喇叭，尼條XIO soundbar絕對幫到你。一個價錢，兩種享受。🙂↕️
Btw如果到時有得加埋隻後置之如，仲可以加多兩個天空聲道，就真係兩全其美🫢希望下次活動可以多啲時間大家傾吓偈啦🫶🏼 好榮幸參加KEF X10 5.1.2 Soundbar體驗, 在part one介紹使用apps設定Soundbar 擺放位置聲音各項都非常清晰, Hugo在PS5遊戲中使用不同聲音例如Default, Direct和Music場景等,最終以music mode在遊戲中音色明顯提升和特出. 小瑟使用KEF apps來介紹用不同模式聽歌, 但以direct模式能將整體音樂聲場明顯提升. 在插放電影時KEF X10 soundbar 用上Uni-Q Mx 和P-Flex雙獨家單元能發揮3D音效和沉浸式音場, 就算沒有加上subwoofer 低音都非常足夠. 而且KEF X10內置W2無線串流連接Tidal,Spotify等等,還可以少數支援384kHz/24bit音質.在KW2 RX接收器方面可同時接上多個Subwoofer非常犀利. KEF-SOUNDBAR（17000幾港元）KEF-SOUNDBAR效果和其他牌子SOUNDBAR比較 真係估你唔到， 聽歌睇戲低頻 包圍咁都強勁， 睇戰爭片的時候我仲以為天花板有對喇叭係度其實係冇， 總之以SOUNDBAR呢講KEF-SOUNDBAR冇得輸👍 本帖最後由 VincciChan@G 於 2025-7-21 00:42 編輯
第一次參與Post76既活動，亦都係第一次上KEF Music Gallery，成個體驗非常新鮮，過程亦好流暢。
作為最近先入坑既女性新手用家，呢段時間都同男朋友試聽咗好多唔同品牌既音響產品。現時屋企用緊Samsung Q-Series 11.1.4 既Soundbar睇戲，聽歌就用緊B&W既書架喇叭連線Tidal。一路都冇諗過，市面上會出現一個soundbar除咗睇戲仲可以兼顧埋聽歌既部分。香港寸金尺土，做到一石二鳥既產品絕對會係最大嘅吸引力。
首先PS5打機既部分，可能因為示範既空間比較大，我哋喺中間第二排聽出嚟嘅感覺未係最準確反映到XIO既表現，不過開咗Atmos之後可以好直接感覺到立體感強咗好多，金幣叮噹叮噹聲清脆咗，飛行聲效既方向性都明確咗。我地之前喺屋企都有玩過同一隻game，當然有埋後置喇叭環迴感會強啲，但單單以KEF一枝Soundbar都做到咁既效果已經相當唔錯，放返落家居環境應該會好出色！
至於對XIO最大嘅驚喜絕對係音樂同電影試聽既部分！小瑟揀選的段落完全體驗到呢個產品既優點！
令我印象最深刻既係Michael Jackson首Black or White開頭既拍門聲，真實到好似道門就喺眼前一樣。另外，比起Direct mode，個人偏向鐘意Default mode自動補充聲音後既效果，成件事圓滿豐富好多，音場亦深咗。當然不同人口味各有不同，所以有咁多唔同mode for唔同用途同口味係非常貼心。
至於睇電影既表現更加唔使多講，我同男朋友都好鐘意睇戰爭片，《西線無戰事》我哋喺未用soundbar之前已經睇過一次。今次用XIO睇，就算未開Sub仔臨場感已經好強，完全感受到背對背低音單元既優勢，特別個天空聲同尖銳落地既子彈聲都好立體好sharp，體驗會完咗當晚我哋返到屋企即刻又再睇多次套戲對比吓，只可以話5.1.2既空間音效一啲都唔輸蝕，整體性價比100分！
今次KEF XIO Soundbar既體驗會由環境setup、唔同擺位的示範、Spec的介紹，唔同環節都計劃得好細心，聽到意猶未盡~ 如果試聽部份可以長多少少，試聽多一兩個唔同Genre嘅音樂同電影就更好啦！
再次感謝KEF同Post76各位組織今次嘅體驗會！希望以後再有機會參加其他活動，跟大家學吓野交流交流！ GOGOGO, 呢個活動仲去緊架, 如果有興趣就快D留言分享啦~
唔好用GPT呀, 用左都唔好比我知就冇計啦~{:1_338:} 小瑟 發表於 2025-7-23 16:20
GOGOGO, 呢個活動仲去緊架, 如果有興趣就快D留言分享啦~
唔好用GPT呀, 用左都唔好比我知就冇計啦~ ...
仲有得參觀咩！？
各位師兄已經出哂review 喎！ LeoChin@FB 發表於 2025-7-23 19:19
仲有得參觀咩！？
各位師兄已經出哂review 喎！
可能講緊個後續活動仲go緊,精彩留言分享有小禮品送{:6_240:}
頁:
[1]
2