《百劍討妖傳綺譚》中文限定版 開箱 及 Game評
本帖最後由 阿定 於 2025-5-15 16:27 編輯由台灣團隊7QUARK負責開發，GSE全球發行的和風動作角色扮演類Rogue冒險遊戲《百劍討妖傳綺譚》，編輯部已經收到由發行商送來的限定版，等小編簡評一下呢隻遊戲，然後再為大家開箱睇下有幾靚幾值得買啦！
https://youtu.be/ledRt8inuJQ
遊戲簡評
《百劍討妖傳綺譚》是一款結合 Roguelite 與 RPG 機制的和風動作遊戲，玩家可以係三名主角 - 不死忍者「時雨」、地獄鬼差「沙羅」與妖怪武士「竹虎」入面揀其中一個來玩，三個主角的劇情同打法都完全唔同，算係三個平行時空的故事，不過亦會有少量互相穿插的場境，如果玩家想玩晒三個故事，就要分別開三個存檔來玩了。
遊戲劇情充滿搞笑對白，三個主角各自有自己的理由開始去打怪，充滿愛恨情仇，雖然大家的過程都唔一樣，但最終目標都係希望世界回復正常，戰鬥爽快，Boss戰要用少少腦，由於畫面靚，配樂好，唔同類型武器會有唔同音效，所以玩起上來感覺良好，只要慢慢習慣抓準時機，使用相殺技能就會輕易獲得成功感，不過由於係Roguelite式遊戲，死亡後需要由頭開始，可能唔係個個都會鐘意，但已賺取的資源可以Keep番用來升級，所以唔算好難玩，加上資源豐富後，可以解鎖更多技能同武器，喜歡用唔同組合打怪的朋友就會感覺到有更多變化可玩了。
遊戲三位主角都有專屬聲優配音同唱主題曲，時雨 (CV:日笠陽子)、沙羅 (CV: 竹達彩奈) 及竹虎 (CV: 小山力也) ，但最精彩的過場動畫無做到配音，呢點係比較失望的，不過考慮到小型遊戲公司資源有限，開發期間一波三折，不斷延期，開發團隊應該都已經好努力的了，另外三個主角故事雖然唔同，但打的關卡同Boss戰都係大同小異，所以整個遊戲體驗會有少少重複感，不過Roguelite式遊戲本來就會有重複戰鬥的情況就是了，如果再加多點隨機的內容或關卡應該會更好。
限定版大約一個鞋盒咁大，我地收到的係Nintendo Switch版本
限定版外盒正面黑色為主，有標示遊戲名稱
後面有內容物介紹，側面有和風設計花紋
拆開外盒後，會見到同遊戲入面一樣設計的貓貓禮物盒，非常可愛
封面係其中一個主角時雨
反轉封面紙，就會見到另外兩個主角 沙羅 同埋 竹虎 的封面
跟了一本好厚的美術集，過百頁的內容，非常豐富
美術集有大量人設，遊戲設計，勁多繪圖，小編就貼其中一張比大家睇下吧
一套兩款的明信片，用上雷射印刷製作，勁閃勁精美
開信刀有跟埋刀架，係主角時雨用的「櫻吹雪」，金屬製，手感一流
一套48張的日式花牌(花札)，不過小編就唔識玩了
下載數位版OST同單曲的兌換碼，可以到指定網站下載，有高清版的WAV/FLAC檔，亦有通用的MP3/AAC檔可以揀
最後來個大合集團體照，以HKD398的價錢，可以買到咁多內容物的限定版，小編覺得真係誠意滿滿。
產品資訊
遊戲名稱：《百劍討妖傳綺譚》 ( Yasha: Legends of the Demon Blade )
發售日期：2025年4月24日
對應機種：PC / Nintendo Switch™ / PlayStation®4 / PlayStation®5 / Xbox One / Xbox series X|S
遊戲人數：1人
遊戲類型：和風動作角色扮演類Rogue
開發商：7QUARK
全球發行商： Game Source Entertainment
售價：HKD 238 / NTD 1,090
售價（限定版）：HKD 398 / NTD 1,790
遊戲分級：15+
遊戲字幕：繁體中文、簡體中文、日文、韓文、英文、法文、德文、意文、葡萄牙文及西班牙文
版權：©️2024 7QUARK. Licensed to and published by Game Source Entertainment. All rights reserved.
頁:
[1]