2024 終極升級：ATC SCM20ASL Pro
由 2018 年買咗 SCM7 鋼琴漆版開始，我就成為 ATC 喇叭嘅忠實 fans，我好鐘意 ATC 喇叭，因為佢好忠實、平衡，少音染，每次聽完啲音色明顯嘅喇叭再聽返 ATC，就會有種呼吸新鮮空氣嘅感覺。喺我大概100呎嘅聆聽空間入面，其實 SCM7 理論上係夠用，但聽得多超高級嘅系統，就愈聽到佢嘅侷限，例如聲音嘅速度感及密度。其實依啲侷限好多時都係來自擴音機，但問題係可以解決到依啲侷限嘅擴音機，價錢都貴到可以畀喇叭連升兩級，所以點解我唔升級喇叭呢？玩得 ATC 嘅都明白有源版先係最佳解決方案，因為有電子分音，唔使畀被動式分音器分薄功率，聲音會更直接、爽快，而且有源及無源版嘅價錢差距，好多時並唔足夠買部可以推好無源版嘅擴音機，加上可以慳返擺後級嘅位置同配搭嘅煩惱（雖然有人認為係樂趣），所以升級的話我嘅目標一定係有源版。最初我嘅心水目標係 SCM19A，因為佢嘅弧形箱身十分靚仔，但靚仔唔係大晒，佢嘅最大敗筆係高音單元同 SCM7 一樣，並冇用 ATC 嘅高級版高音單元，由 SCM7 升級上去的話，硬係會有種冇攻頂嘅失落感，所以好快就決定揀佢大佬SCM20ASL。
SCM20 同 19 主要有兩個分別，第一係箱體容積多一升，第二係 SCM20 採用同高級型號相同嘅高級版 S-Spec 高音，失真率更低，動態更強。SCM20ASL 有坐地式 Classic Tower 及 書架式 Pro 兩個版本。Classic Tower 雖然可以慳返對腳架，又有較多顏色選擇，但箱體容積都係同 Pro 版冇分別，而且底座亦只係木箱，聲音會冇放喺重型腳架嘅 Pro 咁實淨。加上考慮埋差價問題，Pro 版配腳架會比較抵玩。
Pro 版使用嘅黑色噴漆外觀睇相覺得唔太靚，但實物其實好有型，表面嘅顆粒令佢喺光線照射下充滿立體感，有如高級相機嘅機身質感，相對之下我就會覺得 Classic Tower 版望落有少少老土，唔係話佢唔靚但感覺上就同我間房比較少木色系嘅風格唔太襯。而且 Pro 版喺打理上亦比較容易，唔需要擔心木皮變色問題，亦唔需要擔心鋼琴漆好易花嘅問題。
其實中間仲殺出個程咬金，今年中 ATC 為紀念成立五十周年，推出 SCM20ASL Limited Edition (LE)，採用寶藍色鋼琴漆外觀，前障板包真皮，仲要同 Pro 版一樣採用書架式設計，但價錢就…直接比 Pro 版貴一倍，香港定價超過十萬，雖然真係好靚但亦完全無法負擔。後來喺代理試聽過佢同 Pro 版有咩唔同，兩者分別係有，但唔係好大，LE 聽落會飽滿少少、細緻少少，但真係少少，依個分別遠比 SCM7 普通版及鋼琴漆版嘅分別細，而且理性上我亦覺得依個差距唔值得由 PRO 上 LE，攞依個價差買 SCS70 PRO 超低音帶來嘅提升明顯及實在好多。所以都係買 Pro 版算啦。
當時我都冇計劃幾時會升級去 SCM20ASL Pro，純粹只係有個計劃畀自己作為努力賺錢嘅目標而已。直至九月時代理通知將會加價，加幅亦唔細，所以都係決定入手。但由於當時廠商係落訂後先會開始生產，所以就等咗好耐，好彩都趕及喺聖誕節前送到。
腳架方面，我一開始已經決定買「悅」嘅腳架，以價論料的確十分抵用，而且仲可以按喇叭尺寸訂造。好彩喺買喇叭後冇耐就見到有人賣 SCM20ASL Pro 專用嘅「悅」腳架，雖然欠缺原裝釘墊但價錢超平，就算買返全新原裝釘墊都係相當抵玩。
為咗儘量減少音染，我揀咗 Grimm 嘅 TPR XLR 線，雖然佢價錢唔貴，但依條線喺 ATC 嘅用家群組都有唔錯嘅評價，普遍認為佢聲音細節豐富、中性平衡，同 ATC 喇叭好夾聲。電源線由於冇咩特別啱嘅心水，所以就買咗兩條 I-Sheng 出嘅 14AWG 美式電源線（即係大家口中嘅黑雞線）用住先。唔好笑，其實好多攞佢嚟搵食嘅人都係用依啲線㗎咋，而且依啲「黑雞線」亦係一個好好嘅 baseline 用來喺換其他線時作為參考。
早幾日 ATC 香港陳列室嘅代表「島主」Jacky 通知，話對喇叭終於運嚟香港，最快星期五可以送貨，即刻決定攞半日假接佢入門。雖然遺憾「島主」有其他工作在身，無法一齊開箱安裝，但見佢喺 showroom 都係一個人搬對喇叭上落腳架，再加上聽佢講啲注意事項後就試吓一個人搞唔搞得掂。講真，一隻廿幾 KG 真係重，但只要搵到受力位，一前一後對角線咁逗住，移動距離盡短的話都係OK 嘅，最重要係喺搬起身果下姿勢啱就穩陣。
搞咗一輪開聲聽吓，初聽 SCM20ASL Pro 同之前嘅 SCM7 鋼琴漆版音色差唔多，但聽多陣就發現音質好唔一樣，聲音明顯更綿密，有種好似聽緊耳機咁嘅包圍感，而且聲音嘅層次感豐富得多，尤其低頻部分。有啲過去會聽到低頻 booming 嘅位置，亦明顯清晰咗，同時量感不減。搵部幾千蚊嘅 Matrix Audio Mini-i Pro 4 streamer DAC 出到咁嘅效果，我覺得十分有驚喜。稍為微調擺位後，佢可以呈現出非常龐大嘅音場，但同時結象定位又可以好似 SCM7 咁精細。喺相對細嘅環境之下都有咁好嘅發揮，我覺得好滿意。當然，ATC 喇叭出名 run in 時間耐，聽多半年左右就能發揮更好表現。
不過有得必有失，擺咗對相對大嘅喇叭後，換來嘅係擺唔到大電視，度咗 50寸就已經係極限。但由於我大部分時間都係聽歌多，所以都還好嘅。 換埋部stream dac就不得了{:1_339:}
頁:
[1]