[小知識] 如何善用 Samsung 電視的 Game Mode 功能！
本帖最後由 阿定 於 2024-9-5 17:19 編輯上星期係三星後援會第一次會聚期間，當介紹Game Mode時，原來好多版友都唔知三星電視有[遊戲模式]功能，今次特別作為小秘技，分享個人的使用心得比大家知。
其實自從 2021 年打後推出的三星電視都新增遊戲工具列功能，由早期單純的輸入延遲、FPS(每秒播放畫面)、HDR(高動態範圍成像)、VRR(可變更新頻率)和音效輸出等少量設置外，到今年S95D OLED 再追加了唔少電競Monitor才會有的特別功能，現在就同大家簡介一下吧！
首先當大家插上 PlayStation / Switch / Xbox 等遊戲機時，理論上已經會自動踢著Game Mode，當遊戲模式為開啟或自動時，按住 Samsung 遙控器上的 播放/暫停 按鈕就可以啟動遊戲列。
如果無跳出Game Mode Menu，大家就要去番 Home Menu 入設定自己手動開番啦，特別係電腦或Switch，早期的機型有可能無開自動就會認唔到！
遊戲類別: 最新的S95D有AI幫大家認唔同遊戲類別(部份遊戲機型號)，不過舊機又好，新機都好，大家亦可手動調教，個人比較推薦 "角色扮演"，色彩比較鮮豔得來又唔會唔夠自然。
虛擬瞄準點: 可以係畫面中間加上紅點或綠點，對打開槍Game需要經常回中的朋友就好有幫助啦，以往只有高階的電競屏幕先會有的功能，宜家電視都有啦！
螢幕比例: 如果係遊戲主機就無得調教的，但駁電腦的話就可以手動改做WideScreen等比例。
迷你地圖: 可以指定畫面的其中一格放大到右或左邊，用意係放大地圖，方便行走時無咁易迷失或盡快知道對手或戰友的位置，不過主畫面會縮細就是了。
更多設定: 按入去會跳去Main Menu的Game Mode設定，有需要可以入去再調教唔同參數。
Motion Plus: 遇上Frame Rate較低的遊戲，可以開著去，讓畫面無咁易有鬼影，不過個人覺得有無開分別唔大，叫好過無，有時開了反而更怪，好睇遊戲畫面類型。
音效輸出: 可以快速轉換聲音輸出，例如開SoundBar定用藍牙耳機等
說明指南: 唔駛我介紹了吧。
最後再比多少少貼士，Game Mode 除了睇到VRR/HDR有無開，可以知自己部PS5/Xbox有無Set錯外，係會實時睇到 FPS的，如果玩PS5/Xbox時，遊戲畫面多數只有兩三個模式比大家揀，一係畫質行先，一係順暢度行先，當然仲有平衡啦，如果大家想用畫質行先的話，可以開個Game Mode出來睇住個Frame Rate有無跌得太勁，例如經常跌到40或以下，如果有的話，大家就可以死心轉番做順暢度行先或平衡模式啦，雖然主流遊戲機有4K120的功能，但只有極少數遊戲行到4K120的，大部分都係4K60，黑悟空呢類較新的大作，好多時只有4K40添。
頁:
[1]