《TETRIS》俄羅斯方塊推出後34年，終被13歲少年打爆機
本帖最後由 阿定 於 2024-1-5 14:46 編輯全球最暢銷遊戲之一的《TETRIS》俄羅斯方塊推出後34年，終被13歲少年BlueScuti打爆機，相信好多朋友都唔太明點解《俄羅斯方塊》明明係無止景的遊戲，點解可以打爆機吧，以下就由小編為大家講解下點為之打爆機，同打爆機的難處係邊啦！
https://youtu.be/J9oVQ43j22g?feature=shared&t=2300
首先，全世界的《俄羅斯方塊》比賽，基本上都係使用1989年推出的 NINTENDO ENTERTAINMENT SYSTEM 版本 (美版紅白機，又稱灰機)，遊戲每清10行，會提升一個Level，速度亦會加快，而Level 29係《俄羅斯方塊》的速度上限，亦係正常人類用手掣玩的速度極限，而呢個人類極限維持了22年，直到2011年才由Thor Aackerlund突破到Level 30，同時Level 30呢個記錄亦保持了7年之久，直到2018年才由Joseph Saelee成功突破，之後直到2021年由Cheez利用全新方法，透過由背面敲擊十字掣加快按鍵速度，將整個《俄羅斯方塊》玩法推向無極限，呢個全新的操作手法讓大家成功突破Level 40，之後短短一年時間各大高手都利用新方法，將記錄刷新到Level 100以上，如果純以技術來講，《俄羅斯方塊》來到呢度，仍然係一隻唔可能爆機的遊戲。
我地返番轉頭，上面提到呢隻Game係1989年推出，以當時的遊戲機機能，雖然對《俄羅斯方塊》來講，係大材小用，但受限於當年的遊戲設計，同記憶體的上限，《俄羅斯方塊》終於係最近呢兩年被人類挑戰到接近崩潰的邊緣，首先，遊戲掉落的方塊，每升一個Level就會轉一次顏色，當遊戲去到 Level 148，遊戲掉落的方塊顏色會接近全黑晝面，由呢一刻開始，成功突破手指極限的人類，再一次面對肉眼的極限，呢個發現對好多高手來講都感到非常之沮喪，不過人類玩唔到唔代表AI玩唔到，Greg Cannon 利用 StackRabbit 程序成功係《俄羅斯方塊》Level 237 引發出 "記憶體不足" ，出現《俄羅斯方塊》第一次因為遊戲崩潰而玩唔到落去的情況，出現第一次真真正正的所謂爆機，之後透過 Hydrant Dude 的計算，成功找出最低的崩潰 (爆機)Level會係Level 155出現，最終 BlueScuti 係2023年12月21號再次挑戰《俄羅斯方塊》時，率先突破Level 154刷新世界記錄，然後因為失誤，一次消滅了三行從而錯過了Level 155出現的首個 "100%崩潰" 機會，最終去到 Level 157時出現遊戲崩潰，成為首個成功挑戰《俄羅斯方塊》崩潰 (爆機)的人類。
最後，下一個《俄羅斯方塊》挑戰應該會係如何避免遊戲崩潰突破 Level 255，讓遊戲跳回 Level 0，實現真正無止景的遊戲玩法吧。
相關文章:
第一套Apple開左熄唔到機既電影《俄羅斯方塊：版權之戰》
Tetris 99 介紹
利害
頁:
[1]