正義迴廊精彩在那裏？
478/2022 84 分👍👍❤️❤️❤️#正義迴廊 #TheSparringPartner
#咁多字都無爆雷🤪 #你唔係唔睇啩？
#歡迎大家留意討論 #好電影值得俾心機寫
上個月好忙，錯過咗呢部電影《正義迴廊》(The Sparring Partner, 2022)優先場，呢個星期至少有五、六個朋友走來問我好多問題，睇完覺得點？搞到我有啲壓力🤪由於今日要錄影，琴晚忍住牙痛都衝去太古城睇，因為我從來唔會評論未睇過嘅嘢。
睇完之後，印證咗呢幾十年來我一直堅持嘅幾件事：
1. 人之初性本惡；有啲人真係冇惻隱之心，亦即係同理心。後來有醫生研究証實，100個人就有四個人係反社會人格，亦即係梗有一個係你左近，而呢四人有可能走上成魔之路。（唔使驚，有可能啫，反社會人格唔一定做連環殺手咁恐怖，只不過係鍾意操控人、當正自己係神、做事又唔負責任、有咩事發生都覺得係人哋嘅問題、自己啱晒、唔鍾意遵守江湖規矩……佢地有時都會欺善怕惡，只要你不縱容，就會識收）
2. 所以能夠成魔，環境因素係好重要，例如經常被人欺凌、覺得自己有缺陷但自己又唔能夠接受、缺乏教育、溝通和愛、受到嚴重壓逼、親人被粗暴虐待等經歷⋯⋯(很好的例子就係我經常說的希特拉，你睇吓佢出生經歷就知，另一個仲出名，不過唔講得，佢同希特拉有唔少相同嘅經歷，你去圖書館搵本《國家機密》睇吓就知）。
3. 我80 年代尾讀電腦嘅時候已經講，電腦遊戲將會顛覆人性，扭曲人類嘅同理心，虛擬世界裏面嘅暴力廝殺，將會影響年青人嘅人際關係，到後來令佢分唔清現實世界嘅處世之道。尤其是睇住呢二十年電腦極速的發展，十分恐怖！所以我一直都好抗拒小朋友沉迷電腦遊戲，最近台灣電影《該死的阿修羅》，正正觸及呢個題材。
講咗咁多，其實係俾大家入場前有一個基本嘅慨念。《正義迴廊》最精彩嘅地方係你睇完部戲行出嚟，有唔少嘅問題環繞住你個腦袋不停咁思考發問，然之後由你自己去搵答案啦，咁你望望英文戲名，The Sparring Partner你又收到一些提示了。
好多人都話《正義迴廊》嘅劇本非常之精彩，究竟精彩喺邊一度？我可以話俾你聽一定唔係情節，因為情節大家都知道係真人真事，當年發生呢件事嘅時候，大家都可以喺新聞報章睇到報道，電視又有跟進，記憶猶新，但真正成件事嘅來龍去脈係點，可能只有兩位犯案者和死者先知道！電影劇本聰明嘅地方唔係將呢一個奇案嘅情節用編劇認為嘅走向拍出嚟俾大家睇，而係將佢變成一部法庭推理片，等你投入去一齊研究單Case，引發大家好奇心和共鳴地代入，多方面思考覺得件事究竟出現乜嘢問題？
道德教育出現咩問題？法律制度出現咗咩問題？陪審員制度又出現咗啲咩問題？究竟正義有冇喺呢件案件嘅審判過程之中，得到正確嘅彰顯啊？
劇本最精彩嘅地方就係人物、對白，相信大家聽得出對白係經過研究推敲而寫成嘅。配合一班非常優秀嘅演員，加上營造黑色電影嘅氣氛、超現實地將審判過程帶到犯案現場，剪接、運鏡、甚至燈光攝影都係經過深思熟慮、精心雕琢。
最後要讚嘅係，外國嘅發庭戲已經有好多經典，尤其是係薛尼盧密 (Sidney Lumet, 1924-2011)的《十二怒漢》（12 Angry Men, 1957)，當年利用困獸鬥環境，配合鏡頭由開初從上以下嘅俯瞰鏡頭，一路一路降低角度去到仰視鏡頭，時近時遠地拍攝12位陪審員，各自爭辯，帶出公義嘅討論。今次《正義迴廊》就刻意將法庭環境造成十分侷促逼夾嘅困獸鬥局面，間中仲將室內燈光變黑，近寫角色眼神流露眾人的思維。（大家可以睇睇真正法院嘅面貌同layout)
一部好電影，不用直接説教，讓觀眾回味，離開的時候，徘徊於迴廊之間，一直思考返家，仍然齒頰留香❤️❤️❤️
咁多字都無爆雷🤪你唔係唔睇啩？歡迎大家留意討論。
 仲未睇, 不過一定會睇....只係有冇時間入戲院咁解!!! 小瑟 發表於 2022-11-6 12:27
仲未睇, 不過一定會睇....只係有冇時間入戲院咁解!!!
值得欣賞👍 和我一樣，我一見 已經想起 12怒漢。
睇咗，合格。值得看，鼓勵入戲院看。
當然，我睇完就算。冇再去諗了。
幾同意樓主所說，網絡遊戲可能已經扭曲晒新一代的價值觀。 謝臻麒有份殺人？ 一件好平常小事都可以過度解讀出天大繁複之哲學思路。德國好多𠵍學就係好好地兩條冷坐火爐邊就演譯出一堆𠵍理。
我就話德國人痴尻線。
德國人平均教育水準非常高，但當年幾乎人人撑希先生。
近年，德國經濟強勁，但左交橫行，振臂一呼收百萬民（事實係好人我做，難民係全歐盟分，結果英國脫歐），但邪惡當下發生，佢哋可以無視，生意照做！但大愛包容永遠掛向口邊。
睇書多識諗嘢嘅民族，曾極右，曾極左！
難得上帝畀你做人，大家應該珍惜每分每秒。
喜歡自尋煩惱？
下世請向上帝申請唔投胎做人，好多畜牲仍然輪廻受苦，由佢哋代替你啦！
勿見怪，非指任何留言者。
頁:
[1]