《芬尼克斯傳說》遊戲速評
本帖最後由 阿定 於 2020-12-4 17:18 編輯自從Nintendo Switch的《曠野之息》推出之後，市面上出現了不少不論畫面風格、遊戲系統、戰鬥方式都跟《曠野之息》十分雷同的作品，小編在此不一一細數。而《芬尼克斯傳說》自有消息推出以來，一直有聲音認為作品抄襲《曠野之息》，但經過小編十多小時的試玩後，親身感受到兩者之間其實有很大的差異。
首先，《芬尼克斯傳說》(以下簡稱《芬》)不能否認如果有一個遊戲分類稱為「類曠野之息」的話，佢絕對係呢一個類別。在不同的遊玩片段入面，大家都可以見到主角不論在爬山、游水、滑翔時都會消耗體力條，主角亦可以在大地圖隨意行動探索，這些系統的確和《曠野之息》十分相似。但除此以外，其他方面都未見有「參考」《曠野之息》的地方，所以如果要說係「抄襲」的話，就有點太嚴格了，雖然UbiSoft都有佢自己的[原罪]而呢隻事實亦係一隻[神作]，但兩者仍有不少距離啊 (笑)。
那麼遊戲系統和大部分動作遊戲一樣嗎？絕不，遊戲在操作、系統、介面都同新的《刺客教條》非常相似，不過當然沒有殺人放火，而且亦有作一定程度的簡化。所以如果硬要說是有「抄襲」的話，應該係抄《刺客教條》 (注: 《芬》由創作《刺客教條：奧德賽》的 Ubisoft 魁北克工作室團隊開發)。不過《芬》和《刺客教條》最大的分別在遊戲中解謎成份比重佔得更多，而《芬》的解謎屬由淺入深，開首的部分謎題更加像是操作訓練 (不建議大家因為開放世界而一開始就直接走去較偏遠的迷宮)，如果係核心玩家可能需要一點耐性去完成頭一兩小時的劇情，後期才會有不少具挑戰性的謎題服務資深玩家。
遊戲同《曠野之息》一樣，有唔少迷宮比大家玩，受惠於《刺客教條》式的指引，畫面會提醒你想去的地方距離自己有多少米，而只要站於高處，就可以用鷹眼打探那裡有寶箱，那裡有迷宮等，非常方便。
而戰鬥系統，算係簡化版《刺客教條》，如果揀最低難度的故事模式，直情係會極速自動回血，只要跟著進度去升級技能等級，遊戲推進基本上就沒什麼大問題的了，不用特別為升level而去無止境地戰鬥，當然如果你以新手身份去挑戰一大推獨眼巨人同彌諾陶洛斯一樣會死的。
遊戲主要樂趣除了迷宮解迷外，就係不停有幽默對白穿插，宙斯聯同普羅米修斯作為遊戲裡的說書人不停地以希臘神話故事為提諷刺眾神，就算唔熟讀神話都會覺得非常有趣，而且對白裡亦會提供不少建議，遊戲期間絕對唔會悶，反而開頭首一小時我嫌佢兩個太多野講搞到無咩機會操作角色。
畫面風格方面完全偏向歐美式卡通，非常有以前《神鬼寓言》(Fable)系列的風格，五頭身的角色設計，加上對比度高的色彩，非常吸引小朋友，如果單而Switch的畫面作評價，絕對係超班之作，但因為遊戲同時有推出PS4/PS5，XBOX Series S|X及PC版本，打算購買新世代主機版本的朋友，雖然畫面仍然係超細膩，但部份貼圖會因為擺脫不了卡通風格而存在唔夠真實感的問題，好可能會被同期的《刺客教條：維京紀元》硬生生比下去，不過沒比較就沒傷害啊。
遊戲主角可以揀男揀女，連配音都好貼心有男聲同女聲揀，服裝同武器都可以透過做任務賺取金錢於遊戲內購買，當然喜歡課金的可以直接付錢換上特別服裝亦可。
遊戲支持所有平台互換存檔，喜歡出街用Switch玩，回家用PS/XBOX玩亦無問題 (除了重複購買外)，小編我就係在外用Switch玩，回家用PS/XBOX玩的，當然玩玩下想轉會，去Game鋪Trade-in亦可以，只要把不同平台的賬號都連結到同一個Ubisoft戶口即可。
Switch版提示: 行貨亞洲版才有中文，水貨係無中文的，不過兩隻版都有英文就是，大家要記得唔好買錯，不過行貨無黃金版賣，如果打算買季票的就要之後上eShop購買了，至於PS/XB應該唔會有人特登去買水貨吧，呢隻唔係維京，本來就無暴力同色情的啊。
最後，遊戲作為一個子供向的作品無疑非常合適，可以一步一步培養新玩家踏上未來刺客之路，臨近聖誕，如果需要買一款遊戲俾小朋友但又唔想買太簡單的小遊戲，《芬》的確係近期不二之選，最少解迷會要小朋友用腦思考吧。
相關文章:
《芬尼克斯傳說》12 月 3 日全球同步推出
《芬尼克斯傳說》Season Pass 將包含三個故事取向的 DLC
尋日玩個序章都玩咗大半日,好多嘢揾好多嘢爬係幾好玩,但彈琴個挑戰我仲未識玩{:6_136:} ChiKeungChow@FB 發表於 2020-12-7 08:44
尋日玩個序章都玩咗大半日,好多嘢揾好多嘢爬係幾好玩,但彈琴個挑戰我仲未識玩 ...
有咁難解迷，咁小朋友玩時會好大壓力吧{:6_130:} DVD迷 發表於 2020-12-7 15:15
有咁難解迷，咁小朋友玩時會好大壓力吧
有難度揀唔怕啦,係我唔明佢意思要點做啫{:6_123:} ChiKeungChow@FB 發表於 2020-12-7 17:14
有難度揀唔怕啦,係我唔明佢意思要點做啫
我掛著玩迷宮無理到，應該係去A地點學識曲譜後再去B地點彈，所以應該要玩多陣先做到，我宜家有見過學曲譜的地方，但又唔太願特登番轉頭彈琴。 ChiKeungChow@FB 發表於 2020-12-7 17:14
有難度揀唔怕啦,係我唔明佢意思要點做啫
https://youtu.be/50eHqJZHycY https://youtu.be/Q2qBpLpdx-8 https://youtu.be/owpWi3dIRIk DVD迷 發表於 2020-12-12 18:14
https://youtu.be/50eHqJZHycY
唔該師兄尋日睇咗明點做嘞,呢隻game我應該有排玩,有咁多挑戰同寶箱要攞,對馬戰鬼依家先去到第二章仲有Cyberpunk添{:6_136:} ChiKeungChow@FB 發表於 2020-12-14 08:50
唔該師兄尋日睇咗明點做嘞,呢隻game我應該有排玩,有咁多挑戰同寶箱要攞,對馬戰鬼依家先去到第二章仲有Cyb ...
唔洗客氣，我最愛解迷，對腦袋有幫助{:6_158:}
頁:
[1]
2