劍走偏鋒-Muse.
本帖最後由 Benlu 於 2020-9-11 17:06 編輯半年前,突然想嘗試玩下歐美前級嘅我.係經過幾次內心掙扎後,終於係Lyndrof mp40、Nad m17 v2、Arcam av40 中揀選咗佢-Muse.
講到Muse,可能好多人感覺好陌生, 佢其實係Acurus公司係2020年的前後推出的產品.或者,我再講多少少,資深嘅玩家唔知仲記唔記得,係LD年代有個好響亮嘅名字-Agaron ,俗稱“斬崩刀”,而Acurus就係出自同們.宜家,就等我慢慢向各位介紹下呢部純前！
作為頂級Processor之一,Muse有16ch,支援Atmos & Dts X,最多可以玩到9.1.6,而重點係,Muse十卜Hdmi 2.1.大家都知,歐美啲機款更新係冇㗎仔咁快,今次Muse誠意拳拳,咁以後大家就唔使每隔年呤两年就要換機,俾錢都算喇,最煩又要重新Set up哂所有嘢,真係諗起都頭痕！仲有丫,配合埋年底前推出嘅PS5,今次仲唔爽到啪啪聲！而且代理話Muse以後仲可以upgrade fireware支持埋Dts x pro, 正！至於Auro3D嘛,,我個人就覺得冇乜所謂,因為目前玩得最多就係Atmos & Dts x, Auro3D制式嘅影碟,美版碟可能多啲,至於香港好似暫時袛係得“韓戰 2”,而我又唔係貪多嘅人,能夠玩好屋企套5.1.4已經好心足喇！
講得太多跑咗題添,言歸正傳.Muse源自美國,成部前級嘅組裝由大塊嘅PCB板以至細到一粒螺絲都係Made in usa.單睇外形,muse造工精細,特別係機身身上的拉絲條紋,甚具型格.
另外,Muse嘅機身並冇定位器,咁想調節音量大細莫非袛能靠Remote？咪玩喇,賣得咁嘅價錢點會咁兒戲丫.Muse機身前面有一塊5吋大細嘅Touch monitor,唔單止可以調節音量,就連所有Set up都可以係屏幕設置.講真,我真係幾Buy呢個設計,Muse嘅設置主界面簡單明瞭,顏色討好.唔會好似某啲品牌,搞到以為玩緊層層叠,每Set一樣要更改嘅,又要入到最底層重新嚟過.Muse嘅界面清晰,想更改某個設定,用手指點下（例如中置同皇帝位嘅距離,一點入去改好數據）就搞掂,Easy job!講開又講,近排Arcam部新前級Av 40好似都係咁,唔知有冇C兄可以分享下使用心得喱.
講完前邊,就介紹下後邊先.
Muse後背非常簡潔,首先底部有12個XLR輸出,而餘下4ch需要另外配置一條Aux線（聽講要额外購買,如果係標配就好喇）,線嘅另一頭連接4條xlr端口.跟著見到有两組Rca,一組光纤,一組模擬及若干usb插口.muse hdmi有8入2出,值得一提嘅係,2個Hdmi輸出袛有一個係支援2.1,另一個凈系得1.4！
最後簡單講下Muse嘅遙控,呢款遙控器係出自世界有名嘅Harmony公司,系一款具有學習功能嘅Remote.該公司現時俾logitech收購咗,所以品質不需置疑.
好喇,今日講住咁多先,等我同“Muse”切磋幾日（唔好心邪）然後再同大家分享下Muse係聲音方面嘅心得,遲啲見!
試咗幾日,可以粗略同大家分享下Muse嘅聲效心得！
點解講粗略呢？事關Acurus 公司為旗下嘅Act4 & Muse前級預備咗一套房間調校系統,名為”ASPEQT”.而呢套設備要今個月底先會寄到香港,聽代理講呢Set嘢合共有4支咪,真係好期待！
所以,宜家我所試嘅音效,并唔代表Muse嘅全部實力,就當打咗個5折喇.冇原裝嘢,唔緊要,咁咪用住私伙嘢先囉.音壓計、鐳射手電我都有自備嘅,而且,Muse為每個聲道提供咗5段全手動PEQ設置,可塑性較高.舞咗一輪之後,可以試聽下喇！
首先由2聲道試起,第一首歌曲係王菲嘅“天空”.當聲音響起,一代天后纤細、空鳴嘅聲音再次令我感動；然後到學友,我揀嘅係“你是我今生唯一傳奇”,歌曲節奏充滿彈性,歌神把聲一如概往咁厚實.利申一下,我係用lx800播放CD嘅,雖然轉為純播放模式,但同專業CD機比仍然差好遠！
試完两聲道,然後就到大家最關心嘅影院喇.Muse嘅聲音個人認為属於偏厚、自然,觀賞"Green Book"黑人影星Shirley教其白人司機Tony寫家書果段,Shirley温文爾雅、抑揚頓挫嘅聲線感覺就好似突破咗屏幕,連佢喉嚨入邊嘅細節都感覺好明顯,突現出一個中年男人獨有磁性嘅聲音.
聽過人聲,整段勁嘢先！今次我揾咗 "A QUIET PLACE"作演示,跳到女主角就嚟騷得不過又要逃避怪物追殺果段.當主角暱入地下室時,頭頂傳嚟怪物翻箱倒櫃嘅聲音,你會清楚聽到怪物沉重嘅脚步聲、嘶吼聲、以及被其撞低各種傢俱的倒地聲.以前我睇呢段嘅時候,各種聲效都聽到,但好似今次咁仔細清晰真係好吃驚,原來之前仲有啲details係未聽到嘅.跟住鏡頭一轉,小朋友放煙花果段,隨著第一粒煙彈爆炸,緊接著第二第三粒,震耳欲聾嘅聲浪即時包圍住我成個人.“千祈唔好俾人投訴丫,係果一刻我淨係諗到呢樣！”
其實,點解歐美啲前級會賣得比㗎仔貴,除咗用料之外,最大原因就係俾人嘅感覺冇咁生硬（或者數碼味冇咁重）,即係比較有感情容易投入果種.好似我啱啱果段人聲,袛係普通錄製,并冇附加任何特別效果,你都可以感受到啲人聲係好清晰,唔會似日系咁,人聲仿佛經過壓縮咗咁,硬係差緊啲,呢啲,淨係睇住堆冰冷嘅數據係感受唔到嘅！同時,貴嘅前級并唔一定會比平嘅聲音大,但佢一樣爆得,不過更加收放自如從容不迫,總結嚟講就係噤聽唔會顯得嘈.難怪身邊啲“損友”成日要我衝出亞洲！
好喇！Muse的聲效我就介紹到呢度.
最後想同各位講嘅係,以上所有內容係我親身感受,而我都係有話直說而已,我并冇想話貶低日系前級及其玩家,袛不過作為一位發燒友分享下心得,如有冒犯之處請見諒！
其實,如果單純以文字分享,諸位一定寫的比我好,所以我另外錄製咗一啲視頻,始終眼見為實會好好多,有興趣嘅C兄可以pm我互相交流.
最後更新一下開盖圖（借用網上截圖）,雖然屏蔽方面做得未如人意,但聽代理講應該係方便日後升級Hard ware, 莫非係下一代音頻格式？睇嚟Muse野心唔細. 終於有本地用家, 麻煩師兄再分享多些{:6_157:} fishbone8822 發表於 2020-9-1 17:45
終於有本地用家, 麻煩師兄再分享多些
C兄放心,等我試多两日就會再次同大家分享！ 聲效方面已經更新,希望幫到骨兄！ Benlu 發表於 2020-9-5 21:21
聲效方面已經更新,希望幫到骨兄！
有行貨嗎？
大約什麼價位？
謝謝！ 本帖最後由 fishbone8822 於 2020-9-5 21:53 編輯
Benlu 發表於 2020-9-5 21:21
聲效方面已經更新,希望幫到骨兄！
{:1_351:} {:1_351:} 正呀 chhanthony 發表於 2020-9-5 21:25
有行貨嗎？
大約什麼價位？
已PM. Benlu 發表於 2020-9-6 07:29
已PM.
我都想知道什麼價位 nellwill 發表於 2020-9-6 12:29
我都想知道什麼價位
已PM 嘩。。引死人咩