遲來的裝修完成分享：一切由 Denon X8500H 開始
本帖最後由 lego_cyris 於 2020-2-19 23:34 編輯遲來的分享，從早前既裝修帖開始，入伙後用左一年時間先添置好心目中既器材，依家終於係時間找數喇！
我準備裝修前既資料搜集，都係參考左好多師兄們既分享及經歷，所以希望以下少少既記錄，都可以幫到其他人，先睇睇成品相：
AV 擴音機：Denon X8500H近年大熱之一既 Denon X8500H。就係因為佢，先傻傻地跟足喇叭擺位去裝修新屋。裝修其間都反覆問自己：係咪應該做足 8 隻天空喇叭？最大疑問是 Auro3D 普及程度遠不及 Atmos、DTS X，但洗濕了頭都係努力說服自己吧。
現在用 13.1，其中有 5 個 Channel 用 Emotiva XPA-5 後級推，雖然全部交晒俾 X8500H 都應付到，但手上有部閑置既後級去做分工，何樂而不為呢。仲可以關掉無接駁喇叭既聲道，心理上會好一點。
地面本來用 7 隻喇叭，但老婆覺得梳化傍 2 隻喇叭太”應”聲及礙眼，只好暫時放棄，日後再作打算。天花照計劃行足 8 隻，玩晒四大制式，效果不用多說，非常滿足。Auro3D 雖然軟件比較少，但用於演唱會、舊碟 Upmixing、電視上效果特別出色。其餘三大制式都交足功課，尤其是 IMAX Enhanced 力感、氣氛十足。因太耐無爬文，唔知有無機會升級支援日後既 DTS X Pro，成事的話咁就有排玩。
另一方面，當簡單家電都可以用手機 App 控制，所以我自己比較重視與手機既連動功能。以日系機來說 Denon App 值得一讚，我已經長時間無用跟機遙控。App 內可做大部分設定，又可顯示正在使用緊邊隻喇叭、聲影輸入輸出格式等資訊，比機面顯示更詳盡。
投影器材：JVC X9900B + OS BU201 110”因為當初無考慮新屋實際環境，行左條冤枉路...
早已聽聞 4K 雷射投影機既威力，於是同老婆親身去體驗下，試機時用隻 OS 白幕，在雷射光源既加持下，高光畫面既表現、物件質感都非常超班！加上可在開燈既環境下觀賞，老婆特別鍾意，二話不說決定入手。
但裝機後發現光暗位及顏色不太滿意，上網了解後，得知投影機、電視出廠都有色差，投影機更加受環境、投影幕既影響，如果只盲目設定只會免費時間及眼力。
於是邀請擁有色彩管理認證既朋友上門調校。經過 4 個鐘既工序，終於出現返應有既色準。但發現黑位帶點深灰，他解釋因為我用了高增益幕及雷射投影先天光度十足，加上我家用色及物料都反光，所以影響畫質，令黑位唔夠黑，更直接影響立體感、對比度。
解決方法：1. 牆身及天花加黑布減少反光；2. 換隻灰幕與雷射光源互補不足；3. 放棄雷射換燈膽機。
第 1 個選項老婆必定反對；第 2 選項有不確定性及再要經歷多次運送上落、鑽牆裝拆，諗起都怕怕；結果咁就埋下了換機的念頭。上網爬文，目標鎖定出名黑位夠黑、又有層次既 JVC。雖然已出新一代“N”系列，但價錢實在太高，最後選擇上代旗艦 X9900。
開機後首先要設定返投影幕編號，編號可以從 JVC 網站查到，原理係 JVC 測量過部大分投影幕對 RGB 三源色反射數據，再去優化投影機既輸出。
第二要做 “畫素調整”，是將投影機投射出來既方格，用遙控器對準每條線，共 100 個方格、四次顏色組合。因為要近距離金精火眼地望實每條線，雖然過程痛苦，但做完後畫面明顯變得立體也提升清晰度。
JVC 投影機支援自動調校顏色，但要買隻色度計再駁電腦運作。所以都係邀請多次高手上門調校。完成調校後第一個感覺是終於有返入戲院睇戲的效果。顏色自然、光度足夠但不刺眼、黑位夠黑帶有層次、立體感、畫質、電影感全是上乘之作。再經朋友介紹下配上 Nanotec 309 + FI-48 NCF ，畫質進一步提升，果然係一條影像取向既好線。
講左咁多，睇相最實際。相片只作參考，未能反映現場實際畫面。
4K UHD 藍光機：Pioneer LX800市場上可選擇既 4K 藍光機唔多，要靚聲畫既非 LX800 莫屬。因網上已有好多用家已詳細分享過，我就不多作介紹了。JB 係指定動作，可以直讀 NAS 儲存既 File，外掛字幕又簡單，非常無敵。身痕下，換左粒 LX Fuse 亦配上 Nanotec 309 + FI-48 NCF 電線，畫面質數全面提升，立體感及減雜訊最為明顯。身痕人士可以試試。
重低音：JL E112再行多次冤柱路…，主因無同老婆一齊試聽。原本用 15 吋既 Procella P15A，點知老婆非常討厭佢快、狠、準既低頻，每次開機睇戲都投訴。最後無得留低，換成不同口味既 12 吋 JL E112。
取向好接近戲院感覺，一浸一浸既低頻包圍住成個聆聽空間，所有野都剛剛好，打心口無 P15A 咁有霸氣，但又恰到好處。現在用單元向牆既方法擺放係梳化後牆角，可提升反應及令低頻平均充滿成個空間。用這方法一來容易處理傢俬擺位；兩來可以減低少少衝擊力，免得老婆又炸型。終於順利過關，但暫時都係刻意調低頻既輸出，等佢慢慢習慣後先釋放真正實力。
喇叭組合：Procella + JBL Control X地面本來全用 Procella P5，貪佢細細隻又好聲，仲有黑、白色可以襯色返間屋既擺設。但中置發聲總係怪怪地，經過好次設定都唔滿意。於是狠狠地升級去 P6，對白聲變得清晰、細緻，不需刻意加大音壓，始終睇戲中置發聲比例上高，所以升級係值得的。
天空喇叭用 JBL Control X，性價比高，又有白色選擇。如果一套用晒 Procella，賣身都唔掂，加上天空發聲比例上相對少，不想投資咁多。
因裝修時喇叭位置仍未有定案，所以只叫師傅留定足夠長度喇叭線，自己安裝路軌再上掛架。好處是方便日後調校及加減喇叭數量，但外觀一般，好彩老婆對此沒有意見。全部天空喇叭棄用原廠掛架，因調校角度不合適，訂過其他款式，裝上後完全無死角效果良好，更可直接用返喇叭背螺絲位。
音響組合：B&W 804D3 + 老麥 MA8000 + Weiss 501兩聲道既喇叭、合併擴音機已源用多年，仍然滿意。CAS 用 Weiss DAC 501 + QNAP HS-453DX 行 Roon，的確係好好聲，我對木耳完全收貨。DAC 501 播放質素非常、非常、非常高！有機會真係要親身試試。代理跟左支收音咪可以玩 Room Equalizer，奈何暫時未有時間研究，有機會再分享。
雖然無換喇叭，但聆聽空間與舊屋不同，擺放喇叭位置及條件都改善。可以拉闊及拉遠與皇帝位距離，聽感比以前提升了不少，感覺上比升級器材效果更大，因有時付出一倍金錢未必得到相等既結果。體會到器材與聆聽空間既關係，現在少少既角度調教、離牆既遠近都對聽感有影響，這課題仲需要多多學習及嘗試。
多謝觀賞。
留位備用 終於見到師兄嘅完成品，真真厲害{:12_724:}{:12_724:} 師兄勁👍👍👍 超正 非常正。
我都係JVC 友，有機會要去家訪一下大佬你就好喇{:6_178:}
weiss加老麥{:12_795:} 獨立發燒{:6_157:} 師兄個場正到爆簡直冇得頂 正到呀............
最重要係同太太一起在咁正器材下睇戲聽歌，人生就是這完美！