小弟對原音耳機的選擇
各位師兄好, 小弟甚少有開箱文, 不過人生終於購入第一對小弟嚟講非常高負擔的耳機（ 將展開漫長的白開水與麵包的日子） 所以嘗試分享下自己對呢款耳機嘅感受.其實小弟最初都只係用電話加一隻315去聽下歌仔, 可惜身邊有幾個朋友平時喺行人隧道搵食玩下伴奏, 同佢哋一齊聽得真樂器多, 仲有個茂利有部叫高清播放器( 之前仲串佢買部咁貴嘅mp3） 畀佢荼毒之下, 原來聽同一首歌, 喺部有料到嘅機,聽出嚟嘅層次,音場同細節完全有好大分別, 咁就開始瀨咗嘢, 直頭去咗無間地獄一樣.
喺今年新年之後, 用咗所有積蓄加利是錢去買咗部SE100, 我喜歡佢背景夠靜, 我亦都試過旗艦機,音場同層次更加厲害,只不過小弟家貧, 加未捨得洗咁多錢買一部播放器, 所以先有咁嘅決定.
用咗部播放器之後, 加隻315聽Spotify同朋友分享咗啲高清檔案畀我聽, 就發覺越聽越唔對路, 因為用我隻耳機同朋友嗰隻耳機聽, 都係聽番嗰啲歌, 埋身又唔夠立體 ,聽朋友嗰隻就去咗大戲院睇戲一樣, 層次音場同立體效果完全係兩個世界.
咁就正啦, 又奶咗嘢喇, 好在個人有少少信用, 唯有用自己嘅信用去買一隻好啲嘅耳機啦, 最近個朋友有得閒又冇喺行人隧道搵食, 咁就陪我四出去聽下啲耳機, 既然今次用咗自己全部嘅信用, 加上朋友嘅荼毒及勸喻之下, 決定傾盡全力, 試咗幾款市面上都自己覺得好貴嘅耳機, 但係都係覺得聽出嚟嘅感覺喺某啲位置總有少少味精, 正所謂“自己味精自己加“, 加咗味精嘅位置換咗線都減唔到太多嗰種感覺, 到咗今個月頭, 朋友帶我去咗佢平時幫襯開嗰間舖頭, 店員話返咗一隻新款嘅耳機又叫我試下, 一聽之下終於搵到嗰種感覺,佢只係將我平時聽開嘅演唱會同爵士音樂嘅感覺還原返出嚟, 人聲嘅位置, 樂器嘅真實度同現場嘅氣氛都自然地播返出嚟, 朋友問我難唔難戴同重唔重, 對我嚟講完全適合, 只係唔係太鍾意佢條線有個掣控制低音多少, 朋友話唔使擔心, 有錢唔驚無線換, 叫我返去做下功課同叫個店員幫手煲多一陣,下個星期再返嚟聽多次.
咁小弟返屋企即刻做功課, 知道間廠原來喺外國係主要做耳機畀人上舞台用嘅, 加上呢款耳機係第三代同埋個殼用碳纖維做( 鍾意車嘅人就不其然會鍾意碳纖維） 咁就約返個老友再去聽多次然後決定如何.
今次經店員幫手煲過之後再聽返, 還原度嘅感覺更加強烈, 所有嘅訊息更加細緻, 就知道要將自己嘅信用攞出嚟, 好彩間舖頭可以分批用到自己嘅信用, 咁就唯有帶佢返屋企慢慢煲, 而家最希望快啲有條普通線換返（ 因為自己唔係咁鍾意校嚟校去）, 換咗之後有時間再同大家講下個聽感如何. 多謝各位師兄觀看同有時間可以畀啲意見小弟.
個低音調節器識得玩,其實好好玩{:6_143:} 嘩，講到咁正，我都好想買呀，服務咁好，開埋店名嘛！D個forum其它post，無論打手代理 post 都可能有交待。兼且每間店都做信用卡分期啦！
勿怪本人直言,不要奢望沒有bass control 的耳機線出現(因沒有bass control, bass直出可能會過量,個人先前擁有過Layla II和 Lola, 最終因線的問題已經低價放售了)
純個人意見,有錯勿怪 ip_csl 發表於 2019-9-21 14:51
勿怪本人直言,不要奢望沒有bass control 的耳機線出現(因沒有bass control, bass直出可能會過量,個人先前擁 ...
資深玩家的回覆，我不會懷疑，可能原 post要努力哦！
終於有人入手分享，師兄可以之後煲完呢隻耳機嘅分享嗎？我之前去某大型連鎖店試完，個店員哥哥有d chur, 唔係好敢再去運吉..... 有時睇 post已經好難分，真用家分享，定係打手文（線禞）了 Layla終於有人開箱, 恭喜ching入手! 我聽過一陣SE100夾Layla, 效果已經好好, 不過一入毒門深似海, ching可能好快又要出手!{:6_134:} 恭喜得心頭好，不過聲底唔岩我
頁:
[1]
2