Sony ST-HT5000 Soundbar 試玩報告
首先多謝 Sony Hong Kong 同 Post76 俾機會我哋可以借用呢支 soundbar 返屋企慢慢試玩。本身我都去過 Sony 陳列室去試聽，不過始終拎返屋企試用先可以試清楚真實效果如何。我相信大家考慮呢支 Soundbar 不會著重價錢，而係希望喺無辦法設置實體 7.1.2 喇叭的況之下(例如無位/唔俾擺 AV Amp，喇叭上唔到牆，拉唔到線等等等等)，都可以享受到環繞聲的樂趣。
<安裝>
開箱後最主要係一條 soundbar 同一個重低音，安裝非常簡單，只要 soundbar 同重低音各自駁好電源，再將播放器材同電視駁番 hdmi 線落 soundbar 再設置番 d 距離設定就基本完成。呢度有兩個提議，一係希望電源線可以用 iec 插頭，等用家可以升級電源線增強效果，二係希望 hdmi1 同 hdmi out 插頭可以考慮用回 hdmi2 and 3 的直插又或者採用斜插的方式，而非現時撗插的方式。因為一般用家都會將 soundbar 擺好位先駁線，用直插或者斜插的方式會相對較就手同容易。
<試音>
波希米亞狂想曲
最主要係試番片尾 live-aid 演唱會嗰一段，環繞聲效果同氣氛都好清楚，天空聲度的效果亦容易感受得到。
班加西的無名英雄
主要試攻擊大使館開始下來的槍戰，低音效果不俗都幾實淨，子彈撞針同彈殼聲都清晰，當然聲音定位同分析力不能與實體喇叭相比。
挑戰者一號
試片頭賽車嗰一段，環繞聲效果唔錯，天空聲道效果亦明顯。主角收集金幣的聲音亦都清脆。
蝙蝠俠夜神起義
試咗開頭飛機搶人嗰一段，白色飛機飛到藍色飛機上面的時候重低音發揮仍然不俗，如果係其他套裝喇叭的重低音呢個時候有機會已經跳嚟跳去。
大娛樂家
必試開頭主角演唱一段，觀眾踏地的低音效果不錯，感覺實淨。整體氣氛良好。
<總結>
受惠於呢套 soundbar 的重低音質素良好，令整套 soundbar的環繞聲效果發揮不錯，天空聲道的表現亦可以感受得到。在我感受來說，面前 180 度由耳水平到天花都清楚感受到聲音的存在，至於身後的聲音受制於只靠反射聲表現必然會有所折扣，但如果本身要貼後牆坐的話我相信與實體喇叭之間的差距可有所收窄。我本身之前用實體 5.1 喇叭，但係搬屋之後因位置問題再唔能夠繼續用實體喇叭。今次試用令我對 soundbar 的聲音表現有更多的體驗，喺環境有所限制之下，soundbar 都能夠俾到我相不俗的環繞聲表現，令我更有信心去購置 soundbar 去繼續享受影音的樂趣。
再一次多謝 Sony Hong Kong 同 Post76 安排今次的試玩活動。
頁:
[1]