Sony HT-ST500 7.1.2 Dolby Atmos Soundbar 試玩分享
小弟今年剛換新電視，心思思又想upgrade支soundbar。小弟依家支soundbar只係P牌子入門級型號，貿貿然買新機又有啲淆淆地。一旦屋企個廳做唔到平時去showroom果種環迥效果之後又會比老闆話我嘥錢。所以今次呢個偶然機會終於可以俾我親身試到Sony呢隻旗艦級soundbar。開箱之前我想先講佢既少少關於connectivity嘅feature。其實ST5000係2017年嘅產品，但已經配備e-ARC，可以兼容HDCP 2.2及支持 Dolby Vision，硬件配置方面有3 組HDMI in。時至差唔多兩年之後嘅今日，呢個規格依然支援現時家庭影院最高畫質(4k)輸出。相信下次upgrade電視嘅時候都未有需要再頭痕部soundbar住 (除非市場突然間skip 咗 4k 影音發展而直接跳上再高層次8k 就另計)。 講到呢度，正式開箱!!
其實屋企啲老闆對於soundbar嘅評價一向都唔高。因為支bar響睇片果陣係比到啲surround，係比到現場感，但試問一家人點會日日都咁得閒睇戲咩? 其實大部份用家最經常用soundbar嘅時侯都係睇電視或者係睇新聞。依家支bar 雖然都話有針對人聲處理，但效果始終都係麻麻地，對白把聲有時仲朦過電視喇叭，呢個就係soundbar其中一個致命傷。反而ST5000 比我第一個感覺就係啲人聲唔錯，幾通透，就算未用clear audio mode果陣啲人聲同對白都唔會一舊舊，抵讚!
之後就到試片嘅時間，小弟試咗 1) Fast and Furious 8 同埋
2) Spider-Man: Homecoming ，都係響Netflix 睇嘅。
FAF系列最引人入勝嘅地方莫過於佢嘅飛車追逐埸面，再加上ST5000加持，音效現場感十足。左右聲效對比分明，後置音效都能感受到 (但不夠明顯)。另外一讚嘅就係個sub仔，澎湃有力，每次賽車起動引擎時都具有震撼力。
Spider Man 呢套就係比隻ST5000 發揮 dolby atmos 威力嘅時候嘅時候喇! 套戲其實有啲悶，得兩埸比較有睇頭對戰場面，即係客輪對戰果場同埋最後潛入戰機果場。果兩幕場對戰範圍大，而ST5000 輸出嘅dolby atmos 頂置音效能夠形造龐大而立體嘅空間感。果種感覺有啲似當時啟德機場未拆果陣，飛機響頭頂上面飛過咁。整體環迥效果都有響showroom7成以上。
最後就係試串流音樂，而我就用咗MOOV平台。因為我一向聽歌只要求方便為主，基本上手機介面同個喇叭syn 得到已經收貨。所以整體上幾滿意。
要數現時旗艦級soundbar，除ST5000外，仲有Y記 YSP5600 同埋三叔最新出果隻Q80R (其實仲有隻再高級啲叫Q90R但唔知香港會唔會賣)，都係有dolby atmos。撇除機能問題，Y記個外型同無sub仔呢兩點真係過唔到自己果關。三叔方面我只係對Q90R有興趣 (因為有後置喇叭同埋up-firing)，不過要老闆批准放後置應該都好困難。思前想後，都係覺得ST5000比較值博。
詳細及分析得很好!!
頁:
[1]