[劇透]《我的英雄學院劇場版》︰唔係fans都可以入場睇
本帖最後由 粗人敵卡 於 2018-11-10 18:09 編輯原本呢套動畫我諗住都好難喺香港戲院睇到，估唔到我住附近嘅戲院有得上。本身自己追《我的英雄學院》漫畫改編動畫由第一季至到最新嗰季，雖然呢套劇場版同漫畫原作主線無太大關係，但係見日本嗰邊口碑唔錯就入場睇睇。
個故仔就講綠谷出久與All might等一眾主要角色嚟到I Island，綠谷出久同all might嚟探望all might嘅知已好友David，而綠谷出久嘅同班同學就嚟I Island玩。然而喺晚上奸角(敵人)人等入侵I island座塔挾持全個島嶼居民，同時駭入島裡警備系統。綠谷出久同埋佢嘅同班同學要衝上座塔頂層解除警備系統兼將其回復正常，解救島裡面嘅居民。如果無睇過《我的英雄學院》漫畫或者動畫，電影開頭會略略解釋角色與角色之間嘅關係，但有睇開嘅話投入感會大增。開頭all might個friend個女梅麗莎帶出久參觀i island裡面景點，突然撞到出久嘅女同班同學，或者出久同佢嘅冤家爆豪嘅鬥氣等等，未睇過原作嘅都會睇到會心微笑，當然有追開就會睇到更過癮。
經過前段嘅搞笑，主角班人嚟到塔裡面受困氣氛變得緊張。儘管劇情未算得上出人意表，但憑著動畫公司Bones嘅演出，配音嘅落力令到成套動畫充滿張力。有段動作戲值得一提係轟焦凍、爆豪兩人同奸角嘅兩位手下超能力打鬥，畫得緊張刺激。後段壓軸同變咗大魔王form嘅奸角決戰，all might同出久師徒合作解決奸角，演出充滿震撼力。
另外一提，劇場版穿插all might同david年輕時嘅相遇與合作，慢慢鋪排電影中後段嘅plot twist，同時深化David呢個角色。而故事入面嘅奸角就相對劇場版其他角色就略嫌平面化，後段揭開黑幕就淪為表演出漫畫原作大奸狗all for one老謀深算，將all might玩弄於股掌之中的工具人。不過嗰位奸角唔算蠢，叫做有腦同埋後面超能力大爆發令人睇到心寒…得一陣，因為主角班人遇強越強。
總括而言，《我的英雄學院劇場版》演出算係有聲有色。無論有無睇過原作，入場睇唔會令你失望。
頁:
[1]