有師兄隔山買牛，小弟則幪眼求劍 (一樓更新小問題)
本帖最後由 Raphael 於 2017-11-6 04:45 編輯話說最近換咗電視，終於迎來遲來的 4K 日子，亦趕搭 3D 尾班車
有 4K output，自然要換埋 4K input
用開兩代 Oppo BD 機，自自然然地會望住 Oppo 203
及後見有師兄們隔山買牛，入 Sony X800；於是又望咗一輪 X800
及後又見眾師兄讚劍橋 CXUHD 畫靚聲又正，所以又搵資料
然而..............
小弟其實係完完全全無睇過呢三部機既 demo；就連實物都無見過！
今日出街，行入舖頭，向老闆曰：「誠求 UHD player 一部」
老闆氣定神閒，泰然自若，撥一撥頭髮，好似占士邦咁型，答曰：「Cam 別廚啦！正劍！」
正當小弟想問：「何正之有？」老闆已早一步續道：「唔駛諗啦，你地科林啲師兄都話好」
小弟回心一想眾師兄們評語，確實如此！
於是不作他想，demo 唔睇，實物唔見，就答曰：「有勞老闆大駕，到貨倉為余取劍」
老闆抽一口煙，斯然答曰：「貴客選劍明智，甚好！然需一觀 demo 以釋胸中疑慮乎？」
小弟答曰：「雖未見其劍，弗見其鋒；然實已得聆 76 眾師兄教益，誠服由衷，鬱結早消，意欲求劍；及後得見老闆議無二致，遂求劍之意彌篤，故不作二想矣」
老闆：「隔山買牛者本已為少數；佳客幪眼求劍，更屬罕見。小店本錢微薄，雖無劍贈英雄之能，卻可碌咭不取附加費，望少俠笑納」
小弟歡曰：「受之有愧，卻之不恭」
就係咁.......... 武俠小說怪人之間既一輪九唔搭八兼不倫不類對話後，小弟喺歸家途上，就帶住人生中第一把劍
亦係第一件連真身都未見過就扑鎚既器材 -- 真係 100% 信師兄們既說話而決定去馬~~
使用幾日後，發現一啲小問題
1) 後置 HDMI IN，試過插 RAINBOW FISH 一代 HDMI 線 (駁任天堂 SWITCH)，完全無畫面無聲音；其他線 / 駁其他機則未試
2) 想更新 FIRMWARE，卻不斷顯示無法接上 SERVER
3) 如果解像度設定為 "直通" 的話， HDMI 畫質調較 (光暗，對比，飽和度等等......) 就會無效；不論點郁設定，畫面都無改變
第 4 點比較怪，唔知關唔關 CXUHD 事
4) (睇港版 4K "你的名字") 配合 SONY Z9D，如果將 LIVE COLOR 設定為 "高"，每當去到某幾個場景，畫面會自動變暗 (已經熄咗 Z9D 既 LIGHT SENSOR，都係會變暗)
正呀！恭喜ching有劍可格 有勞屍鬆呈上報告以解奴才之苦{:8_387:} 雲師兄, 請問絕細好劍要多少銀兩? 正機一部{:6_193:} 大俠，我等草民已身先士卒，死而後已，以身試劍，望大俠能一展其鋒芒，以震江湖。 劍需未出鞘 ，但己鋒芒畢現 ，好劍 ! 呢部機聲效一流 果然好劍一把{:6_128:} CHING妙筆生花，實在令人欽敬!欽敬!{:6_174:}
頁:
[1]
2