[純開箱文] Post76十四周年台慶 - 三獎 (Aurender FLOW V1000)
Post76十四周年台慶已經圓滿結束，當晚玩得高興之餘，抽獎禮品方面亦相當豐富。雖然禮品價值不一，未必人人啱心水，但多得禮品部同事嘅悉心安排，已經做到人人有獎，永不落空。(當然仲要多謝一眾代理嘅支持，我地先有咁多禮品啦～)
小弟都參與過好多年台慶版聚，多得幸運之神嘅眷顧，被抽中可觀禮品嘅機率都算幾高，上年已經抽中五獎。今年，幸運之神就落咗喺小弟太太身上，竟然係三獎 - 過萬大元嘅：Aurender FLOW V1000(下稱 FLOW )
剛才提到，獎品未必人人啱心水，而比較少用耳機系統嘅我，就繼連續三年抽中耳筒之後，今年竟然係抽到耳擴，難道個天都想我加入Head-Fi行列？
好在，既然 FLOW 係耳擴，唔使講即係一部DAC啦，廠方好貼心咁，包裝內附送埋6.5mm轉RAC母頭嘅接駁線 (可留意下面開箱介紹)，好讓用家接駁家中系統之用。
小弟天生一對爛耳，為免笑死街坊，測試報告我就唔多寫喇，加上 FLOW 其實都已經推出咗一段時間，想知 FLOW 有幾勁，大家可以到網上搵搵，所以不如就喺度同大家開個箱睇睇啦～
平時比較少接觸耳擴/DAC，過萬元嘅耳擴/DAC對小弟嚟講簡直係只可遠觀，發夢先會擁有嘅器材。
所以，珍而重之咁進行開箱行動。
打開包裝，可以即時見到一個好有質感嘅皮套，從皮套攞出 FLOW ，第一個感覺係：好墜手。
如果要帶出街，其實會幾重，另外，使用時係唔可以戴住皮套，換言之即係要裸跑，用起上嚟就要份外小心。
不過外觀同造工就十分精緻，波浪型設計，全金屬機身，配上粗圓環音量扭，每一處都散發住一份時代感。
輸入方面，就有一個光纖、一個USB3.0，可以直接駁Mac / PC (PC要另裝Driver)，包裝內已附送一條USB3.0接線同一條光纖線，如果要接駁手機，就要另購Apple Camera Kit / OTG CABLE喇。而輸出就只有一個6.5mm插頭，但廠方又喺包裝內跟咗一個6.5mm轉3.5mm轉插，仲有一條6.5mm轉RAC母頭嘅接駁線，所以一般接駁應該唔成問題。
另外，包裝內仲有一枝十字螺絲批，原來係畀用家自行拆開加裝HDD之用，最高仲支援1TB，不過就只可以當電腦嘅外部儲存，唔可以當音樂播放器用。
後記：
FLOW 個定位好似有啲尷尬，想帶出街又好似重咗啲，又唔可以落皮套，可以加裝HDD但又唔可以當Player用，另外試過駁電腦經 FLOW 去合併機播過兩首歌，發覺用緊 FLOW 嘅時候好似叉唔起電，換句話說即係唔可以長期插住用 (實際情況有待證實)。
咁貴嘅DAC真係要好好研究下應該用喺邊好，Head-Fi系統可以聽多好多細節，實在值得考慮，但又係另外一個無底深潭。
最後，希望可以將好運帶畀大家，以後人人有箱開！
再次多謝方浪音響～
頁:
[1]