[科林報告] 新一代電玩耳機王者 — TURTLE BEACH ELITE 800
本帖最後由 @肥狗仔@ 於 2015-4-5 18:47 編輯都市人生活繁忙，放工後當然希望搵返多少娛樂調劑一下心情。不過唔係個個都咁幸運可以肆無忌憚咁做自己鍾意做嘅野，好似Post76咁，唔少聚集於耳機區的玩家其實可以被稱作"苦主"，佢地有足夠的財力應付日新月異的發燒hi-fi器材，卻要面對兩道屹立萬年的高牆: 一係屋企的老闆; 二係隔離的鄰居。只要有哩兩件麻煩友繼續存在，咁你嘅生活從此會變成灰姑娘的故事，5.1喇叭的音量再奔放一過十二點就要用返電視出聲，霸氣盡失。特別係好似@肥狗仔@哩類打機之人，通頂遊戲乃兵家常事，無奈即使在遊戲中戰勝群魔數萬，現實中則害怕聲量太大嘈醒街坊。只能夠話: 「作息定時嘅人，你玩唔起。」針對上述難題，帶有環繞聲道的高階耳機在近幾年可謂應運而生。而強調語音交流的遊戲界更動不推出新款耳機，今日要為大家介紹 — 由美國老牌電競周邊大廠Turtle Beach出品的最新旗艦級無線耳機 TURTLE BEACH ELITE 800，或者會助你解決看不見的敵人，兼且避免驚動家中的巡邏兵。
ELITE 800外型簡結美觀，連mic仔都係內置的。
作為有30多年歷史的Turtle Beach，該公司旗下第三方電玩耳機系列 — Ear Force相信未用過的玩家都肯定聽過其大名。Ear Force以高品質的音色及先進的音頻技術見稱，並在美國這個遊戲第一大國下穩佔五大最暢銷電玩耳機的品牌之一。在香港，Turtle Beach的耳機也長期擺放於各大game鋪的當眼處，所以@肥狗仔@當初唔明白，一個咁成功的電競耳機品牌，點解會在現有的高階STEALTH 500P的基礎上再推出代號為"ELITE"的旗艦版本，而非再下一城開發同級新型號? 莫非純粹係針對住一兩個錦上添花的功能就來個獅子開大口? 帶著種種疑問的本人上星期就親身上到Turtle Beach本地代理智高遊戲科技總部一探究竟。誰不知一入去就感到事有蹊蹺，此因這款ELITE 800絕非閒等之輩，其不但配搭DTS Headphone : X 7.1環迴音效技術及18種智慧音效增強模式，仲內置一個奇技淫巧的小玩意 — 手機接收功能...
ELITE 800對應PS4/PS3家用機，而支持XBOX ONE的同級耳機800X據說將會引進。
對於一款旗艦級別的電玩耳機，我同唔少玩家一樣對新耳機的若干功能非常有興趣，不過在打開說明書之前，論耳機好與壞，戴上頭的感覺絕對會影響印象。根據@肥狗仔@以往玩headphone的經驗，市面上的耳機大概分為兩類: 一類係汲落個頭，另一類係夾住個頭。如果你的耳機係前者，恭喜你，你的遊戲係用黎享受的，如果係後者，那怕只係播放音樂都會好似家英哥喺你面前念緊箍咒一樣痛苦。而ELITE 800唔單止能夠舒服咁汲落頭頂，其耳筒設計更針對玩家耳朵與頭部的距離，機殼稍為向後傾側。那怕耳帶位比較鬆，配戴後亦唔容易甩。@肥狗仔@當日全程戴住，舒適得很。感覺就算係同系列的進階型號好似500P及500X等與之比較都明顯掙個馬位。
差一次電可用10個鐘，出街玩冇難度。更何況耳機仲可以插尿袋。
雖則話ELITE 800係專為PS4/PS3及mobile game度身製造，但其實在任何平台上遊玩都好，"電話急call"都會為玩家帶來尷尬及麻煩，例如萬一女友喺哩個時候打比你，冇理由同佢講你冇返工掛住打機掛，呃住先啦。無奈座地喇叭或者耳機的聲響往往會為你製造"不在場證據"。
http://1.bp.blogspot.com/-F00Prr52ORE/VNaLmCIy9_I/AAAAAAAAK8g/XLxPUy2VIA8/s1600/santana%2Blying.gif
而哩款ELITE 800的過人之處係佢可以在打緊機的前題下，通過藍牙方式接聽電話，過程中玩家可以選擇兩邊單元出聲，亦可以一邊聽住電話，另一邊則繼續槍林彈雨。經測試後，感覺ELITE 800與一般用手機在電話接收及對話聲的清晰程度皆屬叮噹馬頭，這有賴於耳機的降噪技術，即使行街睇戲，ELITE 800亦拍得上市面唔少智能電話的降噪水平。值得注意係與一般有咪耳機一樣，耳機與對話mic的音量都係獨立調較，玩家或者要時間適應並自己調節適當的output/input音量先可以在打機與應酬家人之間位處不敗之地。當然，想在手機上聽歌，哩款耳機亦能夠應付自如。
插座提供一般主機光纖輸入。想用mic通話，除了藍牙之外，亦可以選擇usb/3.5mm頭等傳統方式。
講咗咁耐，版友們都好心急想知道究竟ELITE 800好唔好聲，的確市場上有部份標榜住多功能的耳機背後可能係厚了功能弱了音質，幸好ELITE 800冇犯下同樣錯誤。當日廠方提供了《Call of Duty Ghosts》PS4版作測試，仲有記憶的朋友會記得該遊戲開頭就會出現試機位，一邊講述地球上發生地震災難，另一邊廂又會提吓在太空站工作的太空人劇情，這個"冰火兩重奏"可謂最能測試動態及靜態的一幕。雖然Ghosts的音源只有5.1，但通過ELITE 800表現，環繞聲仍然叫人感驚喜。要知道在天崩地裂的環境下，遊戲可能會夾雜住唔同的聲音，好似地震﹑爆炸﹑途人的尖叫聲等等，如撕複雜的音訊在ELITE 800的分析力下，無論在聲音定位或者包圍感皆做到清脆細膩，將環境的每寸動感一網打盡。至於最重要的低音更顯扎實，老實講低音再強勁的電玩耳機唔係冇試過，不過ELITE 800在唔開EQ模式的情況下能夠處理好豐厚的低音之餘，亦保留得到中高音的突出。哩點對於鍾意原汁原味的@肥狗仔@黎講簡直無法抗拒。
去到太空情節，遊戲頓時變到《引力邊緣》般寂靜，不過靜得黎，論太空的果個焗促感覺，ELITE 800的表現仍然係可圈可點，查實若果玩家可以感受到太空的窒息感覺，某度上證明該耳機的隔音功夫做得唔錯。唔知係咪因為上述的動/靜態測試屢見驚喜，@肥狗仔@好快萌生想用佢黎聽歌的念頭，可惜事實再次證明這些7.1立體聲耳機好難駕馭到兩聲道的歌曲 —即使低音足數依舊，人聲卻顯得比較散，層次感一般。一聽之下感覺家中同屬電玩耳機的第一代PlayStation wireless headset都仿佛建立起自信。講到尾哩類耳機始終係打機為主，聽歌為副。@肥狗仔@在此都無謂咁專業喇。
自第七代家用機開始，遊戲機唔再單純為打機服務，聽歌睇戲也是一應俱全。特別係PS3，好多人基於該主機可以睇埋Blu-ray繼而決定入坑，時至今日連對手XBOX都可以睇Blu-ray電影。既然現存的電玩遊戲唔好話"鴨毛"，連一般好似DTSHD/DDHD都無福消受，咁睇戲功能對於ELITE 800哩款7.1耳機自然更派用場。我地用咗Marvel大片《銀河守護隊》黎試聲，測試段落為眾主角逃出監獄的情節。就播片時的表現，ELITE 800將我一下子由地獄拉返上天堂。開始時警衛隊步入監房經已先聲奪人，腳步聲伴隨住乾淨利落的bass在@肥狗仔@的後腦位置盤旋。及後到主角乘坐飛船逃脫，包圍感強勁，爆破音效與人聲定位壁壘分明，效果令人滿意。
有做功課的版友或者有留意到其實Turtle Beach仲有Z300等同樣對應無線通話的高階耳機，所謂一山不能藏二虎，那怕ELITE 800不對應PC平台，亦難免被人將兩者拉到同一起跑線上。好消息係今次這款旗艦級耳機不單止貴在隨機附送的差電座，其音效增強模式都係大大多於Z300。上面提到@肥狗仔@本身鍾意食"生肉"，對EQ哩家野唔太感冒，不過ELITE 800的音效模式豐富的程度實讓人難以無視。在固有的"遊戲模式"﹑"電影模式"﹑"音樂模式"及"環繞聲關閉模式"下再細分出18個專屬EQ。以遊戲為例，其提供了為FPS/TPS而設的射擊模式以及增強引擎聲響的賽車遊戲模式。想在多人遊戲中出奇制勝，名為"專注腳步聲音遊戲模式"(好長)的EQ如其名，能夠助你找出匿藏起外圍的AK camper， 仲有果啲托住sniper周圍衝的team killer。專攻睇戲的朋友亦可以選擇"動作電影模式"或"恐怖電影模式"等。在測試《銀河守護隊》時@肥狗仔@已試過這兩個mode，前者貌似增強了回音及低音，後者則將空間感收細一點。個人的結論係味精不宜落太多，但有得揀好過冇得揀吧。
玩家可以通過Turtle Beach Audio Hub手機app來選擇心宜的音效模式，唔洗逐個撳。
總結:
早幾年電玩耳機在本地未係太盛行，可能普遍玩家覺得耳機終究及不上座地5.1 hi-fi出聲，只係一個逼不得已的替代方案，要買就買平平地嘅算數。這種錯誤觀念將相關的無線耳機貶得像退而求其次一樣。而Turtle Beach就憑住佢地多年來的經驗及實力話比眾人知，由創意去驅動科技，成品往往能超越玩家想像。ELITE 800就係當中最好的例證，其堅厚的低音和出色的包圍力讓玩家全完至身於遊戲世界中。隨住日常工作愈趨緊張，半夜三間出動的機迷有增無減，如果玩家對"家人 vs 娛樂"冇適當取捨，分分鐘會造成四面楚歌的局面。今次哩篇介紹或者會比到你一個解決辦法。然而就ELITE 800本身的質量，個人相信一旦你親耳鑑聽，你會拋開過去對無線電玩耳機的歧視，然後發現這種頭戴式的音響系統先至係最適合都市人接觸遊戲的法門之一。 這或許是友人一直追求的好東西！ 有些問題想.請教各位c兄:TURTLE BEACH ELITE 800x,h.k現在可以買到嗎?
如沒有.想請教ELITE 800 跟 MDR-HW700DS可否用於x1?
如用hw700ds 有何方法,可以跟朋友對話. thx 本帖最後由 @肥狗仔@ 於 2015-4-6 10:47 編輯
GaryNew 發表於 2015-4-5 21:19 static/image/common/back.gif
有些問題想.請教各位c兄:TURTLE BEACH ELITE 800x,h.k現在可以買到嗎?
如沒有.想請教ELITE 800 跟 MDR-HW7 ...
800X等多一兩個月吧，外國都未有。
有adapter的話ELITE 800本身都可以用到落XONE，但唔建議，有新買新。
至於HW700DS... 如果要打，做法都係大同小異，adapter定生死。比我會用Kinect做mic，唔洗煩。 有無邊位師兄買左呀？有無試用報告？ iphone個app用唔到 幾吸引！定價大約係 lkljason 發表於 2015-10-26 08:49 static/image/common/back.gif
幾吸引！定價大約係
$2799 MansonT 發表於 2015-10-26 12:17 static/image/common/back.gif
$2799
Thanks！個價可接受！
唔知同Sony MDR-HW700DS 呢隻比較邊款較優勝呢？ lkljason 發表於 2015-10-26 14:04 static/image/common/back.gif
Thanks！個價可接受！
唔知同Sony MDR-HW700DS 呢隻比較邊款較優勝呢？
Sony 有咪嗎？
頁:
[1]
2