試聽160萬NAIM STATEMENT
好耐無上《音技》吸毒，上星期某日收到草哥電話﹕「喂蒲東，今日你一定要上嚟試聽Naim嘅Statement！聽日要運走啦。」
記得草哥上一次咁緊張搵我試聽器材，已經係成年幾前嘅事。我同佢講，收得工再過《音技》要成九點幾，但草哥話唔介意，唔使驚阻佢收工喎。咁我就肯定呢壇嘢 非比尋常，於是放工急call「快的」去《音技》……（由於事出突然，喺無帶相機之下只用手機影相，各位巴打望莫見怪~~）
入到試音室，嘩嘩！只見一隻好似飛船，又似《2001﹕太空漫遊》嘅神秘金屬黑板，放咗喺對白金證據後面。（器材為---T+A PDP 3000 CD盤+NAIM STATEMENT+DYNA白金證據）
呢對嘢正正係Naim Statement前後級﹕NAC S1同NAP S1。
當中NAC S1使用全新設計，所有輸入端子都安裝喺一個黃銅框架，訊號喺傳輸入主要模擬電路前會利用Naim自家嘅 spring-loaded suspension system隔籬。所有輸入端子都獨立隔離，就算同時間有多個訊號連接都唔會造成互相干擾。
NAP S1可提供 746 W/ 8 ohms，1,450 W/ 4 ohms，同驚人瞬間輸出﹕ 9,000 W/ 1 ohms！Statement前後級都裝有一個線性電源供應。NAP S1更擁有一個大型4000VA的環形變壓器。
由於當晚重有《音技》另一寫手，有「黑膠王」之稱嘅焚哥在場試新膠膠，佢呢位高手中嘅高手已經摸咗Statement成日，我梗係要向佢請教聽乜軟件最好啦~~~~「嗱，蒲東，我今日帶咗兩套同一歌集嘅CD同黑膠版本嚟，又俾你聽聽嘞~~~~」
第一隻聽嘅係MASTER SOUND版本嘅「Friday night in San Francisco」CD同膠膠，幾位大師級結他手狂Jam，如狂風掃落葉的飛快感、能量感傳入我耳，難得做到密集但又層次分明，每一下彈弦聲都清清楚楚毫 不含糊。大家知白金證據並非容易服侍之輩，但喺NAP S1狂大火力之下，被推得貼貼服服，我彷彿聽到NAP S1好串咁叫我﹕「嚟吖嚟吖，扭大聲啲吖笨~~~~~」
之後再試樂隊10cc嘅「The Original Soundtrack」，一聽到第1首歌開始時嘅單車響聲、玻璃橂倒地聲、人聲等，我幾乎成個跳起！因為一對白金證據竟然可以做到環繞聲效果！單車彷彿由前方向我身邊走過再去到後方！呢種驚人嘅結像力我之前喺草哥屋企聽蔡琴都試過一次！嗰次係聽到青蛙喺我後邊叫。當然，除咗器材優秀，要用兩隻喇叭做到有環繞聲效果，重要睇玩家嘅擺位技術同房間形狀同物料，先可以利用反聲聲做到呢種效果。草哥嘅功力同《音技》嘅環境，我喺呢度讚都無用，係要上過去試聽嘅人先真係知有幾好。
試完結像力，焚哥再攞嚟一隻Robert Hohner嘅「Far more drums」，聽佢第6首<Ketiek>，係一啲印尼土著嘅求雨舞。呢首曲最考器材功力嘅地方，就係同時間有大量嘅樂器同土著嘅低吟聲，不過聲壓會由極低去到極高，又由極高去到極低，極考器材動態能力，以Statement推動白金證據，喺大聲壓嗰幾段當然遊刃有餘，最難能可貴嘅係喺極低聲壓時（重要同時間有好多樂器）每粒音仍然聽得清清楚楚，除了因為Statement將白金證據控制得貼貼服服是事實，但另1個因素，是《音技》的試音房Noise Criteria控制到一個很低水平的緣故（我想有NC25以下），優質環境配上極強器材，當然相得益彰。
最後聽「星際啟示錄」soundtrack，題外話這雙碟包裝極之精美，封套是會發光的星雲圖，很是吸引。這隻碟全部曲目都由Hans Zimmer主理，氣勢磅礡。曲目中大部分都有用到管風琴，那種大氣勢與接近20hz及打下的超低頻，Statement+白金證據表現得鬆容不迫，有貴氣，極有大將之風。
頁:
[1]