【柒陸影評】哥斯拉
本帖最後由 @肥狗仔@ 於 2014-5-23 09:33 編輯官方博客原文
*以下內容涉及少量劇透:
自《蜘蛛俠》公映以來，美國超級英雄人物一個接一個地走進全球各大銀幕。數量之多貌似已經超出咗觀眾嘅最高負荷，上個月香港就有個睇《美國隊長2》睇到要搵周公解悶嘅勇者，用自己嘅行為藝術為眾人發洩出最大不滿。或者因為哩份帶有鼻鼾聲嘅怨氣連上天都感受到，所以上星期，一隻來自東方嘅怪物宗師第二度入侵美國領土，喚醒了觀眾對佢嘅記憶，燃起了粉碎對佢嘅熱情。冇錯，論美國隊長嘅手瓜再粗，彼得.帕克嘅蜘蛛絲再長，亦敵不過深入民心嘅暴力"師奶"。雖然日本製作的哥斯拉已經喺04年退休，但技窮荷李活仍然十分看好地球人自虐嘅心態，加上今年適逢係哥斯拉誕生60周年，華納睇準時機與傳奇影業聯手請出哩隻歷史悠久，當之無愧嘅怪獸之王《哥斯拉》，再次展開一場既科幻又野性的破壞之旅。
喺香港，哥斯拉嘅事跡可能比唔上年獸咁家喻戶曉，不過若果你知道咸蛋超人係乜東東，咁@肥狗仔@都唔花口水再講同一類劇情介紹。比較想講係哥斯拉嘅"新造型"。回顧返98年第一齣鬼佬版哥斯拉，當中無論係視覺特效﹑卡司及故事脈絡都冇得輸，唯獨哥斯拉早已成為日本文化象徵之一，強調神似而忽略形似的洋化版哥斯拉造型成為了眾矢之的。前車可鑒令華納明白到格硬本地化還不如原隻送上，因此今次嘅哥斯拉從造型到技能特徵包括肥胖身驅，細頭粗腿還有笨拙的動作都忠實還原日版設定。分別在於哩套大片版中的所有怪物都係利用CG製作而成，哥斯拉嘅表情可想而知係幾咁豐富。而片尾的經典"口爆"場面更稱得上錦上添花: 烏雲密佈的晚上充斥著混沌，眼見邪惡怪物快要殲滅人類，一道藍色激光劃破夜空，仿佛為眾人帶來希望，為觀眾帶來起伏。如果話本作刻意要向原版哥斯拉致敬，倒不如話編劇將哥斯拉的精神特徵原原本本咁融入劇情之中。@肥狗仔@唔可以話佢處理得比日本版要好，但亦不得不配服編導對哥斯拉情節的表與里看得非常透徹。
睇到哩度，帶咗磚頭入場嘅粉絲會認為此舉白白增加了膀頭負擔。唔好咁快收返埋住，事關電影嘅伏位亦都專為粉絲而設。通常哩類以某人物角色做戲名嘅科幻片，入場前觀眾之間都會有個共識: 既然套戲叫得做哥斯拉，咁唔通我地會期待有花師奶出現咩。而《哥斯拉》一片就偏偏同大家開左一個玩笑。事實上電影接近尾升嘅時候，觀眾會發現戲中的兩隻反派怪物比哥斯拉更搶鏡，原因不在造型，而係哥斯拉實在太少戲份做成喧賓奪主的局面。可以理解編導想要平衡哥斯拉的神秘及兩獸交鋒的系列情節。但講到尾將主人翁雪藏一半時間點睇都似係套折衷辦法。對於嗰啲對哥斯拉有一定認識嘅朋友，電影嘅編排未必會對其造成太大影響，但第一次睇嘅朋友如果想了解更多，哩套"哥斯拉外傳"絕對提供唔到更多資訊。
不過講到最吹脹都莫過於電影本身就製作咗更多哥斯拉的特寫及挑機鏡頭，只可惜導演用咗佢認為係合適嘅form去表達。以哥斯拉與反派首次碰頭的一場重頭戲為例，當兩隻世紀大怪獸走上擂台之後，電影竟然緊接以一段offscreen的新聞報導再加段幾秒嘅rough cut黎交待哂整個戰鬥過程，真係睇到我目瞪口呆，心唸: “咩料啊? 冇錢做render?”。其實一隻闊別多年嘅知名怪獸，用通俗嘅剪接方式處理佢嘅出場畫面的確未必夠創意及份量，就好似當年《鐵甲威龍》一片就用左三場戲去描繪RoboCop的由啟動到進場的情節，卻冇一個鏡頭係聚焦落人物身上，反而係通過顏色，鏡子反映及聲音讓觀眾快速捕捉到畫面上的主體。問題係相同方法應用喺本片身上就有點畫蛇添足，始終哥斯拉喺21世紀已經冇神秘感可言，雖則話"藝術嘅野你識條春咩!"，但都係嗰句，比得錢入場就係想睇哥斯拉嗎。
上述問題當佢係剪接上的少瑕疵，又講講美國大片最拿手的視覺特效。早在上年由同一班底製作的《悍戰太平洋》就被人指作為《哥斯拉》做戰前熱身。單係睇返76影碟區有幾多係關於前者的曬命貼就知道電影中嘅特效係如何叫人無法自拔。顯然，對於第一次將日本特攝元素搬上大雅之台，《悍戰太平洋》經已超額完成任務。曾幾何時連@肥狗仔@都唸過究竟《哥斯拉》會點樣繼承哩種高度，但現在想返起就發現自己係多麼無知，竟然唔記得兩套戲係唔同片種。論動作，前者機械人身上嗰幾十支大光燈足以使場上的每樣物件分得層次滿滿。論恐怖，後者的怪物搭上夜景所襯托出的神秘與黑暗可謂係災難片的典範，我地亦唔能夠強求佢做到前者般拳拳到肉的激烈戰鬥。再講哩套唔係《哥斯拉大戰洛奇》，三隻怪獸係撐唔到兩個鐘頭的。上面近四百字試圖掩飾住一個真相，就係本片特效冇乜睇頭: 人獸戰唔多，兩獸大戰更少之有少，打起上黎亦稱唔上非常精彩，最重要係連主角特寫都少得可憐，CG特效自然冇發揮機會。問心感覺頗為微妙，因為你知道哩套已經係最忠於原著的荷李活翻拍版，所以你不能否認原著的框架真係容納唔到太激烈的戰鬥。當佢做一套"用荷李活特技班底打造的日本怪物片" 或者係最好嘅形容。
原著中由哥斯拉誕生到之後與人類嘅衝突發展，電影往往圍繞住反戰及環保兩個主題。相關嘅深層次話題歐美影壇每年都有唔少產出，多一套唔算多，而導演今次就選擇少一套確保安全。取而代之係電影一改原著對哥斯拉由來的解釋，指其實際係吸食地核幅射的史前巨獸，而非由人類核試產生，使到系列一貫的反思議題得唔到任何延伸。而本片描述的三方勢力各有自己的定位: 反派飛蟲企圖改變食物鏈，在地球大量繁殖; 哥斯拉希望保護生態平衡，決心殺死飛蟲拯救世界; 最後到人類，又係一味自作聰明，用錯誤方式處理超自然現象。情況同日版如出一轍，只係哥斯拉唔再破壞。其與人類之間的衝突只限零聲戰鬥，矛盾唔夠鮮明，導致之後飛蟲大肆破壞嘅時候，美軍與哥斯拉喺不知不覺間成為欠缺交感嘅同盟，沒有化敵為友的過程，目標卻非常一致，事後更引來民眾為哥斯拉歡呼。＠肥狗仔＠到哩家都仲唸緊究竟係新版哥斯拉太過正氣，定還是片中人類睇科幻片太多，面對大怪獸出現都見怪不怪。另一方面，相對渺小的人類看似得到一定程度的重視。特別係飾演主角Ford父親的Bryan Cranston將佢喺《絕命毒師》中爐火純青的演技注入了痛失妻子的中年漢子體內，係繼哥斯拉之後本片第二個賣點。不過期後怪獸破繭而出，@肥狗仔@就冇再理過人類嘅慘況。
睇完《哥斯拉》之後，＠肥狗仔＠非常同情哩隻世紀巨獸。每張電影截圖，每張哀號嘅表情都仿佛叫喊著：”還我戲份!!!!” 平心而論，你話對於一套哥斯拉電影，縱使有荷李活特技天團助陣，但話抱住興奮至極嘅心態入場又真係誇張咗啲。至少電影依然為觀眾帶來一場稱職嘅怪獸盛宴。佢沿襲高於革新，劇情凌駕深度，可謂係套撤頭撤尾的爆谷電影。與＠肥狗仔＠以同樣心情觀賞嘅朋友會睇得非常過癮，至於挑釁嘅朋友，你或者會吐槽本片嘅海報有著相當大嘅誤導成份。
個人評分:6.8/10 都可以一看啦{:6_193:} 我都想睇！！ jayjay 發表於 2014-5-25 00:20 static/image/common/back.gif
我都想睇！！
唔會比XMEN好睇啊~
頁:
[1]