甜鬆潤x斯路：Questyle Q192分享文
本帖最後由 斯路 於 2014-5-1 03:14 編輯甜鬆潤x斯路：Questyle Q192分享文
事源斯路上年音展無法參與，但部分佢既師兄朋友都話入面有個叫做Questyle參展商幾值得留意。Questyle聲稱專為Sennheiser HD800設計左一套解碼以及耳放，用上非傳統既電流放大技術，同HD800有相當唔錯既效果。用上Questyle既解碼以及耳放去推HD800係以唔算太貴既價錢亦能夠發揮得到HD800既一個方案。本身斯路對於電流放大技術有一定既好奇心，Bakoon既耳放系列亦非正常人可以負擔得到，而斯路又未係玩到新旗艦級數既人，所以最後不了了之。近期發現head-fi上面又有討論Questyle旗艦，入面御用評測人員一面倒好評，雖然斯路一直對於呢幾位人員既評論相當有保留，但都慢慢重燃對Questyle既興趣。之後斯路發現原來Questyle有一部較低階既DAC+AMP Q192，就直接入手睇睇到底係咩料。咁岩甜鬆潤師兄亦開始打算玩玩台機，幾經討論之後，斯路以及甜鬆潤師兄就決定一人一部Q192，玩一段時間之後出個聯合分享，睇睇會唔會有咩火花啦。
前言部分
甜：師兄，購買過程以及到手既時侯有咩感覺呢？
斯： 唔算順利呀。我個陣係美國，要經Amazon買。個經銷商唔太理會e-mail，而且態度亦唔盡責，而家都有一定手尾要執執。部機到手亦係有些微不滿。開盒只有機身，QC報告，一隻光碟以及電源線，而無USB線；即使可以假定玩家會用自己既USB線，但我買既USB DAC入面呢部係第一部唔連Stock USB線。其次係即使過左QC，機身上螺絲甩左兩粒出黎，刮花左部機；而螺絲係六角型，Questyle亦唔連個六角螺絲批，令我都有少少無奈。
甜：師兄真係無妄之災。我係經淘寶買架，一拍下賣家已經主動減價，比埋錢後第二日就到。所以話，淘寶同順豐真係世界級質素，個賣家仲送多條USB線我。當我得知師兄既情況，我真係不禁講左個X字，QC方面我都無問題。不過我就唔太介意無六角匙依個問題哪，因為我驚自己整壞部機，同埋打開左我都會好似睇緊神探哥倫布咁，完全唔知睇黎做咩。
斯：都無得好講。設計上我都有怨言呀。唔到手我都唔發現原來部機既RCA線係RCA OUT而非RCA IN。再問之下發現Questyle將呢部機既DAC定為主要部分，所以堅持唔會改為RCA IN我就相當奇怪，一部5000蚊左右既台機用上WM8740晶片而打算定位其DAC部分為主打；而其專利既電流放大技術只係副品，我就未能夠好參透得到。
甜：不過我真係唔明點解佢會視用WM8740既DAC係賣點。。。。本身仲諗住用佢黎幫HUGO加大馬力，點知。。。。其實我想問下佢地，你地有無見過有人拎部AMP去出另一部AMP? 同埋我部機有Clicking Noise ，係扭音量既時侯會有輕微既zap zap聲，但係我過左幾日之後唔見左，我諗係打通左個任篤二脈掛。。。（注：依幾日突然有返noise。。。）
斯：我就同Questyle反映過以上幾點，佢地亦相當有開發者既自信以及堅持，咁我都無計啦 。要換DAC都重可以用SPDIF做輸入既。至於clicking noise真係好大問題。我部機早段時期基本上係幾秒一次，煲左成個月先重有，講緊係每半分鐘一次。最後都係返到英國，用個降壓器再煲左陣先無事。都唔知係佢110V版本有問題，定係我美國個邊既電有問題，定係QC做得唔好啦。
外觀及操作分享及討論
甜：師兄唔知你又點睇外觀以及操作方面呢？
斯： 外觀黎講，體積細機身輕，有三幾個月既小trip的話可以作為transportable desktop system。造功非第一流，磨砂面都睇得出上色有上得唔好既地方，部分位置會有線條痕，亦會有幾個小斑，但還可以接受。唔錯既一點有其音量扭，相當順相當好扭。至於操作方面， 呢部機音量偏細，推力亦唔算特別大。推IEM的話相當可以，話晒都係電流放大設計，再加上音量偏小，能夠好好配對低阻耳塞。但係對於大耳機我就比較有保留啦。
甜：依方面我同斯路兄既睇法相約，例如配上IE800後既EF2A我根本無較音量既空間，基本上係一開聲已經可以震傷我既心臟，相對地對於一d低阻耳機，Q192既音量控制就真係剛剛好。係呀，真係推唔起HD700，應該點講，HD700推得好架話，景物係會變得開揚同埋有立體感，而如果推得唔好，眼前既景物就好似隔住一層紗咁。而Q192係處於依兩者既中間，你或者分辮到前面既景物，但係你就未能形容到。我認為如果大家想試一試推得開既HD700係點樣，不如去試聽一下HDVD800推既HD700。
整體音質部分分享及討論
斯：咁不如先講講Q192作為一部DAC+AMP既整體表現啦。就一體機黎講，我認為Q192主要係走味道向而非素質向。DAC部分用上WM8740，聲音走向溫暖。或者Q192係一部台機，所以令到我覺得其實上解碼晶片部分發揮得比市面上大部分用上同一晶片便攜播放器，例如iBasso DX50，Fiio X3，Astell ＆ Kern AK100等等都做得更好，但同HiFiMAN HM-802相比我下唔到定論呢。整體解像度算係上乘既中階產品，有唔錯既細節但唔細膩，開揚感合格。整體表現有染色，中高以及低頻染色程度不一，感覺上係由上至下地加強左味道：高頻輕微帶乾，無明顯地被recessed下去既感覺；中頻輕輕帶奶油感；反而低頻染色較為明顯，聽起黎量感足而圓但帶粗糙，下潛非深而sub-bass亦唔算明顯。低頻能放不能收，量多而有一定氣勢；但礙於低頻唔緊緻，聽落較為含糊以及散亂。
甜：我都認為Q192既質素唔算太高，尤其係解碼方面真係較弱，我認為細節位表現不足，應該豐富既位唔夠豐富，不過好彩順耳耐聽，人聲染色比較明顯，不過我認為係唔差既染色。IE800一直都係我最有感覺既一隻耳機，帶幾分性格，帶幾分氣質，我現有既隨身器材方面暫時能夠將IE800發揮得出色既我認為係HP-V1，所以當斯路兄話我知有一間廠家而Sennheiser黎作標準，而又有一部適合低阻耳機既一體式，我都二話不說要跟風買返部。
斯：係呀。加上呢部機放大部分使用上current mode amplification而非voltage gain，理論上會偏向用黎玩低阻耳機多於高阻耳機。實際上我覺得Q192用黎推耳塞表現最好，至於推耳機既話我覺得難免有些少吃力呢。不如講幾個值得分享既配搭啦。
配搭分享以及討論
斯：本身睇網上既討論，覺得Questyle呢個廠家主要都係以推Sennheiser耳機作為標準，夾Sennheiser耳機應該相當唔錯。而實際上同IE800相配亦有一定synergy。如果講IE800的話，我既喜好更偏向將IE800推到聲音豐盈得黎大刀闊斧，具有大匠風格得黎同時有老煉既剛性。Lehmann Black Cube Linear夾IE800會係我既首選。Q192之下既IE800同我喜好並未相聯，但其實聽感相當討好。Q192能夠將IE800推得相當豐盈，比Lehmann BCL推得更飽滿，相信同current gain有關。呢個組合之下IE800高頻唔會太削聲，中頻亦唔會凹陷，低頻飽滿，下盤襯托得相當唔錯但係最底個浸低頻並唔明顯。具有一定動態以及音樂感，但稍為欠缺大刀闊斧既感覺。整體聽感其實相當討好，雖然礙於解像度以及染色連貫性令呢個組合素質非上乘，但感覺上就好似將IE800轉向流行向，簡單揀左幾首Mr. Children/Matchbox Twenty/Arctic Monkeys/Damien Rice，的確比以往聽感唔同，而家咁樣對味得多；即使聽返古典的話，獨奏以及小編制適性都有改變，鋼琴聲音無BCL咁低沉抑壓，稍為變得更自然；但大編制就稍稍無咁爽。
甜：其實除左HD700之外，我亦非常粗略咁試過D7100同埋SE846，感受不多。而且只要聽過IE800既表現，我認為無必要提及佢地，因為我認為Q192底下係我聽過最好聽既IE800，一直以黎我對IE800期待極高，因為佢每次配落一件新玩具身上佢都有不同既表現，有時候死氣沉沉，有時侯又朦朦朧朧，但係有時侯有寬容而又大氣，有時候又變得高雅端裝，Q192底下既IE800，我覺得浪漫而細膩，以一隻口水歌為例，“全世界失眠” 中段鋼琴聲尤其令人動容，表現亦非常獨特，人聲有一種走進靈魂既感覺，再以“回到最愛的一天”既主題曲How Long Will I Love You試聽，亦都有非常動人既表現，令人陶醉於溫柔之中，好緊動。
呀係喎斯路兄，記得你之前講過音茶樂Flat4-KURO好食電流，依部Q192又搞唔搞得佢掂呀？
斯：其實又幾唔錯下。雖然同之前既分享文中提及到既KURO表現有唔同，但Q192既KURO聲音相當飽滿。低頻下潛雖然無咁深，高頻亦稍為變得更進取，但整體感覺豐盈飽滿，音場深度優秀，Q192同KURO兩者互補得唔錯。Q192或者未必夠能好似Violectric V800+V200咁樣將KURO既質素直接帶出黎，但聽起黎其實都相當好聽，KURO既organic聲音仍然係度。失左去顛覆性既強動態但係帶黎另一種既音樂感，Q192同KURO呢個配搭都令我幾歡喜架。細機仔就講到七七八八啦，唔知師兄覺得Q192同大耳機又有無咩野特別值得分享下呀?
甜：經過斯路兄既推薦，小弟都忍唔住買左隻KURO玩玩，感覺雖然不及IE800般令人難以忘懷，但係亦有另一種景象，相對於IE800，KURO既聲底比較亮，但係亦無忽略低頻既表現，以同一首歌，“全世界失眠”為例，人聲唔似得IE800咁吸引，亦有輕微齒音，但係細緻位比IE800突出，雖然少左過種感動，但係就有一種舒適既聽感。而How Long Will I Love You既表現分別更大，由原先既浪漫溫柔，剎那間變得輕鬆清新。不過我隻KURO新買，音色上同師路兄既應該有一段距離。我認為無話邊種聽感較好，但係我的確較喜歡IE800既表現。唔知師兄有無用黎玩下大耳機呢？
斯：Q192同beyerdynamic T51p反而效果相當唔錯。Q192有種能好好發揮T51p既感覺；呢種發揮唔係指動態或者頻寬上既發揮，而係能夠將T51p既飽滿程度好好咁呈現出黎。泛音表現尤其值得稱讚。雖然同Violectric V800+V200呢個組合相比係細緻程度、控制力、低頻下潛、整體動態以及全面性有一段距離，但Q192能夠令T51p聽起上黎更豐盈；比Violectric既組合相比雖然聲音粗糙唔少，但係Q192之下既T51p樂感明顯，亦更為engaging。Q192係我暫時聽過能夠令T51p最好聽既前端。但係大耳機方面就實在未及我想像中好。我用黎推AKG K702，味道唔夾令到高頻失控低頻削耳，而且聲音平面，難以叫做合格。推beyerdynamic DT880 600ohm反而會無咁差。解碼部分都明顯地限制左Q192音場結像等等表現，但用Q192黎推DT880其實還算可以。雖然聲音密度以及動態不足，但係味道尚算可以相容，相當暖聲既表達手法，聽感黎講算係可以。但當然，講到真係平時推DT880我就都係用返其他野算吧啦。
甜：我認為師路兄所提及既豐盈形容得非常好，基本上大部份我持有既IEM佢都能夠推得豐盈，但係小弟大耳機不多，所以除左HD700同D7100之外亦無再試過其他LU。。。
總結
斯：老老實實，呢次入手我地都幾衝動，有無後悔先?
甜：後悔就無，因為IE800真係有幾好既表現，而熟識小弟既都知IE800一向都係小弟既最愛之一，而且尺吋唔錯，擺係office用的確好慳位，但係講真如果你唔多iem架話你可能會後恢，因為可以夾得唔錯既野都唔少，但係大部份都只係IEM（順帶一提，推IM04效果亦非常唔錯）。3500人仔既價錢還可接受，但係解碼方面的確較為弱雞，唯一耳擴方面的確做得非常唔錯，算係幾耐聽，但係小弟近排有新歡。。。
斯：師兄真係好野又有新歡。得閑記得分享下。至於Q192既話，如果係打算買一部台機用黎推入耳式又或者係便攜耳機，我覺得Q192 都唔錯既。Q192有一定味道令佢聽感討好，但我覺得呢種染色只係比較中庸既調味，唔係會上癮既一種風格，比較大既一個問題會係Q192既染色帶主導性，有時會override左耳機本身既特色。用Q192黎推入耳式或者T51p雖然唔錯，但推大耳機就明顯比較吃力；單係呢點作為一部過5000蚊既台機我實在比較失望。佢電流增益既表現係入耳式或者係便攜耳機上面相當明顯，但推大耳機就唔易講得出有咩特色。另外我試過將Q192當成一部DAC黎玩，但表現非常唔理想。或者咁講啦， 我本身期待佢可以做到國產機既高性價比；如果同歐美或者日系同類產品相比，我覺得其實都算係咁。以一部作為過渡性既中端產品黎講，我覺得Q192其實都還可以既。至於Questyle既旗艦產品，睇睇五月我去Munich既時侯再玩玩先。
甜：你記得現場視像直擊報導比全76兄弟睇。
後記
斯路之前同Questyle用e-mail聯絡平均都要三日至一個星期先會回覆。係一般查詢之後，由於clicking noise問題持續無法解決，斯路再發電郵了解下有無簡單troubleshooting既指引，但係 Questyle一直無回覆。斯路再發過電郵跟進，但已經過左三個星期一樣未有回音。暫時未知原因，或者係因為Questyle忙於準備上海音展或者Munich音展。所以即使其他師兄有興趣都好，或者先等等斯路update下；否則，若果售前同售後服務有咁大差別，斯路傾向唔推薦其他師兄出手呢。
Q192正面圖
Q192側面圖
Q192底部圖 留位 哇估唔到一部amp既報告可以兩個人一齊寫，超正!
依家價錢有部current amp玩下真係幾級引，尤其望到bakoon既價錢{:6_192:}
不過依部野竟然淨係冇line in實在係.....非常有自信
希望我都可以有機會試下啦
Btw希望斯路兄部機唔會再有noise啦 看外表明顯是一架AMP,無line in真的有點奇怪.
兩位合作的文章果然非常精彩{:6_193:} 多謝CHING咁好的分享{:6_193:}
呢部機最近好似喺旺角中僑19/F角先見過{:6_183:}
初頭都冇咩留意{:6_241:}
佢哋好似係香港代理同用來玩 FOCAL 有源喇叭{:6_183:}
http://www.micaudio.com/html/news/questyle.html Thanks and very nice. Enjoyed to read such a high quality review. 本帖最後由 斯路 於 2014-5-1 19:08 編輯
jasone_ti 發表於 2014-5-1 08:27 static/image/common/back.gif
哇估唔到一部amp既報告可以兩個人一齊寫，超正!
依家價錢有部current amp玩下真係幾級引，尤其望到bakoon既 ...
其實同Bakoon大機比個價錢上Questye真係有優勢，不話走向或者有唔同；Bakoon都出左mobile amp，價錢上同呢部應該差唔多，都幾值得諗諗呢。睇下會唔會有師兄朋友入手再借我玩玩先{:8_394:}
我個部既clicking noise已經無左，但近呢幾日甜師兄個部就有返，實在古古怪怪。可惜Questyle都重係無回我e-mail，呢個絕對係一個大問題，如果有師兄想入手我會先推薦佢再考慮考慮售後既問題呢。
黑翼菜鳥 發表於 2014-5-1 08:27 static/image/common/back.gif
看外表明顯是一架AMP,無line in真的有點奇怪.
兩位合作的文章果然非常精彩
其實都係，但開發者有自己堅持都實在只好尊重啦{:8_384:}
今次想聯合地寫個分享文就係因為甜師兄同我兩個聽既音樂唔同，追求亦有唔同，希望寫寫d共有而又係外間有人有討論既器材比大家參考一下者。希望大家鐘意。
snoopyboy001 發表於 2014-5-1 08:27 static/image/common/back.gif
多謝CHING咁好的分享
呢部機最近好似喺旺角中僑19/F角先見過
初頭都冇咩留意
佢哋好似係香港代理同用來玩 FOCAL 有源喇叭
http://www.micaudio.com/html/news/questyle.html
原來香港已經有代理，咁大家試都應該會容易唔少，真係好啦。咁師兄有無打算上去試試呀?
大電流設計推細喇叭仔應該還可以，經師兄咁提一提其實同FOCAL聲音應該幾有共嗚，講講下又有少少想試試夾FOCAL耳機添。
orcheung2002 發表於 2014-5-1 08:27 static/image/common/back.gif
Thanks and very nice. Enjoyed to read such a high quality review.
多謝支持 其實audio-gd都有推出相近甚至更平價位既電流放大DAC+AMP，一直都未試過audio-gd，但見到佢10年保用，實在非常唔錯。唔知有無師兄又可以分享一下呢? 兩個Ching都超正
真的好有意思{:1_330:} 斯路 發表於 2014-5-1 19:33 static/image/common/back.gif
其實audio-gd都有推出相近甚至更平價位既電流放大DAC+AMP，一直都未試過audio-gd，但見到佢10年保用，實在 ...
我正問有無人知 Questyle 既電流放大技術和 Audio-Gd 既 CAST 有什麼分別！
Audio-Gd 既 NFB-28 現在已能硬解 DSD，個價不加反減到 $#)) 人仔，同呢部 Q192 同價同功能，其實真係有得諗！
我新買既 Yulong D200 相對較平，又係無 Analog input 既一體機，應該同 Q192 可以比較下，讓大家多一個選擇都好！