柒陸影評: 紅VAN(前面省略15字)
今次的76影評轉由小弟做首發。本以為好自豪，但結果有點違和嘅感覺。柒陸影評: 紅VAN(前面省略15字)
*以下內容涉及劇透~ 本人好怕聽到類似"本土製作一定要支持"的說話。一黎港產片都睇咗十幾廿年，話抗拒就如同否認自己一樣無稽; 二黎到你真係買飛捧場，結果發現係爛片一齣，咁倒頭來親友問起又確係幾難如實稟報。查實好嘅電影唔分國界，當我地仲可以理直氣壯咁恥笑《西遊記之大鬧天宮》等"害群之馬"同時，對於《低俗喜劇》哩種打住"本地文化"頭銜的港產片，我地真係要問心究竟睇戲係為追上潮流定還是擴闊視野﹑為自己的心靈從繁重的生活中尋找最基本的慰藉。可以話香港電影從不缺乏遠見，缺的就是一套將自身的固有文化氣息向外推銷的獨門秘方。1997年，導演陳果就搵到哩條秘方，並實現喺一部投資只有50萬﹑用過期菲林拍攝﹑冇明星助陣的小本電影上。該電影叫做《香港製造》，以粗糙寫實的鏡頭色彩演奏出一首關於一個年青人被各種社會狀況迫得"走頭無路"，從而尋求自我解脫的哀歌。17年後嘅今日，一架由旺角開出的紅色小巴，載住香港人的光明與黑暗面往大埔方向駛去，從此消失得無影無縱...
曾經有段時間"紅van"兩字終日掛在眾人咀邊，所指嘅就係哩部陳果最新作品《那夜凌晨，我坐上了旺角開往大埔的紅van》(紅van)。本片稱得上係港產片史上最多人期待的小說改篇電影之一，就算平時冷係對港產片抱著觀望態度的@肥狗仔@聽見"網絡小說"+"陳果"哩對組合，都忍唔住慕名而来。"紅van"改篇自高登同名人氣小說，講述阿池(黃又南 飾)等17位各不相干的人於清晨時份乘搭了一部由旺角開往大埔嘅"van仔"，但當van仔通過獅子山隧道之後眾人發現除自己之外，整個大埔甚至全香港的人都在一迅間人間蒸發。接著係怪事接二連三地發生包括幻覺纏身﹑ 離奇死亡，還有戴住防毒面具的黑衣人向生還者步步進逼。究竟阿池等人所身處嘅係佢地熟悉嘅香港還是另有內情呢?
有關本片的話題隨著兩個月前的柏林影展早就不絕於耳。雖則話"高登人氣小說"哩個賣點已經夠爆，但當中炒得最高最熱的莫過於陳果在電影中所注入的政治立場。而就@肥狗仔@而論，港式風味濃厚嘅陳果捲土重來拍長片就猶如宮崎駿反口繼續畫動畫一樣令人興奮不已，於事懷著與好多觀眾不同的心情去欣賞哩套戲名記唔住，海報似樂隊嘅本地科幻大作。利申@肥狗仔@並冇睇過原著。撇開好睇與否，感覺上作為一套屬於陳果的電影"紅van"已算係交到功課。單單係冇悶場就已經驚喜萬分。本片亦俱備了同類電影的科幻，血腥，幽默，粗口，你會喺戲入面搵到美式cult片的既視感，又能感受到強烈嘅港劇文化。至於大家關心的政治隱喻，其實真係見仁見智，應該話可幸係導演處理有關內容嘅時候都比較謹慎，先至未至於被政治元素騎劫整部電影。反觀喺"空無一人"嘅香港入面，寂靜的環境更能牽動觀眾無限的沉思，並將現今香港社會的人情世故注入每個角落之中，哩個看點對@肥狗仔@黎講比什麼政治更具吸引力。
與《狂舞派》一樣，類似"紅van"的幻科求生題材喺外國其實並唔罕見，唔同係相比翻來覆去的常見要素，"紅van"唔單止以形式化風格的拍攝去採討人性，更針對香港人創造一個既熟悉又陌生嘅空間，將寫實情懷併合於哩個抽象的故事之中。喺電影入面，乘搭"紅van"的十多個乘客實際上代表著香港人不同的性格及特質，例如黃又南就有表著香港年輕一代的活力及自私自利; "毒撚"一角反映本土與外地文化融和;任達華代表了被社會遺棄的一群; 林雪的肥膏藏住情與義;惠英雄象徵著香港人的迷信心理; 球迷兩公婆則映射著那些政治冷感﹑ 同理心缺乏的普遍家庭，要嘗到失去的滋味才懂醒覺; 至於陳果愛將李璨琛以道友身份示人亦唔係純粹搞笑，其視中刀為止血的無里頭橋段實情是帶出香港人自强不息﹑ 迎難而上的精神。可以話電影通過車上的小數人去反映香港的大多數中產或者草根階層之間的關係與矛盾，但更重要係電影中每一個情節都隱藏住一條無形的道德界線，有時清晰易明，有時耐人尋味。好似有幕講述阿池對三位大學生的併命求救視若無睹，站在人道立場其處事方式固然要不得，但現實係這股冷模無情嘅風氣早已滲透至整個社會。
貼近現實嘅例子觀眾可能未感興趣，電影後期有一段投票殺人的情節就絕對引人入勝喇。@肥狗仔@上年曾經打過一篇關於PS3遊戲《The Last Us》的game評，講到當社會法律唔再生效時，長期受道德枷鎖抑制的人性黑暗面就會表露無遺，最終人類比喪屍更醜惡。黎到"紅van"，相同嘅狀況出奇地冇發展成相同嘅結局。當生還者討論應否殺死姦殺女性的古惑仔時，眾人間基本上無太大分歧，而觀眾亦會發現，阿池哩班生還者在全片中甚少試過狗咬狗骨，又冇人掙住做話事人。種種跡象都顯示電影嘗試推銷一種價值觀而非單純的人性，哩種價值觀包含著團結及公義。"團結"字面上可以有好籠統嘅解釋，但若果哩份團結放喺上面所提到嘅港人特質上面，我地就好容易會聯想起"獅子山下"嘅歌詞: "放開彼此心目矛盾，理想一起去追";所謂公義，就係公平加上正義。有人話"殺人填命"嘅概念早就注入中華人民嘅基因之中，根深柢固。即使香港法律基礎下，殺人者要終身監禁，但唔少人仍然認為冇野比"死刑"更適合殺人犯了，因為過中所涉及係公平問題，你殺咗人，當然要一命賠一命啦。不過有時公平同正義唔能夠相題並論，假設香港真係得返幾個接受過同等教育嘅人生存，睇見現行法規冇人再執行，自然唔想去遵守，所乘底嘅只有每個人心中嘅道德規範。若果哩種道德標準範被改寫成客觀的社會法則，咁哩套法則仲能夠代表到正義嗎? 而喺哩場"圍插強姦犯"嘅戲入面就出現咗個少細節，講到阿池仲猶豫要唔要下毒手嘅時候，強姦犯大罵阿池扮好人，結果阿池一刀插落強姦犯身上... @肥狗仔@喺度得出兩個結論: 第一係社會應該要有公義; 第二係公義好難容納正義。再睇返最近魔童發牌同普選事件，"紅van"所帶出嘅課題本人認為非常值得觀眾去深思。
"失去"係本片另一個關鍵字。唔洗@肥狗仔@重複相信大家都已經知道電影有幾多金句喻意著昔日香港蕩然無存。尤其是片中人物一再強調嘅"大埔人"同"起飛"喺上述大前題下都帶有強烈嘅象徵性及悲傷。前者係香港人嘅縮影，後者就背負著香港回復昔日光輝嘅美夢，且非常沉重。但最震撼嘅地方莫過於每個角色所不捨嘅物事並非物質上或者文化上，而只係單純一個字: "情"。本片仿佛告訴大家，就算盡失所有都唔緊要，最重要係人間有情。"紅van"就好似一封信，縱使所有人都唔能夠回家，但至少佢地將自己的情懷放入信封，希望有朝一日被人所發掘。
陳果曾經講過"紅van"分開上下兩集(本片收得就會繼續拍)，入場嘅朋友假如唔知頭唔知路，完場時分分鐘舉起兩隻中指，露出嗰隻含住樹葉嘅樹熊一樣的無奈表情。顯然同樣嘅經驗我地喺電視劇上已經領教唔少，不過比得錢入場觀眾就會有所要求。比較諷刺係作為一部懸疑片，即使結局下會分曉，但電影裡的種種迷團仲係叫人一頭霧水，如此一來電影就只餘下一堆似是而非的伏筆及港式粗口笑點，二來又嚴重影響了電影的完整性。事實上@肥狗仔@覺得電影的主題表達已經頗為完滿，而陳果嘅聰明之處就係拒絕以"背靠背"形式連拍兩集，但笨實之處係電影本身卻分咗上下集。意思就是再高深嘅思想都唔能夠獨善其身，脫離內容的框架，""形式"與"內容"必須相輔相成。既然導演都唔肯定電影能夠100%開拍續集，咁點解唔索性大刀闊斧將兩集的精要內容合二為一，而硬係要扮王家衛呢? 各位唔好誤會，@肥狗仔@唔係反對電影就咁結尾，睇翻外國好多小說改編電影都喜歡抽一兩個章節黎拍。未完結的故事或背景往往成為該類電影的包裝，其實質包裹住電影人的情感與見解。不過基於"紅van"係部撤頭撤尾科幻懸疑片，導演想喺唔交代所有事情嘅前題下收機可謂非常之"大貪"。縱使結尾紅雨小巴情節充滿意境，但都唔能夠阻止@肥狗仔@對真相的好奇，更唔好提其他觀眾。
"紅van"冇帶俾本人好大嘅滿足，完場時候反而有種欲言又止嘅失落。香港電影並不缺乏遠見，然而好多時都係慢人幾拍，到覺醒時又困於流水線的商業策略當中。最近本片以"詢眾要求"為由推出IIB版本，似乎係為開拍續集做準備。香港市場太細，要為什麼續作甚至係新作搵開機奶粉錢，單靠本土票房真係寸步難行。如今陳果堅持著本土製作的自主性，選擇製作一部不在內地上映的電影，即使再荒謬的商業決定本人亦早有心理準備。但令人惋惜係電影本身壓根就冇哩種自覺。@肥狗仔@一直都有個疑問: 究竟"紅van"係陳果嘅抒情文，定還是一部取悅觀眾嘅電影呢? 我覺得現在香港電影好多時都跌入哩類死胡同之中，一係就純粹視覺享受，一係就用一大堆"深層次"思想擠爆觀眾的腦袋，永遠無法取得一個平衡點。本人唔會話"紅van"係一部失敗之作，事實上電影從畫面到對白上的隱喻及意境都突顯咗本片嘅內涵，只怪厚此薄彼的製作方針，令電影好大程度無視作為懸疑片應有的起承轉合。戲中嘅紅van就好比電影嘅化身，駛過嘅每一處都留下港人的情懷，最後隨雨而泣，隨風而散，只留下一份遺憾。
個人評分: 7.1/10
{:6_193:} "紅van"冇帶俾本人好大嘅滿足，完場時候反而有種欲言又止嘅失落。"
我睇左小說版，都明知係上半部，但同你一樣感覺。 本帖最後由 Stanley5387 於 2014-4-20 23:03 編輯
我入咗戲院睇! 觀後感係成套片一路睇都有爆笑位出現，最“正”嘅稽角， 小弟當然首推林雪， 而既為一套科幻懸疑片，佢亦能令我持有一份追睇往後劇情嘅意欲， 但好可惜 …………………… 個結尾實在嚟得太突然同唔合情理，反駁位勁多，而致命點係完場前一秒鐘， 個故仔都仲有好多前文唔搭後理，喺大家依然一頭霧水嘅情形下望住紅van一去不復，所以完場一刻就聽到好多人講 : “吓， 唔係呀化， 咁就完？！ {:6_124:} marcolau 發表於 2014-4-20 20:41 static/image/common/back.gif
"紅van"冇帶俾本人好大嘅滿足，完場時候反而有種欲言又止嘅失落。"
我睇左小說版，都明知係上半部，但同你 ...
咁我應該慶幸自己冇睇過小說吧。就算有我唸都唔會差得過《二十世紀少年》。
Stanley5387 發表於 2014-4-20 23:00 static/image/common/back.gif
我入咗戲院睇! 觀後感係成套片一路睇都有爆笑位出現，最“正”嘅稽角， 小弟當然首推林雪， 而既為一套科幻 ...
完場時候我地果場都算係平靜嘅一群。可能大部份觀眾都做左功課先黎。OK嘅齣戲，起碼都幾緊湊。 本帖最後由 marcolau 於 2014-4-21 02:50 編輯
@肥狗仔@ 發表於 2014-4-21 01:56 static/image/common/back.gif
完場時候我地果場都算係平靜嘅一群。可能大部份觀眾都做左功課先黎。OK嘅齣戲，起碼都幾緊湊。 ...
緊湊我冇，因為知道，我只係睇佢點交代故事，
我其實擔心佢會同小說一樣玩得太大收唔到，因為明顯睇到佢冇點改到小說嘅錯誤伏線，下集佢照出就PK了。 {:6_193:}{:6_193:} marcolau 發表於 2014-4-21 02:48 static/image/common/back.gif
緊湊我冇，因為知道，我只係睇佢點交代故事，
我其實擔心佢會同小說一樣玩得太大收唔到，因為明顯睇到佢 ...
佢拍唔成下集就搞笑了~ @肥狗仔@ 發表於 2014-4-22 00:34 static/image/common/back.gif
佢拍唔成下集就搞笑了~
唔好呀，我要睇林雪呀，
佢話收二千萬就拍，而加過千啦。
頁:
[1]
2