暑期補習班~(Metro爆機~28樓小評~暑期課程完滿結束!)
本帖最後由 @肥狗仔@ 於 2013-8-30 22:55 編輯暑期戰積:
[*]Metal Gear Rising: Revengeance (已爆~3樓小評) 評分: 8.8/10
[*]Devil May Cry (已爆~4樓小評) 評分: 8.3/10
[*]Army of Two: The Devil's Cartel (已爆~7樓小評) 評分: 7.4/10
[*]God of War: Ascension (已爆~8樓小評) 評分: 9.0/10
[*]Tomb Raider (已爆~19樓小評) 評分: 8.4/10
[*]Fuse (已爆~19樓小評) 評分: 7.9/10
[*]Metro Last Light (已爆~28樓小評) 評分: 8.2/10
*************************************************************************************************
對本人黎講，真正意義的暑假終於來臨。為免年尾"十大遊戲"會空身上陣，趁哩段時間玩返之前Miss左的game。今次係MGRR。日版$21X~據說好快爆~十分好
PlatinumGames日版合影~
係超短!我第一次爆機用咗六個鐘(EASY難度),已經算慢! 本帖最後由 @肥狗仔@ 於 2013-8-2 16:14 編輯
MGRR今日爆機，normal用左唔夠5個半鐘。感覺媒體所給予的評分實在過低，哩隻絕對係PlatinumGames能登大堂嘅作品。故事應該由小島組提供，睇得出圍繞戰爭問題上本作仍然有野好要表達，除此之外就冇咩好講。話說保安睇毒物果幕堅好笑。殺敵吸血唔係新鮮野，但通過"斬奪"系統，有關設定就以一個比較好玩的方式呈現，PlatinumGames就係鍾意係哩D位度搞搞新意思。而戰鬥系統本身都係以爽快為主，除左視覺問題及敵人反應之外，整體都算得上滿意。
切野系統可以使用嘅地方十分多，但如果唔係對敵人的話，周圍斬只體驗出物理強大。並冇太大意思，亦唔算華麗。至於關卡設計，大氣電影運鏡應用情度比想像中要多，特別各種BOSS戰都有唔同的QTE表現。流程得5~6個鐘，但BOSS重覆度唔算高。另外製作人亦識得安排一D暗殺戰黎調劑一下節奏，情況同Batman差唔多，感覺尚算平衡兼流暢。個人覺得比享譽毒男界的Bayonetta仲要好玩，希望PlatinumGames可以keep住咁嘅水準開發更多好作品。
個人評分: 8.8/10
下回目標
本帖最後由 @肥狗仔@ 於 2013-7-31 02:01 編輯
用左8個鐘多少少爆左DMC(normal)。冇太多野講，畫面相信係UE3遊戲入面頂級果批。gameplay本身就預期之內，動作就mix哂旦丁及里奧的能力，但遊戲入面部份要用到武器屬性去到達的關卡倒令遊戲增添唔少樂趣及活動性，過往只有Bayonetta可以短時間穿梭戰場，如今DMC將空中飛行正規化亦做到差唔多的效果，DMD鬼應該會玩多好多花式。至於整體表現上，製作單位Ninja Theory係西方團隊，場景美工基本上都充斥住歐美重口味風格。你話同系列一貫的風格比邊個好D，我就覺得各有千秋，反倒哩種風格配上果種死亡金屬BGM可能仲夾D，不過既然隻game本身都係賣戰鬥部份，打得投入就唔會理有咩景。
本作亦正好體現出日本同歐美工作室嘅分別。遊戲入面各種極之燒錢的美工及場景變化都足以將前作秒殺。BOSS戰引入了巨大而噁心的怪物與之前系列的神化/型化的BOSS大相逕庭。流程中亦夾雜住其他體驗例如上面提到的瑪里奧式關卡，使到遊戲唔洗太單一，哩點個人比較buy。但相比同一班底的前一部作品《Enslaved: Odyssey to the West》，哩隻DMC喺關卡/玩法多元化方面做得亦唔算得上係好。整體就係"西方style & 日式gameplay"的混合體。相信Ninja Theory係顧及到系列支持者所以先唔敢太放，不過綜合都算係好作品，雖然易玩左好多(相同難度下)。
本作的新風格對系列來說仍然係個比較大的衝擊。近年CAPCOM想要打入西方市場，DMC系列無疑成為了犧牲品，因為根本冇咩成功的例子。DR如此，BIO亦如此。以現時的銷量，相信下集DMC會交返比日本單位開發的機會唔細。
個人評分: 8.3/10
下回攻略之遊戲未來一兩日揭曉... 第三款遊戲由玩亞送上~Army of Two: The Devil's Cartel~
補圖~
郵件送埋玩亞及GTAV現金卷~平過出面街@@?
連續打機打咗一個星期，雙手都出現甩皮情況。今日爆咗Army of Two，流程比想像中要長(約6~7個鐘)。作為Visceral Montreal最後一款作品，我唸今集應該算係最精彩嘅一集。雖然絕大部份時間都係"突突突..."但戰鬥形式間中都有變化，例如追車﹑直昇機支援﹑行地道及持盾進攻等等。
今集多咗一招叫做"Overkill Mode"嘅大絕，開咗可以係短時間內不死身+無限彈+高攻，每一次都打得十分爽快。值得一提係本作使用到DICE的frostbite 2引擎開發。物理破壞十分理想，光影渲染亦達到系列之冠。至於音效更係值得加分嘅地方，基本上就係用上BF3同MOH同一套錄音系統，槍聲清脆自然，令人有股非要收集所有槍械不可嘅衝動。儘管本作只有單機及雙人合作，但人物自定義仍然豐富。除左改槍之外，角色衣著, 紋身, 面具都可以購買，耐玩性唔差。
如果要講缺點的話，今集AI發生同第一集相同情況，就係敵兵不時會走位。表面上係聰明，但玩得多就知道大部份都係亂咁走，今集算好，因為敵人唔係好似鐵甲萬能俠咁多血。整體上以純火爆槍戰為賣點的話，本作至少係音效上比其他真實向TPS要高。但當你玩完之後，除咗"突突突"之外，遊戲好大程度唔會有其他野值得你回味。
個人評分: 7.4/10
下堂就玩哩隻啦~http://post76.hk/data/attachment/forum/201308/01/222859eux4k0ffzkcyyzcx.jpg 本帖最後由 @肥狗仔@ 於 2013-8-5 09:10 編輯
識我嘅朋友都知道我對GOW系列可以話係又愛又恨，愛於佢係帶我入遊戲界的作品，恨於佢出得太濫同保持唔到水準。所以當上年SCE宣佈又出一集嘅時候，本人已經以看待"無雙"作品嘅心態去面對住源源不絕嘅戰神遊戲。同樣都係三月推出，本人因為上述原因選擇先買GEOW:J(果隻game就冇講嘅必要，大約只值7.2分左右)，而直到最近先心思思買返隻戰神返黎玩，今日爆機，花左9個半個鐘時間(如果唔係卡解迷會仲快)，玩完之後對於當初揀GEOW:J而唔揀哩隻感到極之後悔。《God of War: Ascension》絕對稱得上自2代之後另一款系列佳作。
首先要讚嘅係戰鬥系統，戰神嘅戰鬥系統由1代起就冇咩大變化。喺正統續作戰神3時候，開發團Santa Monica將戰鬥嘅打擊感增強，但始終都離唔開果幾個套路。去到今集”Ascension”，Kratos嘅戰鬥方式有明顯變化，本作新增左狂怒計，簡單黎講就係連擊數愈多，狂怒值愈高，當過左某臨界點時就會有攻擊力加乘，系列一貫嘅"三角X3"重擊還有變身大絕等必殺技亦要達到狂怒境界先可以使用(前作嘅”怒火焚身”係本作中被弱化成一次性嘅招式。)。相反，若果玩家中途被擊倒，又或者連擊斷開一段時間狂怒值就會迅速下降至0。哩種設定一洗系列前作又或者好多同類作品嘅遊玩方式。一般遊戲黎講，玩家會通過"輕鬆攻擊"黎儲點，最後黎個魔人/神化黎橫掃千軍，喺本作入面，有關唸法只會令玩家愈玩愈死，要取勝玩家就要抱著不進則退嘅態度，通過不停回避同維持連擊黎獲取更高攻擊力及更多招式。
配合有關系統，敵人強度亦都相應增加。不論係盾兵同護甲兵，或者係一般女妖，喺新系統下，冇達到狂怒嘅攻擊實在起唔到咩野作用，使到遊戲難度及挑戰性大幅攀升。而系列一貫嘅QTE亦被改良過，敵人的硬值QTE觸發器唔再係用”O”鍵而係用”R1”，由於R1係用鎖鏈去拉敵人到玩家身邊進行各種攻擊，所以好處係觸發QTE嘅時候就唔洗再跑埋有關怪物身邊，二黎一般戰鬥亦可以打到好似DMC咁係半空中拉地面敵人上黎虐待。進入QTE後，除左一般反應鍵，部份小頭目敵人需要玩家用一般攻擊鍵狂砍，途中敵人會反擊，玩家要用類比避開。哩點算係對用左5集嘅QTE系統加點”互動”成份，個人覺得刺激咗唔少。至於武器方面，今集嘅不同之處在於由頭到尾Kratos嘅主要武器都係得把混沌之刃，但通過4種不同的屬性”Ares(火), 宙斯(電), 波塞東(冰), 哈迪斯(靈) ”，由其是4種屬性各有自己嘅相關招式及魔法，玩家通過即時切換屬性以採取不同戰略去應付唔同屬性嘅敵人。
至於其他武器則由用完即棄嘅武器取而代之。本作中”O”鍵係使用物理攻擊嘅按鍵，一般情況下Kratos會用拳腳攻擊，但係有武器嘅情況下就會使用有關武器。遊戲提供左大刀，大鎚，矛，盾等物理武器，玩家可以自由執拾轉換(每次帶一種)。面對住有屬性嘅敵人，物理武器可以無視敵人嘅屬性防禦進行物理攻擊。相比過往以主武器方式出現，個人更buy今集嘅設計，既然黎黎去去都係鏈類武器居多，咁索性用哂鏈刃好過。
至於解迷方面，有一點可以提下，今集大部份解迷都會用上兩種”銜尾蛇護身符”，一種係可以令時間前進後退，從而將物件或道路還原/破壞，還有一種係召喚分身。兩個護身符都令解迷過程增加唔少樂趣(例如在物件還原期間搵出路/召喚分人企機關)，但後者出場時間唔多，如果可以應用多D就好了。而上述兩種護身符亦可投入戰鬥之中，前者減慢敵人，後者就幫拖。講到解迷，不得不講今集嘅關卡設計，相比戰神3嘅戰鬥主導型關卡，今集流程設計會貼近返1,2代，即平衡戰鬥及解迷部份，哩點個人十分歡迎，因為咁樣先係戰神嘅精髓。而關卡節奏方面，遊戲採取插敘方式交待劇情，有關手法近年業界都好常見，不過本作處理得比較理想，時間轉換一次起兩次止，唔會出現唔連貫情況。而遊戲由一開始的百手泰坦巨人 > 三蛇預言者神殿 > 阿波羅巨像 > 最終BOSS海戰。場景雖然唔算多，但內容豐富，節奏亦唔錯，叫人印象深刻。與1代相似，玩家後半段會花大部份時間係阿波羅巨像場景上，由腳指尾打到上個頭度，再將一個爛左嘅巨像回復原狀，哩點個人覺得十分之正。
關卡出色，論功勞當然唔少得突出嘅畫面美工。與Naught Dog一樣，美工一向都係Santa Monica嘅強項。戰神3時有關遊戲畫面已經貼近CG，去到今集，強化嘅畫面渲染令到場景上嘅一草一木都份外立體，怪物嘅多邊形都好仔細，特別係最後海怪大戰，果隻同哥斯拉一樣大嘅觸手海怪做得非常攝人，即使有關美工人員喺前作中已經做出數隻，栩栩如生嘅巨型泰坦，但都叫人不得不配服佢地嘅技術同美學。
遊戲並唔係冇缺點的，部份鏡頭(主要係wide shot)因為開發團隊設計嘅構圖關係，主角會變到好細粒，但問題係當時仲係打緊，所以有時轉返近鏡會發現自己冇左唔少血。還有就係劇情方面。遊戲包裝個cover back印左一句宣傳口號: “Before he was a God, He was a Man”, 事實上同一句口號都可以用喺08年嘅《Chains of Olympus》身上。劇情係戰神遊戲其中一個亮點，但哩個亮點極其量只係喺頭兩集度發光發亮，其餘什麼外傳甚至係戰神3，劇情都相當狗血。但狗血還狗血，今集值頭冇咩劇情可言，否則會更加出色。
多人遊戲未試，不過就單機而言，儘管本作毫無疑問係部外傳，但講質素已經足以對得住Santa Monica個名。個人格外欣賞本作嘅新戰鬥系統，令到系列”沉悶”嘅戰鬥注入比日式動作遊戲更緊張嘅全新體驗，單單係game concept部份已經十分超前。回想起當年玩2代時候嘅震撼雖然無法複製，但喺哩兩日嘅遊玩過程中竟然有少少感覺出返黎，絕對係料不可及，亦令本人對哩個系列重燃希望。個人相信有咗今集哩套新系統，戰神要再戰10年都唔係問題。
個人評分: 9.0/10
下回就玩哩隻:
本帖最後由 @肥狗仔@ 於 2013-8-6 10:50 編輯
有同學仔報料話羅拉已經去到200頭價位~steam版hold住先~
(Post76 Android 手機版送出) 今日去黃金睇，但發覺平嘅只係外國版本，最後到188睇，以$25X入手。另外入多隻MGRR英文版，實在太痴線了~