痛失家駒誰伴我闖蕩家強抗戰二十年 (轉載)
轉載自BEYOND MUSICBeyond靈魂人物黃家駒20年前的今日在日本墮台命隕，除了跌碎了萬千歌迷的心，亦令弟弟黃家強一度迷失方向。20年轉眼過去，家強每年此刻都不禁懷念哥哥。談到當年與家駒生活點滴，家強仍能娓娓道來，縱使人已離世，但家駒依然活在家強心中。
二十年前的今日，Beyond的黃家駒結束短短31年的光輝歲月。當年，他在日本遊戲節目中不慎滑倒墮台，經過6日施救後終告不治。面對家駒無聲的告別，萬千歌迷心痛欲絕，香港樂壇亦從此失去一位音樂奇才，而黃家強更痛失一位好哥哥、好支柱。縱然家駒已離開20年，但家強依然未能釋懷，每年家駒死忌，家強都會用自己的方法沉澱對哥哥的思念，他說：「每年6月30日都唔出街，唔想有任何舉動，默默喺屋企諗吓佢，二十年都沖淡唔到。」
幾多心中創傷
即使家駒已離開20年，但家強每逢聽到哥哥的聲音，總會泛起陣陣哀愁：「聽到佢唱歌就好掛住佢。（開騷唱佢嘅歌控制情緒？）唱佢啲歌冇咁難受，都係聽自己把聲；但聽佢把聲感觸大啲，會勾起回憶，通常唱《情人》同《誰伴我闖蕩》呢啲慢歌感觸大啲。」
「遙望過去生活點滴，家強表示家駒是朋友堆中的活動搞手：「佢好鍾意群體活動，鍾意帶朋友返屋企玩，又成日約同學玩，一到夏天就經常郊遊，組咗Beyond之後，佢都好鍾意叫隊員一齊旅行。（有冇帶女朋友去？）會呀，仲帶埋結他，嗰陣讀書未識作曲，扮嘢多，揸住本好厚嘅英文歌書唱。」
遲到大王罰錢
在歌迷眼中，家駒總戴着光環，但家強踢爆家駒私下原來是「遲到大王」：「佢好爛瞓(口架)！做嘢最遲接佢，因為佢永遠都遲，次次都遲一個鐘。試過約早一個鐘，嗰次佢竟然準時，鬧到我哋三個死。我哋唔知佢幾時準時幾時遲到，於是遲到就罰佢錢，遲一個鐘就罰100蚊，點知佢有次落嚟唔講嘢，懶型咁擺低100蚊。其實我哋係要佢準時，要錢有鬼用？」
除了遲到之外，家駒有時亦會發藝術家脾氣：「有時去啲『畀面派對』，例如去人哋生日會唱歌，我有同佢呻，佢聽到後同我一齊嘈，之後就寫咗隻首《俾面派對》，用自己方式表達不滿。」有時面對歌迷，家駒亦會毫不留情開火：「有次歌迷圍住我哋(口架)車走唔到，家駒喺天窗伸個頭出嚟鬧歌迷，叫佢哋散開。」
包容怕悶細佬
身為樂隊主腦兼哥哥的家駒，不時包容細佬，家強說：「當時出活動日日唱嗰三隻歌，《大地》、《喜歡你》同《再見理想》，好悶、好Pop，試過覺得悶，喺活動度我走咗，原本想出去(禁)錢，愈(禁)愈忟，咪行耐啲囉！返去之後，阿哥喺台上話：『佢病好喇！返嚟喇！』可能佢喺台上作嘢，話我病咗。」
家駒遠走二十年，但家強對他的思念從未停止，決定懶理閒言閒語，堅持用自己的方法懷念家駒：「我係為家駒做啲嘢，點解唔可以同喜歡嘅家駒嘅歌迷集體懷念？我咁做係我嘅心願，唔止我懷念家駒，但如果我唔做，又點Group到啲人去懷念家駒？點解家駒歌迷同屋企人唔可以幫佢做？我好滿意今年20周年做嘅事，大家比想像中嘅懷念情感更多。」
痛失摯愛的哥哥，家強20年來亦無法忘懷，也許，他跟歌迷一樣很想為家駒唱一句：「多少春秋風雨改，多少崎嶇不變愛。」
http://www.beyondmusic.net/news/wp-content/uploads/2013/06/0630-00470-060b1.jpg
家駒逝去二十年，但他的歌聲，長存在家強與歌迷心底。
http://www.beyondmusic.net/news/wp-content/uploads/2013/06/0630-00470-060b3.jpg
開拍《Beyond日記之莫欺少年窮》，高志森（右）及黃百鳴（左三）等電影人親身支持。
http://www.beyondmusic.net/news/wp-content/uploads/2013/06/0630-00470-060b2.jpg
1994年，Beyond與王菲（中）在音樂頒獎禮的慶功宴上玩到癲。
http://www.beyondmusic.net/news/wp-content/uploads/2013/06/0630-00470-060b4.jpg
家駒逝世多年，但仍活在Beyond歌迷的心中。
http://www.beyondmusic.net/news/wp-content/uploads/2013/06/0630-00470-060b5.jpg
家駒於91年5月在東京開騷。
http://www.beyondmusic.net/news/wp-content/uploads/2013/06/0630-00470-060b6.jpg
頁:
[1]