黃家強駒歌觸痛 誰伴我闖蕩 (轉載)
轉載自BEYOND MUSIC二十年前的今天，歌手黃家駒從高台一跌，在無數樂迷的世界裏從此不再海闊天空，尤其對家駒弟弟黃家強來說，失去了隊友，同時痛失至親，兩兄弟從此天人永別。時至今日，家強悲傷未減，每聽起「駒歌」時都會觸動深處神經，每年到了這個愁人時分，家強稱只會閉關悼念親兄，更道出家駒鮮為人知的種種軼事，逝者已矣，家駒的精神其實一直永存大家心中。
黃泉路上無老少，想不到在1993年6月30日，31歲的Beyond主音兼靈魂黃家駒從日本舞台墮下身亡，結束短暫的光輝歲月，這一跌，跌碎無數樂迷心，最心碎的必然是其胞弟黃家強。每年家駒死忌，家強選擇閉關靜靜悼念這段兄弟情，他說：「我唔出街、唔做嘢、唔想有任何舉動，自己默默喺屋企諗吓佢，太太都知。」
有時他想憑歌寄意，卻怕觸動那份愁緒，又怕種種回憶如泉湧現，尤其聽到句句到肉的《誰伴我闖蕩》，家強說：「我驚聽舊歌會唔開心，情緒波動好大，聽到佢把聲已經唔開心，好掛住佢，唱K時有人點佢嘅歌，愈聽嗰種情緒愈爆出嚟。嗰兩晚（音樂會）唱佢嘅歌我有忍住，有時情緒控制得好咪控制住，但聽佢唱《情人》、《誰伴我闖蕩》呢啲慢歌感觸大啲。」家駒走了，少了一位好哥哥伴家強闖蕩，不過家駒屢次報夢，令他覺得哥哥音容宛在：「二十年來都沖淡唔到，對我來講真係唔得，發夢成日見到佢，嗰種感覺唔同，你唔知究竟係發夢定係平時嘅生活片段。」
爆兄長爛瞓遲到
家強憶述那些年與哥哥的種種瑣事，一事一句，點滴在心頭：「佢鍾意群體活動，好鍾意去大嶼山長沙游水燒嘢食，又組團去泰國玩，女朋友都有一齊去，帶埋結他唱吓歌。」家駒被不少粉絲「神話化」，家強卻揭露他遲到壞習慣：「佢好爛瞓，永遠都係最遲到，但有次約佢早一個鐘，竟然準時，鬧到我哋三個死。之後我哋講好遲到要罰錢，有次遲一個鐘罰佢100蚊，佢嚟到唔講嘢，懶型咁掉低100蚊。仲試過去日本發展時遲到，畀日本嗰邊鬧到佢死。」
終究每個出色音樂人都有一點藝術家脾氣，家強又指哥哥曾試過「躁底」鬧粉絲：「有粉絲圍住架車走唔到，佢伸個頭出嚟鬧佢哋散開。」雖然我行我素，有時都要屈服於現實之下，最後惟有訴諸音樂，家強說：「無可避免要出席啲畀面派對，例如去人哋生日會唱歌，經理人叫我哋去咪去囉，佢聽到我呻又會同我一齊嘈，之後就寫咗隻《畀面派對》，用自己方法去表達不滿。」
昔日年少氣盛的家強亦有任性、耍脾氣的一面，不過家駒往往幫他打圓場，不加指摘，彷彿一切盡在不言中：「試過為迎合市場，日日都要唱啲流行曲，唱嚟唱去都係嗰三首，有次我好忟，活動期間走咗出去。之後返嚟阿哥喺台上話『佢病好啦，返來啦』，佢知我唔高興，無謂再話我，希望我悟到件事。」
與樂迷集體懷念
今年正是家駒逝世廿周年，家強希望能與樂迷來集體懷念哥哥，當作完成自己一件未了心事：「John Lennon老婆都幫老公搞紀念館，親人去做呢樣嘢係自然去做，我唔理人哋點睇，唔想年年做嘅嘢一樣，可能下一次會用其他遺作去做啲嘢，唔想好似某人咁為咗某啲嘢去消費。」不過，最令人不禁搖頭嘆氣的是其餘Beyond三子的友情不知不覺已變淡，家強說：「佢知我哋諗乜嘢，如果佢知三個人咁嘅局面，不如唔好搞，無謂拉拉扯扯。」雖然重組夢暫時撲空，但相信家駒在天有靈，都希望三子再拎起結他和鼓棍，永遠高唱我歌。
此外，家強日前接受內地傳媒訪問時，對於有內地文章指Beyond的歌大受歡迎，只是易上口的「口水歌」而已，家強就反駁：「我覺得他（作者）已經錯了，『口水歌』是類似翻唱的歌，人家唱完你又唱，但全新的歌曲怎可能叫『口水歌』呢？」
黃貫中 讚天生領導者
前Beyond成員黃貫中（Paul）談起跟已故黃家駒首次見面時，給他的印象是其「騎呢」的外表，Paul說：「嘩，點解呢個人咁油o架（滿面油光），點解佢會戴副紅色框嘅眼鏡嘅？」不過經過相處後，發覺家駒有內在美，是天生的領導者，不會隨波逐流外，既聰明又有主見，最難得是知人善任。話說當年家駒創作了新歌《大地》，請得劉卓輝填詞，雖然明知歌曲必大熱，但家駒卻親自邀Paul主唱，Paul謂：「我嗰時推o架，同佢講我只識彈結他，但係家駒話首歌好啱我，叫我試吓，我咪唱囉，原來嗰時家駒覺得Beyond需要改變，要換吓主音先有新鮮感。」
世榮常夢會故友
而另一成員葉世榮則說家駒雖已離世20年，但故友仍長留於他腦海中：「我都有夢見家駒，多數都係以前夾band嘅片段，但同佢傾過乜，瞓醒就唔記得咗。」信佛的世榮希望家駒惜緣，如再世為人或去到西方極樂世界，最緊要「活」得開心。
謝安琪 感激偶像鼓勵
謝安琪（Kay）自言聽住Beyond的歌曲長大，覺得已故歌手黃家駒的歌能激勵人心，大讚偶像唱歌有靈魂，而她最愛的歌是《遙望》，更聽聞這歌是家駒在日本望着雪景創作：「首歌係寫對音樂、樂壇追求嘅渴望，以前細個冇咁大嘅感覺，依家做咗歌手有好大共鳴，我都有翻唱過呢首歌。」Kay又話見證Beyond由地下樂壇開始再成功踏上大舞台，對當初做新人的她起鼓勵作用，她更說：「聽佢嘅歌，有種家駒企喺背後，叫我加油嘅感覺囉。」
問Kay當過追星族嗎？她笑言：「有呀，不過Beyond每次做慈善騷，都碰正我考試，但我會溫好書，問准媽咪先會去，不過我唔會企得好近佢哋或者大叫，聽到佢哋嘅歌就得o架啦。」Kay忽發妙想，如家駒在，希望可跟偶像合唱及唱他作的歌，同時最想多謝家駒給予她發奮圓歌手夢的力量。
陳海琪 難忘家駒對樂壇有火
資深傳媒人陳海琪跟Beyond可謂識於微時，提到和黃家駒初次邂逅，她大讚對方態度誠懇：「第一次見面佢知我喺電台做，拎住《再見理想》嘅卡式帶畀我，睇吓我有咩可以幫到佢。（點吸引你播佢嘅歌？）因為佢當時表情好誠懇。」
她笑言家駒在音樂以外有一種鄰家男孩的感覺：「佢除咗音樂，好多嘢都冇所謂，係一個非常nice嘅人，搵佢傾偈佢肯同你傾。」提到家駒生前似乎對樂壇失望，陳海琪說：「佢冇灰心，只有憤怒，佢覺得香港有娛樂圈，冇音樂界，大家聚焦嘅嘢唔同，佢想人哋明佢啲歌講咩，但人哋聚焦喺佢女朋友同搵幾多錢。」
家強為已逝去的兄長，繼續在樂壇發光發熱。
http://www.beyondmusic.net/news/wp-content/uploads/2013/06/0630-00282-060b1.jpg
家強、家駒、阿Paul演出時，表現投入。
http://www.beyondmusic.net/news/wp-content/uploads/2013/06/0630-00282-060b2.jpg
歌迷最懷念Beyond的光輝歲月。
http://www.beyondmusic.net/news/wp-content/uploads/2013/06/0630-00282-060b3.jpg
葉世榮經常想起與家駒夾band的片段。
http://www.beyondmusic.net/news/wp-content/uploads/2013/06/0630-00282-060b4.jpg
黃貫中表示當年家駒要他試唱《大地》這首歌。
http://www.beyondmusic.net/news/wp-content/uploads/2013/06/0630-00282-060b5.jpg
當年Beyond四子，有鬼馬一面。
http://www.beyondmusic.net/news/wp-content/uploads/2013/06/0630-00282-060b6.jpg
頁:
[1]