黃家駒不死樂與怒 (轉載)
轉載自BEYOND MUSIC廿年了……廿年前的明天，遠赴日本發展的Beyond樂隊主音黃家駒因墮台客死異鄉，狠心向萬千樂迷作「無聲的告別」，然而從過去走到現在，那充滿樂與怒的「昔日舞曲」依然縈繞人心。一連兩天的家駒紀念篇，讓我們一同緬懷一代搖滾班霸的靈魂人物，重溫這位音樂天才的傳奇故事，還有，回味那段一起高呼Rock & Roll的「光輝歲月」。
Beyond樂隊於1983年成軍，寂寂無名的「長毛小子」，從地下走上殿堂，無數經典歌如《阿拉伯跳舞女郎》、《舊日的足跡》、《真的愛你》、《午夜怨曲》、《光輝歲月》、《大地》、《長城》、《灰色軌跡》、《海闊天空》……風靡大中華樂壇30年，而前經理人陳健添（Leslie Chan）在1986年簽下Beyond，他對Beyond的成長，當有着更深、更直接的體會。
曱甴麵見真情
Leslie曾因歌曲版權跟Beyond鬧不和，其後更打上官司。已移民澳洲多年的Leslie，對昔日夥伴依然關心，日前接受長途電話訪問時，他細訴跟家駒同度過的7年光景、往事。在1987年，Beyond推出首張EP《永遠等待》後，漸為本地樂壇認同，Leslie有次跟家駒到橋咀島演出，當天家駒打扮嚇了他一跳：「佢頭髮冇乜梳過，戴住副烏蠅厚眼鏡，啲衫又唔係幾執過，着住件恤衫再加件好唔襯嘅卡其色外套，真係好求其囉，不過佢覺得冇乜問題，見到個漢堡包就大大啖咬落去，仲豎高手指公讚好味，就知佢個人好簡單，好有真我個性，個人好真。」
說到家駒的隨和，Leslie重提「曱甴麵」的故事。話說有晚，家駒錄影完《勁歌金曲》後，跟雷宇揚等友人到五星級酒店食飯，平日愛幫襯旺角band房後面茶餐廳的家駒，在高級食肆內，仍然order牛腩麵，Leslie憶述：「當食到一半時，有位朋友發現家駒碗麵內浸住一隻好似黃豆咁大粒嘅曱甴仔，家駒啲朋友即時扯火大鬧：『成百幾蚊（時為90年）碗牛腩麵都畀曱甴人食，快啲叫經理嚟投訴呀！』但家駒冇嬲，仲話算啦，人哋打工啫，唔好難為人，唔食都食咗啦。」從這件小事，就可看到家駒很有同情心，懂得體恤別人。
重新改造四子
談及任Beyond經理人的「棘手」事，Leslie分享了當年要游說四子穿上奇裝異服宣傳《阿拉伯跳舞女郎》的故事。當時是87年，Leslie靈機一觸，游說他們穿上阿拉伯民族服飾宣傳，雖明知必有異議，但仍硬住頭皮獻計。Beyond對新造型當然「藐晒嘴」，不停抗議，不過Leslie知家駒最明白事理又可起帶頭作用，故主力說服家駒，指此曲必爆，要是他們肯穿阿拉伯衫必成話題，結果家駒考慮了片刻即首肯，其他成員也不敢持異議。
Leslie和Beyond一直合作無間，直至89年尾，他和四子關係開始變差，雖未成仇人，但暗藏心病，可是一次慈善之旅，卻修補了Leslie和家駒之間鴻溝。90年，電台高層透過Leslie邀家駒到新畿內亞做探訪，礙於資源有限，家駒只可帶一人同行，Leslie自薦上陣，在幾日行程中，Leslie和家駒鮮有交流，直至行程最後一天，家駒於小教堂跟小朋友唱歌，之後跟每人逐一擁抱：「家駒見到我時，好自然咁攬住我，嗰一刻我覺得同家駒之間嘅誤會完全消失晒，我好感動，佢過咗世20年，至今我仲清楚記得同家駒呢個擁抱。」
未見最後一面
相識多年，Leslie對於Beyond依然有一份情義結，對未能見家駒最後一面倍感遺憾。當年他從友人獲悉家駒在日本跌倒昏迷，隨即相約到日本，他們甫落機便飛車到醫院，惟因日本唱片公司的人員阻撓，他和友人不得不回港再等消息，Leslie說：「第二日喺日本機場，朋友同我講家駒尋晚過咗世，怕我傷心，所以臨上機先同我講。嗰一刻，我腦袋一片空白，只差幾十步就入到病房見家駒最後一面，就係因為我在場，連累其他關心家駒嘅朋友都見唔到佢，我好內疚。」另一件令他仍耿耿於懷的事，則是未能帶領Beyond成功打入日本市場。
黃柏高：音樂天才後繼無人
金牌經理人黃柏高（Paco）於90年代曾跟Beyond共事，期間發布過兩張專輯，卻打造了《海闊天空》、《情人》等經典作品，至今仍是Paco的最愛，遺憾未能替他們製作演唱會。說到家駒，Paco感觸後繼無人：「家駒係一個最難得嘅天才，佢嘅聲音、歌詞有好強烈個人風格，係集所有優秀元素於一身嘅音樂人。好可惜，就算二十年後嘅今日，都冇一個似佢咁有天分嘅人，一個都冇。」
當年Beyond在港打出名堂後，吸引到日本經理人公司，Amuse就有意簽他們到日本發展，Paco也盡量配合，並鼓勵他們在日本製作唱片。不過對於家駒有意在日本發展的決定，Paco則有所保留：「當年我有同佢傾過，喺日本製作唱片就絕對正確，但真正要發展，難度非常之高。」
挑戰難度闖日
然而家駒的音樂世界天空海闊，外闖之心堅定不移，Paco說：「我同佢講你哋挑戰一個難度最高嘅地方，雖然你哋好努力去唱日文，但係都好難融入當地文化同藝能界。家駒當時相當堅持，覺得可以闖一番成績。當年大家都希望向外發展，所以當收到日本邀請係好吸引，可惜不幸嘅事亦喺當地發生。」
家駒逝世廿年，他的音樂卻不死，Paco深信若他仍在生，必定會繼續在樂壇綻放異彩：「佢哋精神永遠都不死，Rock & Roll Never Die。」
單立文：冇咗態度，冇咗樂壇
當年家駒的喪禮，單立文（豹哥）便是扶靈人之一。時光飛逝，二十年過去，豹哥從未忘記這位故友，讚揚家駒留下來的音樂作品影響深遠，是一個「音樂奇葩」，永遠值得人尊敬。
豹哥與家駒私下感情很好，也很了解他。豹哥表示家駒一直會以正面角度思考任何事情，很有愛心，很有態度：「好多嘢有佢喺度成個感覺唔同，自從家駒走咗之後，好多嘢都缺乏咗色彩，令人若有所失。」豹哥更不諱言：「冇咗家駒，冇咗態度，亦冇咗樂壇。」
鄧建明：水火不容？邊有得鬥
太極成員鄧建明（Joey）與家駒的友誼從夾Band開始，回憶青葱歲月，Joey稱當年兩人愛蒲尖沙咀河內道一間馬來西亞餐廳，荷包有錢時候會Order兩碟「鮑汁雞球飯」，傾到餐廳打烊。傾追女仔經？Joey笑言：「我同佢都係四眼仔，我戴金絲眼鏡，家駒仲係厚框嗰隻，邊識到女仔o架？」
在Joey心中，家駒是「結他王」，喜歡英倫音樂，是家駒教他聽英國搖滾樂隊「The Police」。早期Joey與家駒、家強曾組NASA樂隊，相信是首批香港band到內地蛇口登台。
後期Joey和家駒各組太極及Beyond，盛傳兩隊鬥到水火不容，Joey說：「邊有得鬥，冇呢樣嘢，佢哋有好多Hit歌，我哋都會諗佢哋啲歌Hit嘅原因。」Joey稱最記得《翡翠歌星賀台慶》，後台逼滿歌手，他謂：「我哋太極、Beyond成班喺化妝間玩『估戲名』，哥哥（張國榮）仲一齊玩，又點會不和？」
黃家駒是結他王，弦線在他手中，充滿靈性，生命力澎湃。
http://www.beyondmusic.net/news/wp-content/uploads/2013/06/0629-00282-065b1.jpg
Beyond於83年成立，之後有一段時間與陳健添合作無間。
http://www.beyondmusic.net/news/wp-content/uploads/2013/06/0629-00282-065b2.jpg
黃柏高曾與Beyond合作過兩張碟，均取得美滿成績。
http://www.beyondmusic.net/news/wp-content/uploads/2013/06/0629-00282-065b3.jpg
單立文
http://www.beyondmusic.net/news/wp-content/uploads/2013/06/0629-00282-065b4.jpg
鄧建明（右）
http://www.beyondmusic.net/news/wp-content/uploads/2013/06/0629-00282-065b5.jpg
頁:
[1]