黃家強家駒成日同我講嘢
黃家強家駒成日同我講嘢東方日報 2013年05月18日(六)
今年 2013 年，對 Beyond 別具意義，除了是樂隊成立的 30 周年，亦是主音黃家駒逝世 20 載，舉行紀念演唱會，本是理所當然兼順應民意，連傳不和的前成員黃家強及黃貫中都首肯喊 ready，惜葉世榮一句「唔玩」，令一切成空，幸好家駒在天有靈，促成家強「單飛」開紀念騷圓夢。
唔想為夾 band 反面
我知好多人想睇 Beyond 30 周年紀念演唱會，開唔成我都有失望，不過做音樂，大家要互相遷就咁就唔好啦。我人生第一個賣飛騷《It's alright LIVE 2013 演唱會》，會喺 6 月 4、5 日喺九展舉行，好多人都關心曾經同我傳不和嘅 Paul（黃貫中）、世榮（葉世榮）會唔會上台做嘉賓。我自問冇同人不和，叫佢哋一齊上台玩都無妨，不過嗰幾日世榮唔喺香港，既然佢個 plan 咁密，唔好打擾佢，朋友開心重要過夾到一隊 band，夾 band 夾到反晒面，最終咪又係冇 Beyond。
人大咗返唔到轉頭
啲人成日話世榮「唔玩」，我就覺得唔好乜都賴晒佢，好多人都有唔同意見，你估我哋係偶像咩？個個都係藝術家嚟o架，我認我哋三個都好麻煩。或者過幾年，會再有呢個機會，點解一定要喺 30 周年開騷先？就係呢個 30 周年，逼到大家咁樣，睇 Beyond 嘅人只要有 Beyond 就會睇，我唔係冇做過（重組）喎，咁我真係做唔到，人大咗會變，大家試過單飛後，都返唔到轉頭。
加插隔空對唱環節
呢兩場騷，我係有少少壓力，但興奮多啲，其實演唱會重點係紀念家駒，阿哥離開 20 年，我希望有機會同歌迷一齊懷念佢，到時我會唱好多 Beyond 嘅歌，或者會有同家駒隔空對唱嘅環節。講真，我覺得係家駒安排我做呢個騷，今年 2 月時，我做咗《好好》呢首歌想送畀家駒，但冇諗過開騷，或者佢覺得寫咗首歌就應該發表吓，而最好嘅途徑就係喺演唱會度唱。
阿哥修行高做天神
其實我不時會夢到家駒，夢見大家一齊去旅行，嗰種感覺真係好開心、好滿足，但醒咗就會好失落。20 年嚟，我覺得家駒成日陪住我，仲聽到佢講嘢，又識應我，啲人成日見我自言自語，仲覺得我好怪，我都驚自己係咪有精神病。曾經有位得道嘅朋友同我講，家駒已經做咗「天神」，唔使再受輪迴之苦，家駒做過好多好事，有好高修行，我個人咁鬼冇用，第時我死咗後，可能冇機會喺天堂見面。我都叫家駒嚟睇騷，不過佢係神仙，唔使留櫈畀佢，或者佢會上台同我互動。
曾嘲王菲廣東話屎
今次演唱會，除咗請老闆小齊（任賢齊）嚟捧場，仲請咗黃耀明，同另一位神秘嘉賓，盧凱彤都會做嘉賓，我覺得呢個女仔彈結他好叻。喺 Beyond 嘅年代時，我都同好多女歌手合作過，1997 年，我作咗《敷衍》同《守護天使》兩首歌畀王菲，嗰陣時我同王菲係同一間唱片公司、同一位經理人，但唔算好熟，我哋幾個成日笑王菲啲廣東話，因為佢啱啱嚟香港發展，近年大家工作忙，好少再聯絡，知阿菲長駐北京又湊女，我都唔敢打搞佢請佢嚟做嘉賓。除王菲，我仲作過歌畀李蕙敏、莫文蔚同張栢芝，栢芝嗰首《應冇盡有》，可以話為佢度身訂造，佢咁靚女，幫佢作歌都好有 feel，喺我眼中，佢係一個好幸運嘅女仔。
後記：回春話咁易
男人年過 40，多數都陷中年危機，禿頭、大肚腩、皺皮必中一樣。現年 48 歲的家強卻保養得宜，10 年如一日，問他的大肚腩為何突然「失蹤」？剛鯨吞兩大碗雲吞和魚蛋的他，陰陰笑自誇得天獨厚，可於 2 個月內速減 20 磅，而秘訣除做運動、每晚6時後戒澱粉質外，全因靠認真：「我次次都可以o架啦（指減肥），世榮肥到咁，係因為冇認真減過啫。」
口述：黃家強
筆錄：音樂組
化妝：Moe CG＠D-mop Beauty by ND & CO.
髮型：Headquarters Matthew Kong
原來依家家強唱片公司係小齊（任賢齊）開架?? 幾得意咁喎~~~~
If I remembered correctly, 小齊家唱片公司應該係under東亞, 好似以前 Cinepoly under Polygram 咁 哦, 咁即係好似黎生同環亞咁既關係呢~~~
頁:
[1]