Silver linings playbook 失戀自作業 睇後感
最近睇咗兩套有關大都市特有後天性精神病既戲，想分享一下。首先講Silver linings playbook. 先從戲名講起，英文戲名其實比咗一個都幾正面既訊息我地，點可以從陰霾到雨過天晴，但中文戲名就玩食字叫＂失戀自作業＂，我就對失戀同作業相當認同，但係個＂自＂字其實可以再加一個＂救＂字落去，咁可以同一對主角平反佢地並無作孽，仲可以自救！
無大卡士，無特技，無裸露，一切歸於原始：從劇本出發！角色設定上我其實幾喜歡男主角Pat(Bradley Cooper)同他的爸爸Pat Sr.(Robert De Niro)有一種微妙既關係，老豆迷信於Pat陪他睇波可以令他愛隊贏波，Pat亦相信佢可以贏返個老婆返黎，說到底兩父子同樣都有強迫症！ 都市生活你睇我好我睇你好，Pat既朋友看似幸福（既有份好工又有小朋友出世），實則背負沉重壓力，晚晚要聽heavy metal去發泄！女主角方面反而我覺得少咗筆墨形容點解要放縱自己去到如斯地步！儘管結局來得老土，但happy ending永遠都會令人覺得心曠神怡。
劇本雖好但我覺得演員超水準發揮先係呢套戲既亮點，個人覺得Bradley Cooper如果唔係遇到林肯上身既Daniel Day Lewis，絕對有機會攞影帝，唔誇張但佢每一幕都表現出嗰種口說正能量但又做出好多不為都市人認同既行為，攪到我即刻搵返佢前作limitless逆天潛能出黎睇睇究竟呢位演員有幾好戲。其次係迪尼路呢位老戲骨，有一幕佢solo同Pat對話，睇到我眼濕濕！女主角Jennifer Lawrence飾演既Tiffany，正如上文提及，因缺乏深刻描寫佢年少喪夫而帶黎既悲痛，反而我覺得佢未到可以攞到影后呢個level！
先進社會可以比到好多人際關係及物質比我地，但係唔小心處理，可能有好多side effects出現。跟住我就係會同大家分享一下side effects 迷離藥謊睇後感！ 支持支持。 雖然部戲都幾好，但我都係喜歡‘少年自讀日記 The Perks of Being a Wallflower’多些！ Bradley Cooper 真係好戲,將bipolar嘅情緒發揮得淋漓盡致! 同意, 呢套戲係男主角比女主角更應得到奧斯卡殊榮! {:1_351:} 呢套睇左,確係言之有物{:1_351:}
頁:
[1]