無線倡機頂盒軟件升級 睇高清電視 可訂檯食飯
財圈動感B08明報
2009-04-09
小琴密語
--------------------------------------------------------------------------------
無倡機頂盒軟件升級 睇高清電視 可訂食飯
--------------------------------------------------------------------------------
噚日小琴同無（0511）總經理鄭善強見面，佢話4 月廣告市場較首季好少少，但之後係點就無人知。不過佢好肯定係，宜家佢地發覺個數碼廣播，播完高清、標清，加埋語音，七除八扣，剩番個大氣電波頻道其實唔係好夠互動功能用，只有每秒500KB 左右，搞到個服務反應會遲鈍。
唔好睇小呢個互動功能，舉例說，你睇緊飲食節目時，可以下個遙控，電視又會多個「菜單」畀你去節目講緊間餐廳訂位都可以。你方便同時， 「重中之中」係電視台又多了筆廣告收入，你話幾咁重要。
為改善唔夠頻寬呢個問題，鄭總話佢地想將數碼廣播個編碼技術由MPEG-2 更新至MPEG-4，同時係廣播技術會做微調，好處係編碼技術改善後，現有的大氣電波頻段會「更見使」，同時用戶接收又會好。
咁要點做呢？鄭總話技術上佢做了好多測試，簡單來講就係透過大氣電波將個更新檔案、下載至觀眾家中的解碼器，解碼器收到後會顯示，要求觀眾確認係咪安裝更新檔，情有如電腦軟件下載更新咁，安裝就升級成功。
係咪咁簡單？其實都會有風險，鄭總話可能會有解碼器「表錯情」，明明下載檔案係畀A 牌子，但B 牌子解碼器錯認係畀佢，安裝，咁就可能會搞壞部機；第二個可能性係，有解碼器先天不支援MPEG-4，咁根本無得更新，唯有換機啦。鄭總話月底會同政府同埋亞視坐低傾下呢個問題，但小琴一聽換機？譁，買了一年唔夠要換機，好慘喎。小琴問過電訊管理局，發言人話佢地一直有同無亞視定期開會，就技術可行性同埋對用戶接收所造成影響因素進行考慮。
升級失誤有可能壞機
至於係咪要換機，發言人話市面上貼有電管局標籤「升級版機頂盒」，即使升級至MPEG-4 都可以操作如常，至於話貼有標籤，只支援MPEG-2 的「基本版機頂盒」原來仲未推出市場，換句話說，即使無更新制式，要換機觀眾應該好少好少。據政府數據，截至去年底，香港已經有成72 萬戶可睇到數碼高清電視。
頁:
[1]